Тоҥ күүстээхтэр күрэхтэстилэр

Бүлүү куорат төрүттэммитэ 385 сылынан сибээстээн, классическай троеборьеҕа өрөспүүбүлүкэтээҕи турнир ыытылынна. Күрэхтэһиигэ Үөһээ Бүлүүттэн, Бүлүүттэн, Ньурбаттан, Жатайтан уонна Дьокуускайтан барыта 44 спортсмен кыттыыны ылла.

Түмүккэ Бүлүү улууһун хамаандата 3 кыһыл көмүс, 5 үрүҥ көмүс уонна 4 боруонса мэтээли ылан, уопсай түмүккэ бастакы миэстэҕэ таҕыста.

Дьахталларга Арассыыйа успуордун маастара Екатерина Терешкина (Жатай) бастакы, Александра Антонова (Дьокуускай) иккис, успуорт маастара Александра Мегежекская (Жатай) үһүс миэстэлэри ыллылар.

Оттон эр дьоҥҥо Бүлүүттэн успуорт маастарыгар хандьыдаат Сергей Протопопов кыайда. Иккис миэстэҕэ Үөһээ Бүлүүттэн Арассыыйа чөмпүйэнээтин үрүҥ көмүс призера Богдан Прокопьев таҕыста. Үһүс бириистээх миэстэҕэ Бүлүүттэн успуорт маастарыгар хандьыдаат Валерий Нифонов тигистэ.

Дьахталларга сытан эрэн ыарахан ыйааһыннаах штанганы өрө анньыыга Арассыыйа икки төгүллээх чөмпүйүөнэ, успуорт маастара Светлана Воронянская кыайыылааҕынан ааттанна.

Бу көрүҥҥэ хамаанданан түмүккэ Дьокуускай бастакы, Бүлүү иккис, Жатай үһүс миэстэлэннилэр.

Бу туһунан dzulurgan.ru сайтка Бүлүү улууһун физическэй култуураҕа уонна успуорка кэмитиэтэ иһитиннэрдэ.

“Дьулурҕан”.

Добавить комментарий

Ваш e-mail не будет опубликован. Обязательные поля помечены *