Владимир Егоров күрэхтэһиини салгыыр

Дьобуруопа көҥүл тустууга чөмпүйэнээтигэр бастакы күн түмүгүнэн биэс ыйааһыҥҥа финалистар ааттара билиннэ. Ол курдук, 57 киилэҕэ бастакы эргииргэ Владимир Егоровы хоппут Муслим Садулаев (Арассыыйа) финалга тахсар иһин хапсыһыыга Андрей Дуковы (Румыния) 10:0 ахсаанынан эрэллээхтик кыайан, кыһыл көмүс мэтээл иһин тустар кыахтанна.

Онон биһиги бөҕөспүт – Македония чөмпүйүөнэ, Германия кулууптар икки ардыларынааҕы күрэхтэһиитин кыайыылааҕа Владимир Егоров, балаһыанньа быһыытынан, салгыы тустар буолла. Кини боруонса мэтээли былдьаһаачылар бөлөхтөрүгэр киирэн Испанияттан тустар грузин Леван Метревелины кытта киирсиэҕэ. Онно ким кыайбыт, үһүс бириистээх миэстэ иһин Андрей Дуковтыын тустуоҕа. Уолбутугар ситиһиини баҕарыаҕыҥ! “Уоскутар” бөлөх тустуулара киэһээ 17 чаас 30 мүнүүтэттэн саҕаланаллар.

Финалга Садулаев утарсааччытынан аан дойду уонна Дьобуруопа чөмпүйэнээтин призера турок Сулейман Атли буолла.

Уопсайынан ылан көрдөххө, бастакы күн түмүгүнэн Арассыыйа, Турция уонна Азербайджан хамаандалара үстүү финалистаахтар. Ол эрээри, Арассыыйа  финалга тахсыбыт иккис киһитэ – Ахмед Гаджимагомедов украинецтыын киирсиитигэр атаҕын эчэтэн, финалга тустара дуу, тустубата дуу биллибэт. Оттон Начын Куулар (65 кг) уонна Магомедрасул Газимагомедов (70 кг) өссө даҕаны боруонса мэтээл иһин тустар кыахтаахтар.

Финаллар бүгүн түүн эмиэ 12:00 чааска саҕаланаллар. Ону тэлэбиисэргэ “МатчБоец!” канаалга быһа биэриигэ көрүөххүтүн сөп.

Чөмпүйүөн аатын былдьаһыахтара:

57 кг: Муслим Садулаев (Арассыыйа) – Сулейман Атли (Турция)

65 кг: Селахаттин Килисчалаян (Турция) – Хаджи Алиев (Азербайджан)

70 кг: Агахусейн Мустафаев (Азербайджан) – Мустафа Кайа (Турция)

79 кг: Ахмед Гаджимагомедов (Арассыыйа) – Джабраил Гасанов (Азербайджан)

97 кг: Абдулрашид Садулаев (Арассыыйа) – Александр Хуштын (Белоруссия).

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *