Дьобуруопа чөмпүйэнээтэ: Дьөгүөрэп Болуодьа – боруонса мэтээллээх!

57 кг ыйааһыҥҥа 17 бөҕөс күөн көрүстэ. Биһиги бөҕөспүт сэрэбиэй быһыытынан финал 8/1-гэр былырыыҥҥы Арассыыйа чөмпүйэнээтин призера, быйылгы И.Ярыгин турнирын кыайыылааҕа, Чечня өрөспүүбүлүкэтин тустууга оскуолатын иитиллээччитэ Муслим Садулаевка 2:5 ахсаанынан хотторон кэбиспитэ.

Салгыы күрэхтэһиигэ Садулаев – Леван Метревелины (Испания) уонна Андрей Дуковы (Румыния) кыайталаан, финалга тахсыбыта. Онон, Владимир Егоров боруонса мэтээлгэ дураһыйааччылар “уоскутар” диир бөлөхтөрүгэр киирэн Метревелины кытта тустуутугар, 1:2 ахсаанынан сабырыйтаран иһэн, киһитэ бэлэмэ суох атаакатын туһанан, тиэрэ саайан ыраас кыайыыны ситистэ. Итинэн кини салгыы, чөмпүйэнээт боруонса мэтээлин – олохтоох бөҕөс Андрей Дуковы кытта былдьаста.

Биһиги бөҕөспүт хапсыһыыны сытыытык саҕалаабыта. Этэргэ дылы, хара ааныттан бэйэтэ баһылаан-көһүлээн ыытта. Бастакы түһүмэххэ киһитин атаҕыттан ылан быраҕан икки баалы сурунна. Ол эрээри, иккискэ киирэн Дуков уолбутун атаҕыттан ылан охторон баран, тута кыаһалыы тутан эргитэн 4:2 ахсаанынан чорбойо түстэ. Таблоҕа өссө да балтараа мүнүүтэ баара. Ол аата, балаһыанньаны уларытарга бириэмэ баар дии санаабыппыт. Оннук да буоллар, Владимир эр санаатын киллэрэн, көбүөр таһыгар үтэн таһааран уонна иккитэ иккилии баалы ылан, түмүккэ 7:4 ахсаанынан кыайан, көмүс көлөһүнүн боруонса мэтээлгэ кубулутта.

Бу ситиһиитинэн кини тириэньэрин – СӨ үтүөлээх тириэньэрэ Николай Николаевич Рожины, элбэх ахсааннаах ыалдьааччыларын, биир дойдулаахтарын сүрдээҕин үөртэ. Владимир Егоров улахан көбүөргэ бу бастакы ситиһиитэ. Мантан сиэттэрэн ситиһиилэр, кыайыылар киниэхэ кэлэ туралларыгар баҕарабыт.

Бастакы финаллар түмүктэрэ:

57 кг.
1. Сулейман Атли (Турция)
2. Муслим Садулаев (Арассыыйа)
3. Владимир Егоров (Македония), 3. Махир Амирасланов (Азербайджан).

65 кг.
1. Гаджи Алиев (Азербайджан)
2. Селахаттин Киличсаллаян (Турция)
3. Василь Шуптар (Украина), 3. Начын Куулар (Арассыыйа).

70 кг.
1. Мустафа Кайя (Турция)
2. Агахусейн Мустафаев (Азербайджан)
3. Магомедрасул Газимагомедов (Арассыыйа), 3. Магомедмурад Гаджиев (Польша).

79 кг.
1. Джабраил Гасанов (Азербайджан)
2. Ахмед Гаджимагомедов (Арассыыйа)
3. Мухаммет Котаноглу (Турция), 3. Ника Кенчадзе (Грузия).

97 кг.
1. Абдулрашид Садулаев (Арассыыйа)
2. Александр Гуштын (Беларусь)
3. Нурмагомед Гаджиев (Азербайджан), 3. Элизбар Одикадзе (Грузия).

“Дьулурҕан”.

Добавить комментарий

Ваш e-mail не будет опубликован. Обязательные поля помечены *