Николай Тарскайы төрөөбүт күнүгэр ахтан, санаан аастылар

Саха АССР спорка уонна физическэй култуураҕа кэмитиэтин бэрэссэдээтэлэ (1955-1959), Саха сирин физическэй култуураҕа уонна спорка хамсааһынын талааннаах салайааччыта, биллэр государственнай уонна общественнай деятель Николай Николаевич Тарскай төрөөбүтэ 95 сылын Дьокуускай куоракка, кини аатын сүгэр “Туймаада” стадион иннигэр баар бюһун аттыгар бүгүн үөрүүлээх миитин тэрилиннэ.

Бу бэлиэ түгэҥҥэ Саха сирин салалтата, спортивнай общественноһа, биир дойдулаахтара – уус алданнар көхтөөхтүк кытыннылар. Миитиҥҥэ Николай Николаевич Тарскай (1924-1962) талааныгар сүгүрүйээччи элбэх киһи муһунна.

СӨ Спорка уонна физическэй култуураҕа миниистирэ Иннокентий Григорьев – Н.Н. Тарскай спорт сайдыытыгар киллэрбит өҥөтүн ахтан туран, хаһыс да сылын салгыҥҥа ыйанан турар, бастыҥ үлэлээх спорт тэрийээччитигэр Николай Тарскай аатынан бириэмийэни олохтуур туһунан боппуруоһу чугастааҕы кэмҥэ Спорт министиэристибэтин кэллиэгийэтигэр көрөргө эрэннэрдэ.

Ил Түмэн дьокутаата, спорт миниистиринэн ситиһиилээхтик үлэлии сылдьыбыт Михаил Гуляев бэйэтин ахтыытыгар спорт эйгэтигэр үлэлиир дьон Николай Тарскай курдук тахсыылаах, элбэх билиилээх, эргиччи сайдыылаах буолалларыгар ыҥырда. Оччоҕуна биһиги өрөспүүбүлүкэбит физическэй култуура уонна спорт өссө үчүгэй үлэлээх, өссө ситиһиилээх буоларыгар баҕарда.

Оттон Н.Н. Тарскай төрөөбүт дойдутуттан – Уус Алдан улууһун баһылыгын бастакы солбуйааччы Петр Попов, Николай Николаевич кылгас эрээри чаҕылхай олоҕу олорбутун ахтан туран, биллиилээх биир дойдулаахтарын аатын салгыы үйэтитиигэ улууска туох-ханнык үлэлэр ыытыллалларын билиһиннэрдэ.

Ити курдук, Ил Түмэн дьокутаата, СӨ мас-рестлиҥҥэ федерациятын бэрэсидьиэнэ Геннадий Васильев, СӨ оҕо спордугар тэрилтэтин салайааччыта Михаил Габышев, Н.Н. Тарскай төрөөбүт сириттэн – Уус Алдан улууһун Баатаҕай нэһилиэгин баһылыга Михаил Белолюбскай, өрөспүүбүлүкэ спорка миниистиринэн үлэлии сылдьыбыт биллиилээх бөҕөс Петр Попов, СӨ үтүөлээх тренерэ Павел Харитонов – спорт талааннаах тэрийээччитин туһунан бэйэлэрин санааларын эттилэр, ахтыы оҥордулар.

Миитин бэлиэ түгэнинэн мустубут дьон Николай Николаевич Тарскай бюһугар ытыктабыл уонна кэриэстэбил быһыытынан сибэкки дьөрбөтүн ууруулара буолла.

Ыам ыйын 8 күнүгэр Н.Н. Тарскай төрөөбүт дойдутугар Баатаҕайга эмиэ өйдөбүнньүк тэрээһин ыытылынна. Ити курдук, бу күн – биллиилээх киһибит аатын өйдөөн, санаан, кэриэстээн аастылар. Кини аатын үйэтитии үлэтэ салгыы ыытыллар.

Петр ПАВЛОВ.

Ааптар хаартыскаҕа түһэриилэрэ.

Добавить комментарий

Ваш e-mail не будет опубликован. Обязательные поля помечены *