Кубокка – Арассыыйа, куонкуруска – Обулахов!

“Саха сирэ” хаһыат спорка аналлаах “Дьулурҕан” сыһыарыыта көҥүл тустууга аан дойду Кубогар анаан анал бэчээтинэй бородууксуйа оҥорон таһаарбыта. Онно, тустууну сэҥээрээччилэргэ куонкурус биллэриллибитэ. Бэрт кылгас кэмҥэ биллэриллибит куонкуруска 20 киһи кыттыбыта.

Кыттыбыт дьон билгэлээһиннэрин – Кубок түмүгүн кытта тэҥнээн көрөн баран, кыайыылааҕы быһаардыбыт. Онуоха, 8 очукуону ылан кыайыылааҕынан тустуу бэриниилээх ыалдьааччыта Василий Николаевич Обулахов буолла. Кини Россия бастакы, Иран иккис, Япония төрдүс, Куба бэһис, Грузия сэттис уонна Турция ахсыс миэстэлэри ылыахтара диэн сөпкө сылыктаабыт. Иккис ыйытыыга, финалга Россия уонна Иран тахсаллар диэн сөпкө эппит. Онон хас биирдии сөптөөх хоруйга биирдии очукуону хомуйан, түмүккэ аҕыс очукуоланна. Василий Обулаховы – көҥүл тустууга аан дойду Кубогар ананан ыытыллыбыт куонкурус кыайыылааҕа буолбутунан эҕэрдэлиибит!

Ырытан көрдөххө, Валерий Гаврильев уонна Илларион Николаев кыайыылаахтан биирдии очукуонан хаалан, иккис көрдөрүүлэннилэр уонна тустууну ымпыктаан-чымпыктаан билэллэрин көрдөрдүлэр. Ити курдук, олимпийскай чөмпүйүөн П.Пинигин бирииһигэр күрэхтэһиигэ кытта кэлбит Казахстан хамаандатын тириэньэрэ Асан Камтанов, Алексей Никулин, Иван Борисов – 6-лыы очукуону хомуйан куһаҕана суох көрдөрүүлэннилэр.

Кыттыбыт дьон бары 100% Арассыыйа хамаандата бастыа диэбит. Финалга Арассыыйа уонна Иран хамаандалара көрсүөхтэрэ диэн В.Е. Гаврильев, М.Е. Постников, В.Н. Обулахов, И.Н. Николаев, В.В. Дьячковскай, Г.И. Иванов, П.Е. Эверстов, И.И. Борисов – сөпкө билгэлээбиттэр. Оттон финал ханнык ахсаанынан түмүктэнэрин ким даҕаны таайбатах.

Кыайыылаах бу күннэргэ өйдөбүнньүк бирииһинэн наҕараадаланыаҕа.

“Дьулурҕан”.

 

Добавить комментарий

Ваш e-mail не будет опубликован. Обязательные поля помечены *