Култуура уонна сынньалаҥ пааркатыгар – “Кыайыы марафона”

Бу өрөбүлгэ, Санкт-Петербурга “Старт-РАН” диэн тэрийэр бөлөҕө Россия үрдүнэн “Кыайыы марафона” хамсааһыны ыытта. Бу тэрээһиҥҥэ Саха сирэ эмиэ кыттыһан, бэҕэһээ, ыам ыйын 12 күнүгэр 60 кыттааччылаах, бэрт көхтөөхтүк буолан ааста.

Сүүрүүнү М.К. Аммосов аатынан Хотугулуу Илиҥҥи федеральнай университет ГТО нуорматын туттарыыга салайааччыта Александр Викторович Черкашин көҕүлээн ыытта. Манна Намтан, Уус Алдантан, Мэҥэ Хаҥаластан, Хаҥаластан, Сунтаартан, Дьокуускайтан эр санаалаах сүүрүктэр кытыннылар. Амма Эмиһиттэн нэһилиэк баһылыга Илья Пестерев салайааччылаах үс сүүрүк билиҥҥи хаайтарыылаах кэмҥэ өрүһү “Ирбиһинэн” туораан кэлэн кыттыбыттарыгар махтаныахха эрэ сөп.

Сүүрүү Дьокуускай куорат Сынньалаҥ уонна култуура пааркатыгар от-мас быыһынан ыытылынна. Кырдьык, хайдах эрэ партизаннар ыллыктарынан сүүрүү курдук буолла. Сааскы, ыам ыйын сибиэһэй салгынын түөһү толору эҕирийэн оҕолордуун-оҕонньордуун түһүнэн кэбистибит. Сүүрүктэр мумматтарын инниттэн устудьуоннар ыйан-кэрдэн көмө буоллулар. Маҥнай 8 сааһыттан үөһээ 20-чэ оҕо 1 км дистанцияҕа илин-кэлин түһүстүлэр. Арай, арыый кыралар бааллар да, дистанцияларын кыл тыынынан түмүктээтилэр. Уолаттарга маҥнайгынан Толя Окороков 4 мүн 0,5 сөк кэлэн бастаата. Кини кэнниттэн Максимилиан Гоголев, Коля Ефимов иккиһинэн-үсүһүнэн түмүктээтилэр.

Кыргыттарга маҥнайгы миэстэни Анджелика Оконосова – 1 км сири 4 мүн 34,7 сөк кэллэ. Кини кэнниттэн Вилена Старостина, Василина Рубцова иккис-үһүс миэстэни ыллылар. Кыайыылаахтар анал грамота, “Кыһыл сулус” мэтээллэри ылан үөрдүлэр-көттүлэр, төрөппүттэр махтаннылар.

Улахан дьоҥҥо бастакы миэстэни биһиги киэн туттар сүүрүкпүт, элбэх күрэхтэһиилэр кыайыылаахтара Василий Спиридонов биэтэккэ маҥнайгынан кэлэн ситистэ. Кини 10 м дистанцияны 40 мүн 47 сөк түмүктээтэ. Бу бөлөххө Михаил Булкин, Максим Гоголев иккис-үһүс миэстэлэннилэр. Оттон дьахталларга Полина Слободчикова 10 км дистанцияны 44 мүн 19 сөк кэлэн бастаата. Манна Александра Митина иккис, Марина Третьякова үһүс миэстэлэри ыллылар. Кыайыылаахтар анал грамота, мэтээл бириис туттулар. Оттон дистанцияны түмүктээбиттэргэ “Кыһыл сулус” анал “Кыайыы марафонун” мэтээллэрин туттубут.

Бары сүүрүктэр дистанциябытын Улуу Кыайыы акциятын марафонун ситиһиилээхтик түмүктээн, үөрэн-көтөн тарҕастыбыт.

Александр Викторович инникитин сайын, күһүн өссө үчүгэй тэрээһиннээх сүүрүүнү ыытар былааннааҕын үөрэн туран биллэрбитин, бары да астына иһиттибит. Итиэннэ эһиилги, Кыайыы 75 сылын туолар үбүлүөйдээх сүүрүүгэ хайаан даҕаны кыттар санаалаахпытын биллэрдибит.

Дмитрий ГОРОХОВ, “Кыайыы марафонун” кыттыылааҕа.

   

Добавить комментарий

Ваш e-mail не будет опубликован. Обязательные поля помечены *