Дьобуруопа чөмпүйэнээтэ: Владимир Егоров боруонса иһин тустуо

Көҥүл тустууга Дьобуруопа чөмпүйэнээтин иккис күнэ. Бэҕэһээ биһигиттэн Владимир Егоров (57 кг) күрэхтэһиини бастакынан саҕалаабытын суруйан турабыт. Кини бастакы эргииргэ Муслим Садулаевка (Арассыыйа) 2:5 ахсаанынан хотторон кэбиспитэ. Оттон киһитэ салгыы күрэхтэһиигэ икки утарсааччытын: испанец Метревелины уонна румын Дуковы кыайталаан финалга тахсыбыта. Онон Егоровка суол аһыллан биэрбитэ.

Владимир Егоров “уоскутар” бөлөххө киирэн Метревелины кытта тустуутугар, 1:2 ахсаанынан сабырыйтаран иһэн, киһитэ бэлэмэ суох атаакатын туһанан, тиэрэ саайан ыраас кыайыыны ситистэ. Итинэн кини чөмпүйэнээт боруонса мэтээлин – олохтоох бөҕөс Андрей Дуковы кытта былдьаһар буолла. Уолбутугар ситиһиини баҕарыаҕыҥ!

Оттон бүгүн, чөмпүйэнээт иккис күнүгэр иккис ыйааһыҥҥа Николай Охлопков (Румыния) уонна Андрей Бекренев (Белоруссия) күрэхтэһиини саҕалаатылар.

Бекренев соһуччу болгар Наим Микяйга 1:12 ахсаанынан хотторон кэбистэ. Ол кэнниттэн Охлопков азербайджанец Аскер Мамадалиевы эрэллээхтик (6:0) баһыйа тутта. Бу эргииргэ киһи эрэ барыта эрэнэ күүппүт киһитэ, Арассыыйа чөмпүйүөнэ М.Идрисов турок Реджеп Топалга 9:11 ахсаанынан хоттордо.

Бу ыйааһыҥҥа грузин Бека Ломтадзе хаардыы хаама сылдьар, финал аҥаарыгар сэрэйбит курдук, холкутук таҕыста.

Иккис эргииргэ Николай Охлопков болгар Микяйы 9:0 ахсаанынан кыайда. Биир түгэҥҥэ утарсааччытын түөрт баалга бырахта. Ол кэмҥэ аны Топал – армянин Арутюняҥҥа ыраастык баран хаалла. Онон, били эрдэттэн бастыҥнарынан аахпыт дьоммут, Идрисовтаах Топал сүрүн мэтээлтэн көрө маттылар.

Итинэн бу ыйааһыҥҥа финал аҥаарыгар Бека Ломтадзе (Грузия) – Рэнди Вок (Швейцария) уонна Николай Охлопков (Румыния) – Арсен Арутюнян (Армения) таҕыстылар.

Атын киирсиилэргэ тустуохтара:

74 кг
Франк Чамизо (Италия) – Хаджимурад Гаджиев (Азербайджан)
Василий Михайлов (Украина) – Зелимхан Хаджиев (Франция)

86 кг
Фатих Эрдин (Турция) – Петр Янулов (Молдова)
Владислав Валиев (Арассыыйа) – Мурад Сулейманов (Азербайджан)

92 кг
Иракли Мцитури (Грузия) – Шарип Шарипов (Азербайджан)
Ибрагим Болукбаши (Турция) – Збигнев Барановскай (Польша)

125 кг
Таха Акгуль (Турция) – Анзор Хизриев (Арассыыйа)
Гено Петриашвили (Грузия) – Александр Хоцяновскай (Украина).

Оттон бүгүҥҥү финалларга көрсүөхтэрэ:

57 кг Муслим Садулаев (Арассыыйа) – Сулейман Атли (Турция)

65 кг Хаджи Алиев (Азербайджан) – Селахаттин Килисчалаян (Турция)

70 кг Агахусейн Мустафаев (Азербайджан) – Мустафа Кайа (Турция)

79 кг Джабраил Гасанов (Азербайджан) – Ахмед Гаджимагомедов (Арассыыйа)

97 кг Абдулрашид Садулаев (Арассыыйа) – Александр Хуштын (Белоруссия).

Манна, Гаджимагомедов уонна Хуштын финалга тахсар иһин хапсыһыыларга эчэйии ылан, быһаарыылаах тустууга тахсыбат буоллулар. Онон Джабраил Гасановы уонна Абдулрашид Садулаевы чөмпүйүөннэринэн ааҕыахха сөп.

Арассыыйа хамаандатыттан өссө Начыын Куулар (65 кг) уонна Магомедрасул Газимагомедов (70 кг) боруонса мэтээл иһин киирсиэхтэрэ. Онон тустууну кэтэһэбит, уолаттарбытыгар ыалдьабыт.

Финаллар бу түүн, Саха сирин бириэмэтинэн 12:00 чаастан буолуохтара. Ону тэлэбиисэргэ “МатчБоец” канаалга быһа биэриигэ көрүөххүтүн сөп.

Петр ПАВЛОВ.   

Добавить комментарий

Ваш e-mail не будет опубликован. Обязательные поля помечены *