Интэринээт-оскуолаҕа үөрэммиттэр 50 сыллаах үбүлүөйдэрэ


Муус устар 12-13 күннэригэр Чурапчы нэһилиэгин интэринээт оскуолатын 50 сыл анараа өттүгэр түмүктээбит 1969 сыллааҕы выпускниктар өр көһүтүүлээх, ахтылҕаннаах көрсүһүүлэрэ буолла. “Бу көрсүһүү туһунан көҥүл тустууга Сойуус чөмпүйүөнэ Семен Морфунов туруорсубута, былааннаабыта ыраатта”, – диэн кэпсиир Дмитрий Коркин аатынан “Ыспартыыбынай албан аат” мусуой дириэктэрэ Егор Пудов.
1969 сыллааҕы выпускниктар ортолоругар көҥүл тустууга Олимпийскай оонньуулар призердара, ССРС успуордун үтүөлээх маастара Александр Иванов, Сойуус чөмпүйүөннэрэ, көҥүл тустууга ССРС успуордун маастардара Семен Макаров, Семен Морфунов, Гаврил Каприн, Семен Окоемов, о.д.а. кэлбиттэр. Үөрэппит учууталлартан Екатерина Семеновна Лукина уонна Сергей Григорьевич Старостин бааллар.

Выпускниктар маҥнай ииппит, үөрэппит учууталларын, тириэньэрдэрин аатынан Албан аат мусуой дьиэтигэр мустан ааспыты, буола турар ситиһиилэр тустарынан ирэ-хоро кэпсэттилэр, мусуой дьиэтин сирийэн көрдүлэр-иһиттилэр. Ол кэннэ Чурапчытааҕы өрөспүүбүлүкээнискэй ыспартыыбынай олимпийскай эрэллэри бэлэмниир интэринээт-оскуола үөрэнээччилэрин үөрүүлээх линейкэлэригэр уонна улуу тириэньэр Дмитрий Петрович Коркин бюһугар сибэкки дьөрбөтүн уурдулар.
Эбиэттэн киэһэ интэринээт-оскуола үөрэнээччилэрин, педагогическай кэлэктииби кытары көрсүһүү, ахтыы киэһэтэ буолла. Көрсүһүү чэрчитинэн, Чурапчытааҕы судаарыстыбаннай физическэй култуура уонна успуорт тустууга саалатыгар 1969 сыллааҕы выпускниктар бириистэригэр 2001-2003 сыллааҕы төрөөбүт уолаттарга уонна Александр Федотов аатынан ыспартыыбынай кииҥҥэ Саха сирин, улуус аатын ааттаппыт ССРС чөмпүйүөннэрин бирииһигэр көҥүл тустууга күрэхтэһии буолла.


Күрэхтэһии үөрүүлээх чааһыгар, Монреаллааҕы Олимпийскай оонньуу призера, Сойуус чөмпүйүөнэ Александр Иванов, СӨ экономикаҕа миниистирин солбуйааччы Тимур Ханды, улуус баһылыгын эбээһинэһин үп-ас уонна инвестиция боппуруостарыгар солбуйааччы Алексей Егоров, улуус дьаһалтатын физкултуура уонна успуорт салалтатын салайааччы Иван Оконешников, үүнэр көлүөнэ ыччаты успуорка уһуйар кыһа дириэктэрэ Яков Оконешников, успуорт бэтэрээнэ, көҥүл тустууга Сойуус чөмпүйүөнэ Семен Макаров, Сойуус чөмпүйүөнэ Семен Морфунов, күрэхтэһии сүрүн судьуйата, СӨ көҥүл тустууга үтүөлээх тириэньэрэ Егор Яковлев эҕэрдэ тылы эттилэр.
Уопсай түмүккэ 22 киилэҕэ Хоптоҕоттон Ришат Камалов 2-с миэстэ, Чурапчыттан Эрсан Кузьмин, Дархан Седалищев 3-с миэстэ. 24 киилэҕэ Хоптоҕоттон Ерлан Камалов 1-кы, Сылаҥтан Айхал Ноев 2-с, Хатылыттан Георгий Кривошапкин 3-с миэстэ буоллулар. 26 киилэҕэ Чурапчыттан Гоша Неустроев бастаата, Айхал Павлов иккис, Сайдам Федоров үһүс. Оттон 28 киилэҕэ Чурапчыттан Эрхаан Смирников 1-кы, Мугудайтан Андрей Потапов уонна Чурапчыттан Фабиан Петров 3-с миэстэ буоллулар. 30 киилэҕэ Чурапчыттан Никита Элясов уонна 33 киилэҕэ эмиэ Чурапчыттан Айаал Пудов 1-кы миэстэлэри ыллылар. Хоптоҕоттон Кирилл Петров 2-с, Тимур Посельскай 3-с миэстэ буоллулар. 38 киилэҕэ Чурапчыттан Айтал Баишев 1-кы, оскуола-интэринээт иитиллээччитэ Ньургустаан Христофоров 2-с миэстэ. 40 киилэҕэ Чурапчыттан Герман Элясов 2-с, оскуола-интэринээттэн Коля Матвеев, Чурапчыттан Афоня Ефремов 3-с миэстэ буоллулар. 43 киилэҕэ Чурапчыттан Ньургун Степанов 2-с, Төлөйтөн Ариан Оконешников, Толя Яковлев 3-с миэстэ буоллулар. 47 киилэҕэ Чурапчыттан Арылхан Егоров кыайда. Төлөйтөн Айдын Местников иккистээтэ, Чурапчыттан Юрий Старостин үһүстээтэ. Оттон 57 киилэҕэ Чурапчыттан Айаал Дьячковскай 1-кы миэстэҕэ таҕыста.

Семен ЖЕНДРИНСКАЙ.

Ааптар хаартыскаҕа түһэриилэрэ.

Добавить комментарий

Ваш e-mail не будет опубликован. Обязательные поля помечены *