Арыйан кыайыыга ааны аста

Көҥүл тустууга аан дойду Кубогын бастакы күнэ түмүктэннэ. Биллэрин курдук, былырыын Будапештка (Венгрия) буолбут аан дойду чөмпүйэнээтин түмүгүнэн талыллыбыт аҕыс бастыҥ көрдөрүүлээх хамаанда аан дойду Кубогар кыттар. Кинилэр сэрэбиэй быһыытынан икки бөлөххө араарыллан кииристилэр. Ол курдук, бастакы бөлөххө Арассыыйа, Япония, Куба, Турция, оттон иккис бөлөххө Иран, АХШ, Монголия, Грузия.

Хамаандалар кулун тутар 16 күнүгэр иккилии эргиири аастылар. Арассыыйа хамаандата кубалары кытта көрүстэ. Онуоха хамаанда тириэньэрдэрэ бастакы ыйааһыҥҥа биһиги биир дойдулаахпыт Арыйан Тютриҥҥа итэҕэйдилэр. Үөрүүлээҕэ баар, бөҕөспүт ити итэҕэли түһэн биэрбэтэ. Иллэрээ сыл 23-гэр диэри саастаах бөҕөстөргө аан дойду күрэхтэһиитин кыайыылааҕа, Америка континенын чөмпүйүөнэ, былырыыҥҥы аан дойду чөмпүйэнээтигэр бэһис миэстэлээх Рейнери Андреу Ортеганы 8:3 ахсаанынан итэҕэтиилээхтик кыайан, сааланы толору мустубут тустууну таптааччылары үөртэ.

Бу көрсүһүүгэ кыайыыны арассыыйалар 9:1 ахсаанынан ситиһэн, Кубокка кыттыыларын үчүгэйдик саҕалаатылар. Манна, 65 киилэҕэ кубинец Алехандро Вальдес эчэйиилээх буолан, Гаджимурад Рашидовка кыайыы быһа бэрилиннэ. Кубинецтартан арай, аан дойду чөмпүйүөнэ Йовлис Бонне – Зелимхан Абакаровы 5:5 ахсааҥҥа, хаачыстыбанан кыайан, бэйэтин хамаандатыгар соҕотох очукуону аҕалла. Хамаанда хапытаана, аан дойду чөмпүйүөнэ Заурбек Сидаков ыраас кыайыыны ситистэ. Оттон Давид Баев, Хусейн Суюнчев, Зелимхан Хизриев – очукуонан ыраастык кыайдылар. Даурен Куруглиев утарсааччытын 4:0, Магомед Курбанов 9:7, Владислав Байцаев 4:0 ахсаанынан хоттулар.

Иккис эргииргэ арассыыйалар дьоппуоннары кытта көрүстүлэр. Бу сырыыга бастакы ыйааһыҥҥа Муслим Садулаев туһунна. Кини аан дойду чөмпүйэнээтин кыһыл көмүс уонна боруонса мэтээллэрин хаһаайына Юки Такахашига хотторон кэбистэ. Иккис ыйааһыҥҥа Зелимхан Абакаров устудьуоннарга аан дойду чөмпүйүөнэ Юдай Фуджитаҕа баһыйтарда. Итинтэн ыла кыайыыны наар Арассыыйа бөҕөстөрө ситистилэр. Санаабытыгар 65 киилэҕэ тириэньэрдэр биһиги Виктор Рассадиммытын кытыннараллара буолуо диэбиппит, бу да сырыыга Гаджимурад Рашидов киирдэ. Кини Дайчи Такатанины очукуонан ыраастык хотон, үчүгэй таһымҥа сылдьарын көрдөрдө. Атын ыйааһыннарга Анзор Закуев, Тимур Бижоев, Хусейн Суюнчев, Магомед Рамазанов, Владислав Валиев, Алихан Жабраилов, Владислав Байцаев, Павел Кривцов кыайыыны ситистилэр.

Аан дойду Кубогын бастакы күнүн көрдөрүүтэ:     

“А” бөлөх: Арассыыйа – Куба 9:1, Япония – Турция 8:2, Арассыыйа – Япония 8:2, Куба – Турция 6:4.

Б” бөлөх: АХШ – Грузия 7:3, Иран – Монголия 9:1, АХШ – Иран 5:5+, Грузия – Монголия 5:5+.

Аны сарсын үһүс туурга “А” бөлөххө Россия – Турция, Куба – Япония, “Б” бөлөххө АХШ – Монголия, Иран – Грузия хамаандалара көрсүөхтэрэ. Манна биири бэлиэтиэххэ сөп, туроктары кытта көрсүһүүгэ тириэньэрдэр биһиги бөҕөстөрбүтүн Арыйан Тютрины уонна Виктор Рассадины туһуннаралларыгар эрэнэбит. Ол эрээри, туроктар 65 киилэҕэ кыттааччылара суох буолан, көрсүһүү инниттэн арассыыйалар биир кыайыыны быһа суруналлар. Оччоҕо, Рассадины көбүөргэ салгыы түһүмэххэ, финалга эрэ көрүөхпүтүн сөп. Ол гынан баран, ону барытын тириэньэрдэр быһаараллар.

Дьэ, ол кэнниттэн бөлөхтөргө бастаабыттар уопсай түмүккэ бастакы, иккистээбиттэр – үһүс, үһүстээбиттэр – бэһис уонна төрдүстээбиттэр – сэттис миэстэлэри былдьаһыахтара.

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *