Дайаана Алексеева, Николай Стручков – чемпионнар

Нуучча дуобатыгар Саха Республикатын үрдүкү лигаҕа чемпионата нэдиэлэ устата ыытыллан түмүктэннэ. Бу, бастыҥнары сүүмэрдээн киллэрэн күрэхтэһиннэрии – спорт дуобат көрүҥэр улахан таһымнааҕынан ааҕыллар.

Дьахталларга киирсии тыҥааһыннаах буолла. Ол курдук, бүтэһик туур түмүгүнэн үс дуобатчыт тэҥ очукуону хомуйдулар. Онуоха Горнайтан кыттыбыт маастарга кандидат, ахсыс кылаас үөрэнээччитэ Дайаана Алексеева 9,5 очукуолаах бастаата. Эмиэ итиччэ очукуолаах эрээри хаачыстыбанан сабырыйтарбыт спорт маастара Сандаара Апросимова (Дьокуускай), маастар Тунаара Федорова (Горнай) иккис-үһүс миэстэлэри үллэһиннилэр.

Оттон эр дьоҥҥо международнай гроссмейстер Николай Стручков (Дьокуускай) – 8 кыайыылаах, 2 тэҥнэһиилээх, барыта 9 очукуолаах, өссө бүтэһик туур иннинэ утарылаһааччыларыттан ураты чорбойон, кыайыылаах аатын ылла. Итинэн кини Сахатын сиригэр бастакы бастааһына буолла. Иккис миэстэҕэ 7,5 очукуолаах международнай гроссмейстер Гаврил Колесов (Чурапчы) таҕыста. Үһүс бириистээх миэстэҕэ 6 очукуолаах эмиэ международнай гроссмейстер Иван Токусаров (Мэҥэ Хаҥалас) тигистэ.

Чемпионат түмүгүнэн дьахталларга да, эр дьоҥҥо даҕаны алта күүстээхтэр ахсааннарыгар киирбиттэр мэтээллэринэн, дипломнарынан, харчынан бириистэринэн наҕараадаланнылар итиэннэ эһиилги үрдүкү лига чемпионатыгар кыттар быраабы ыллылар.

Чемпионнары уонна призердары, кинилэр тренердэрин эҕэрдэлиибит! Саха сиригэр саамай элбэх мэтээли аҕалар дьоммутугар өссө даҕаны ситиһиилэри баҕарабыт.

Ким кимниин хайдах оонньообутун, төһө очукуону ылбытын бу бэриллэр таблицалартан көрөн бэйэҕит ырытан сыаналааҥ.

“Дьулурҕан”.