Уол оҕо эриллэн эр бэрдэ буолар

Ойор-тэбэр чаҕылхай күннээх оҕо сааска улахан үөрүүлэр, ситиһиилэр үйэ тухары умнуллубаттар. А.В. Васильев аатынан Ой орто оскуолатын алын сүһүөх кылаастарга физкултуураҕа учуутала Ж.Д. Атласова быйылгы үөрэх дьылыгар улаатан эрэр оҕолорго бэйэтин бырайыагын толкуйдаабыта. Чиэппэр ахсын хапсаҕайдаһан тустууга күрэхтэһии тэрийэн оҕо эт-сиин, өй-санаа өттүнэн сайдарыгар бигэ олугу  уурбута. Бу саҥа сүүрээни Нөмүгү нэһилиэгин  «Бэдэр» аҕалар түмсүүлэрин салайааччылара дьоһуннаах ыал аҕалара, дэгиттэр кыанар дьон Кузьма Острелин уонна Иннокентий Тобонов тута өйөөбүттэрэ. Хоһуун өйдөөх-санаалаах дьон, бэйэлэрин санааларын олоххо киллэрэр туһугар күннэтэ түбүгүрэллэр. Кинилэр сүрүннээн дьону түмэн, ыччаттарга холобур буолан араас тэрээһиннэри ыыталлар.

Ыам ыйын 3 күнүгэр аатырбыт спортсмен В.Павлов аатынан спортсаалаҕа тустар көбүөрдэр тэлгэммит дьоҕус түһүлгэлэригэр кыра уолаттар тустан хачымахтастылар. Кыайыылаах бөҕөстөр мэтээлгэ тиксиэхтээхтэр. Күрэхтэһиини көҥүл тустууга Россия спордун маастара, үрдүкү кылаас үөрэнээччилэригэр физкултуура учуутала К.С. Саввинов судьуйалаата.  Түөрт түһүмэхтээх күрэх ааптара Ж.Д. Атласова:

Бу бэйэм бырайыагым диэххэ сөп, 4-с түһүмэхпит ыытылынна. Оҕону иитиигэ наар дьахтар аймах буолар дииллэрин иһин, бэйэм итэҕэспин көннөрө сатаан уолаттары уол курдук иитэр сыалтан нэһилиэкпит «Бэдэр» аҕалар түмсүүлэрин кыттыһыннаран, кинилэр көмөлөрүнэн, өйөбүллэринэн хас чиэппэр ахсын өбүгэ оонньуутун хапсаҕайы таптаатыннар диэн оҕолорбутугар күрэхтэһии ыыттыбыт.  К.К. Острелин уонна И.Д. Тобонов салайар аҕалар түмсүүлэрэ сырыы ахсын мэтээллэринэн, грамоталарынан хааччыйдылар уонна күрэхтэһиини ыытыһаллар. Манна күрэхтэспит оҕолор хапсаҕай диэн тугун билэн, санаалара кытаатан үөрэн-көтөн тарҕаһаллар. Кинилэр улааттахтарына спортсмен да буолбатахтарына, мин тустубутум  диэн эр киһилии киэн тутта этиэхтэрэ, –  диир Жанна Дмитриевна.

Оҕону хайдах иитэртэн-үөрэтэртэн, олоххо бэлэмнииртэн омук инники кэскилэ тутулуктаах. Билиҥҥи кэмҥэ, улаатан эрэр оҕолору эт-хаан өттүнэн иитиигэ ураты болҕомто ууруллара кэм ирдэбилэ буолла.  Нөмүгү нэһилиэгин «Бэдэр» аҕалар түмсүүлэрин салайааччыта Кузьма Острелин:

Ой орто оскуолатын физкултуураҕа учуутала  Жанна Дмитриевна көрдөһүүтүн быһа гыммакка ылсыһан, хас чиэппэр аайы биирдии күрэхтэһиини ыытарга былааннаабыппыт. Бу тэрээһиммитигэр аҕалары кыттыһыннаран тэрийэбит. Кэлэр сылларга өссө көхтөөхтүк кыттыахтара дии саныыбын. Быйылгы үөрэх дьылыгар ыыппыт түөрт күрэхтэһиибитин кэлэр сылларга өссө сайыннаран саҥалыы тыыннаан тэрийиэхпит. Үөрэх дьыла бүттэҕинэ, сайын бу оҕолорбутун атын тэрээһиннэргэ эмиэ кытыннарыахпыт, – диир Кузьма Кузьмич.

Салгыы санаатын «Бэдэр» аҕалар түмсүүлэрин салайааччытын солбуйааччы Иннокентий Тобонов үллэһиннэ:

Ааспыт сылларга биһиги нэһилиэкпитигэр көҥүл тустуу уонна төрүт хапсаҕайдаһан тустуу олус сайда сылдьыбыт кэмнэрдээҕэ. Билиҥҥи кэмҥэ бу көрүҥнэргэ таһыммыт арыый мөлтөөтө дии саныыбын. Итинтэн сиэттэрэн, биһиги күрэхтэһиибитин кыра 1-кы кылаас уолаттарыттан саҕалыахха диэн сүбэлэспиппит. Ол быһыытынан тустууну, спорду өрө тутар уолаттар улааттахтарына чөмпүйүөннэр иитиллэн тахсыахтара.

Тэрээһиҥҥэ нэһилиэк баһылыга Н.В. Устинов оҕолорго кэскиллээх үтүө тылларын эттэ, аҕалар оҕолоругар кэлэн өйөбүл-тирэх буоллулар. Үс оҕолоох аҕа, баһаарынай сулууспа үлэһитэ Александр Брызгаев 1-кы кылааска үөрэнэр уолугар Эрчимэҥҥэ ыалдьа сылдьар:

Кыра кылаас уолаттарын хапсаҕайга сыһыараллара олус үчүгэй. Бу оҕолор көҥүл бириэмэлэрин суотабай төлөпүөҥҥэ атаарыахтарынааҕар эт-сиин өттүнэн сайдаллара олус наадалаах. Бастакы күрэхтэһиилэригэр тустан кыайбыттарын, кыайтарбыттарын бу оҕолор өрүү өйдүү-саныы сылдьыахтара. Санаалара кытаатыа, кыайыыга ситиһиигэ дьулуурдаах буолуохтара.  Оҕолору спорка эрэ буолбакка, олоххо наадалаах хайысхаларга эмиэ сыһыарыахха наада. Мин, «Бэдэр» аҕалар түмсүүлэригэр олус махтанабын.

Үчүгэйдик тустан миэстэлэспит оҕолор мэтээллэрин түөстэригэр иилинэн, грамота тутан дьоһуннаахтык туттан турдулар. “Бэдэр”аҕалар түмсүүлэрэ оҕо айылҕаттан аналын таба көрөн,  тус уратытын аахсан, онтуката сөптөөх хайысханан муҥутуурдук сайдарыгар төһүү күүс  буоларга дьулуһаллар. Этэргэ диэри, уол оҕо эриллэн, эриллэн эр бэрдэ буолар.

Кыайыылаахтар уонна призердар

Маҥнайгы кылаас уолаттарын ортолоругар:

1-кы миэстэ – Григорьев Эрсан

2-с миэстэ – Брызгаев Эрчим

3-с миэстэ – Степанов Богдан.

Иккис  кылаас уолаттарын ортолоругар:

1-кы миэстэ – Филиппов Никита

2-с миэстэ – Карпов Павел

3-с миэстэ – Макаров Тимур

Уйбаан УЙГУУРАП.

Ааптар хаартыскаҕа түһэриитэ.

Хаҥалас.

Добавить комментарий

Ваш e-mail не будет опубликован. Обязательные поля помечены *