Кыайыы көтөлө үөрүүнэн кууста

Көҥүл тустууга аан дойду Кубога Арассыыйа сүүмэрдэммит хамаандатын кыайыытынан түмүктэннэ. Бүтэһик быһаарыылаах көрсүһүүгэ арассыыйалар иранецтары бэрт холкутук 9:1 ахсаанынан кыайдылар. Маннык аһары баһыйыыны ким даҕаны кэтэспэтэх буолуохтаах. Үөрүүлээҕэ баар, кыайыылаах аатын быһаарар киирсиигэ тириэньэрдэр биһиги бөҕөстөрбүтүн Арыйаан Тютрины уонна Виктор Рассадины састаапка киллэрбиттэрин, биир дойдулаахтарбыт түһэн биэрбэтилэр.

Арыйаан Тютрин бэйэтин дьиэтигэр өрүү ситиһиилээхтик кыттааччы. Ону “Триумфка” ыытыллыбыт Арассыыйа чөмпүйэнээттэригэр итэҕэтэн турар. Бу да сырыыга сүрдээх эрэллээхтик, кыахтаахтык кытынна. Кини утарсааччыта Алиреза Сарлак бу иннинэ монголу, американеһы уонна грузины кыайталаан, үчүгэй өйдөбүлү хаалларбыта. Ол да буоллар, биһиги бөҕөспүт сүрдээхтик аһыллан тустан, түмүккэ 11:2 ахсаанынан кыайыыны ситиһэн, хамаанда ситиһиилээхтик кыттарыгар ааны арыйан биэрдэ. Атыттар кини ылбыт тэтимин быспакка, утуу-субуу кыайталаан бардылар. Ол иһигэр, бу улахан таһымнаах күрэхтэһиигэ иккис кыттааччыбыт Виктор Рассадин (65 кг) Иран күүстээх бөҕөһө Хассанали Гиаси Чеканы ууга-уокка түһэртээн, 10:2 ахсаанынан баһыйа тутта. Манна даҕатан эттэххэ, Тютриннаах Рассадин иккиэн тириэньэр Иван Дмитриев салалтатынан дьарыктаналлар.

Күрэхтэһии хаамыытын барытын сиһилии сырдаттылар. Онон ону хатылыы барбаппын. Арай, наҕараадалааһыны билиһиннэриэхпин баҕарабын. Ол туһунан билиҥҥитэ кэпсии иликтэр быһыылаах.

Тыыннаах сибэккинэн киэргэтиллибит наҕараадалыыр түһүлгэҕэ бастаан Саха Өрөспүүбүлүкэтин Аҕа баһылыга Айсен Николаев, Тустуу аан дойдутааҕы түмсүүтүн (UWW) бэрэсидьиэнэ Ненад Лалович, Арассыыйа спортивнай тустууга федерациятын бэрэсидьиэнэ Михаил Мамиашвили тахсан, аан дойду Кубога ситиһиилээхтик түмүктэммитинэн эҕэрдэлээтилэр. Айсен Николаев, күрэхтэһии үрдүк тэрээһиннээхтик ыытыллыбытын бэлиэтээтэ. Арассыыйа хамаандата кыайыылааҕынан тахсыбытынан эҕэрдэлээтэ. Итиэннэ син эмиэ 1973 сыллаахха биһиги албан аатырбыт бөҕөстөрбүт Роман Дмитриев уонна Павел Пинигин маннык түһүлгэҕэ кыайбыттарын курдук, Арыйаан Тютрин, Виктор Рассадин кинилэр ситиһиилэрин хатылаабыттарын санатта. Оттон Ненад Лалович бастатан туран, күрэхтэһии өрө күүрүүлээхтик ыытыллыбытынан – көрөөччүлэргэ, тустууну таптааччыларга махтанна. Михаил Мамиашвили аан дойду Кубога хаһааҥҥытааҕар даҕаны үрдүк тэрээһиннээхтик ыытыллыбытын билиннэ, маннык таһым аны хаһан куоһарылларын ыйда.

Ити курдук кылгас эҕэрдэлээһин кэнниттэн Айсен Николаев, аан дойду Кубога ситиһиилээхтик түмүктэммитинэн – Ненад Лаловичка, Саха сирин көҥүл тустууга хамаандатын судаарыстыбаннай тириэньэрэ, спорт үтүөлээх маастара Петр Юмшановка, Михаил Мамиашвилига, Арассыыйа спортивнай тустууга федерациятын вице-бэрэсидьиэнэ Георгий Брюсовка, Японияттан кэлбит бочуоттаах ыалдьыттар – олимпийскай чөмпүйүөннэр Юдзи Такадаҕа, Хидеаки Томиямаҕа өрөспүүбүлүкэ наҕараадаларын туттарда.

Ненад Лалович эмиэ кэһиилээх кэлбит. Кини Тустуу аан дойдутааҕы түмсүүтүн өйдөбүнньүк бэлэхтэрин – Айсен Николаевка, Петр Юмшановка, өрөспүүбүлүкэ спортивнай тустууга федерациятын вице-бэрэсидьиэнэ, спорт үтүөлээх маастара Виктор Лебедевкэ туттартаата.

Михаил Мамиашвили даҕаны хаалсыбата. Арассыыйа спортивнай тустууга федерациятын бэлэҕин – Саха сирин спортивнай тустууга федерациятын бастакы вице-бэрэсидьиэнэ Семен Березиҥҥэ үөрүүлээх быһыыга-майгыга туттарда.

Дьэ, ол кэнниттэн маҥнай үһүс миэстэлэммит АХШ хамаандатын пьедесталга ыҥыран, боруонса мэтээллэри итиэннэ бириис быһыытынан 20 тыһыынча доллардаах сертификаты – Тустуу аан дойдутааҕы түмсүүтүн бюротун чилиэннэрэ Ахрол Рузиев (Узбекистан), Наталья Ярыгина (Арассыыйа) туттардылар.

Ити курдук, иккис миэстэлээх Иран хамаандатыгар үрүҥ көмүс мэтээллэр, 30 тыһыынча доллар суумалаах сертификат, бастакы миэстэни ылбыт Арассыыйа хамаандатыгар кыһыл көмүс мэтээллэр, 50 тыһыынчалаах доллардаах сертификат уонна Кубок туттарылынна.

Петр ПАВЛОВ.

Ааптар хаартыскаҕа түһэриилэрэ.       

 

Добавить комментарий

Ваш e-mail не будет опубликован. Обязательные поля помечены *