Остуол тенниһэ: Изот уонна Нарыйа биһиги эрэллэрбит

Приморскай кыраай Покровка сэлиэнньэтигэр 13-гэр диэри саастаах спортсменнар Дальнай Восток федеральнай уокуругун үрдүнэн бастыыр иһин күрэхтэһиилэрэ ыытылынна. Күрэхтэһиигэ уокурук 8 регионуттан 69 уол уонна 55 кыыс кыттыыны ылла.

Ол иһигэр Саха сириттэн сэттэ уол уонна кыыс күрэхтэстэ. Кинилэри кытта түөрт тириэньэр уонна үс төрөппүт сылдьыста. Уолаттарга Чурапчы улууһун Хатылы оскуолатыттан Изот Кривошапкин үһүс бириистээх миэстэҕэ таҕыста. Тириэньэрдэрэ – Г.И. Кривошапкин уонна А.А. Ефремов). Оттон кыргыттарга Дьокуускайтан Нарыйа Гоголева эмиэ үһүс миэстэни ылла. Нарыйа – тириэньэр В.И. Румянцев салалтатынан эрчиллэр. Маны тэҥэ Изот Кривошапкин уонна Нарыйа Гоголева пааранан оонньооһуҥҥа үһүс миэстэҕэ тигистилэр.

Итинэн, Изот Кривошапкин уонна Нарыйа Гоголева ыам ыйыгар Чебоксары куоракка ыытыллар Арассыыйа күрэхтэһиитигэр кыттар быраабы ыллылар.

Күрэхтэһии кыттыылаахтара айаннарын ороскуотун барытын бэйэлэрэ төлөөн бара сырыттылар. Покровкаҕа диэри сиринэн уонна поеһынан түөрт суукканан айаннаан тиийбиттэр. Тириэньэрдэр этэллэринэн, өскөтүн көтөр аалынан айаннаабыттара эбитэ буоллар, көрдөрүүлэрэ быдан үчүгэй буолуо эбит.

“Дьулурҕан”.    

Добавить комментарий

Ваш e-mail не будет опубликован. Обязательные поля помечены *