Владимир Егоров: “Миэхэ эрэммиттэргэ, итэҕэйбиттэргэ – барҕа Махтал!”

Биир идэлээхпит, билигин Румынияҕа, көҥүл тустууга Дьобуруопа чөмпүйэнээтин сырдатыыга үлэлии сылдьар Максим Тихонов – бэҕэһээ 57 киилэҕэ кыайыыны ситиһэн боруонса мэтээлинэн наҕараадаламмыт, Македония хамаандатын чиэһин көмүскүүр биир дойдулаахпыт Владимир Егоровы көрсөн, биһиги dzulurgan.ru сайтпытыгар анаан аҕыйах ыйытыыга хоруйдууругар көрдөспүтүн, ааҕааччыларга билиһиннэрэбит.   

Бэлэмнэниим үчүгэйдик барбыта, – диэн саҕалыыр Владимир. – Чемпионат саҕаланыа икки нэдиэлэ иннинэ Дагестаҥҥа тиийэн дьарыктаммытым. Адаптацияны ааспытым. Онно ыйааһыммын түһэриини саҕалаабытым. Быһата, ыйааһыммын эрдэттэн тута сылдьыбытым. Ыйааһыным үчүгэйдик барбыта. Муус устар алтыс күнүгэр Дагестантан – Москваҕа, сарсыныгар Москваттан – Бухарестка көппүтүм. Ити күн манна эбиэккэ кэлбитим. Ахсыска – тустабын. Ыйааһыным балтараа киилэ ордук этэ. Дьарыктаммытым. Үчүгэйдик утуйбутум. Онтон биэс уон грамм хаалбыта. Эрдэттэн үчүгэйдик настройкаланан, онно-манна аралдьыйбакка, наар тустуу эрэ туһунан толкуйдуу, саныы сылдьыбытым.

Бастакы эргииргэ россиянин Садулаевтыын туһуннум. Сетка эрдэ тахсыбытын кэннэ, кини хапсыһыыларын эҥин көрбүтүм, үөрэппитим. Олох киирсэрдии оҥостон киирбитим. Бэйэбин, хапсыһыы кэнниттэн санаатахпына, тактика өттүнэн сыыһа туһуннум диибин. Онон хоттордум. Садулаев финалга тахсыа диэммин, бараммын ыйааһыммын оҥорбутум.

Онтон сарсыныгар Метревелины кытта тустар буоллум, Испанияттан тустар грузин уолун кытта. Ол иннинэ кинилиин хаста да туста сылдьыбытым. Биирдэ Дан Колов турнирыгар уонна биирдэ бундеслигаҕа хотторбутум. Итиэннэ иккитэ бундеслигаҕа кыайбытым, онон сирэй көрсүүбүт ахсаана тэҥ этэ. Билигин мин чорбойдум. Үс – бииргэ хотторон иһэммин, түгэн көстүбүтүгэр, шанспын куоттарбатым.

Онтон боруонса мэтээл иһин румын Дуковтыын көрүстүм. Кинилиин эмиэ бундеслигаҕа тустубутум. Аҕыс – бииргэ, спокойно кыайбытым. Былырыын Дан Коловка үс – бииргэ хотторон иһэн, эмиэ хоннох анныттан саайан, тушелаан кэбиспитим. Бириэмэ бүтэһигэр. Онтон быйыл жестко настройкаланан киирбитим. Маннык шанс элбэхтик көстүбэт диэн бараммын, туохпун барытын ууран, эрдэттэн настройкаланан, хайаан даҕаны кыайабын диэн санаалаах көбүөргэ киирэн, үчүгэйдик кыайдым диибин. Онон Дуковы үһүспүн кыайдым.

Улахан барҕа махталбын тиэрдиэхпин баҕарабын, дьиэ кэргэммэр, кэргэммэр, оҕобор, спонсорбар – Руслан Еремеевич Федотовка, Амма улууһун спорка управлениетын начаалынньыга Эдуард Васильевич Ефимовка, Олимпийскай эрэл училищетын дириэктэрэ Алексей Алексеевич Филипповка! Кинилэр баччааҥҥа диэри миэхэ көмөлөһөллөр, күрэхтэһиилэргэ барар-кэлэр ороскуоппут төлүүллэр. Өйүүллэр, улахан көмө оҥоро сылдьаллар. Дьоммор, төрөппүттэрбэр, эдьиийдэрбэр, убайдарбар, балтыларбар, бырааттарбар, доҕотторбор-атастарбар барыларыгар эмиэ куруутун көмөлөрүн, миэхэ ыалдьалларын иһин махтанабын. Итиэннэ фанаттарга! Ким эрэммит, ким өйөөбүт, ким итэҕэйбит дьоҥҥо барҕа махтал!

Тириэньэрдэрбэр махтанабын. Бу ситиһиибин Илья Анатольевич Солдатов сырдык кэриэһигэр аныыбын. Кини миигин кытта бүтэһиккэ диэри сылдьыспыта. Улахан махталбын билиҥҥи тириэньэрбэр Николай Николаевич Рожиҥҥа тиэрдэбин. Уонна миигин кытта араас кэмҥэ үлэлэспит дьоҥҥо: Петр Дмитриевич Неустроевка, Павел Михайлович Капитоновка, Станислав Афанасьевич Захаровка барҕа махталбын тиэрдэбин.     

Биир дойдулаахтарбар бөтүҥнэргэ эмиэ махтал! Былырыын Европаҕа тустуохтаах этим, ону өйөөннөр харчы эҥин хомуйан өйөөбүттэрэ.

Кэргэним уонна оҕом билигин Сунтаарга бааллар. Уолум Тимур, алта ыйдаах. Инникитин өссө күүскэ дьарыктанан, өссө үрдүк ситиһиилэри көрдөрүөм диэн эрэнэбин.  

“Дьулурҕан”.     

Максим ТИХОНОВ хаартыскаҕа түһэриитигэр: көҥүл тустууга Дьобуруопа чөмпүйэнээтин боруонса призера Владимир Егоров. Бухарест, Румыния.  

Добавить комментарий

Ваш e-mail не будет опубликован. Обязательные поля помечены *