Дзамболат Тедеев: “Садулаева даҕаны суох кыайыахпыт”

Арассыыйа көҥүл тустууга хамаандатын кылаабынай тренерэ Дзамболат Тедеев сүргэтэ көтөҕүллүбүт, настарыанньалаах. Оннооҕор, пресс-конференция кэмигэр наҕараада мэтээллэрин билиһиннэриигэ, остуолга олорооччулар биирдии-биирдии мэтээллэри ылан илиилэригэр тутан-хабан көрүүлэригэр, тоҕо эрэ Дзамболат Ильичкэ “кыһыл көмүс” мэтээл тигистэ. Бу, үчүгэй бэлиэ.   

-Дьокуускай ыалдьытымсаҕын өссө төгүл көрдөрдө, – диир Д.И. Тедеев. – Аэропортан саҕалаан куораты киэргэппиттэр, улахан күрэхтэһии тыына биллэр. Кырдьык, аан дойду Кубогын иһин хабыр хапсыһыылар ыытыллыахтара. Былырыын биһиги хамаандабытын Америка холбоһуктаах штаттарыгар буолбут күрэхтэһиигэ көҥүллээбэтэхтэрэ. Оттон бүгүн, Дьокуускайга кэлиэхтээх хамаандалар бары кэллилэр. Манан сибээстээн мин этиэхпин баҕарабын, спорт бэлиитикэ таһыгар буолуохтаах.

Биир суруналыыс ойон туран, хамаанда састаабыгар киирбит Арыйан Тютрин уонна Виктор Рассадин туһунан ыйыппытыгар, Дзамболат Тедеев, бастатан туран, биһиги хамаандабытыгар омугунан арахсыы суох диэн эттэ. Тютриннаах Рассадин бастатан туран, россияннар диэтэ. Саха сирэ – Россия биир субъега буоларын санатта.

Оттон тоҕо, атын хамаандалар ситэтэ суох састаабынан кыттар буоллахтарына, Арассыыйа толору састаабынан кыттарын туһунан туоһуласпыттарыгар, Д.И. Тедеев: “Аан дойду Кубога биһиги дойдубутугар, Арассыыйаҕа ыытыллар. Онон түгэни туһанан, толору састаабы туруордубут. Хамаандаҕа уопуттаах тустууктары тэҥэ, маннык таһымҥа саҥа кыттар тустууктар бааллар. Биһиги кинилэргэ, талааннарын арыйалларыгар кыах биэрэбит. Хомойуох иһин, хамаанда хапытаана, олимпийскай чөмпүйүөн Абдулрашид Садулаев эрчиллии кэмигэр эчэйии ылан, Кубокка кыттыбат буолла. Кини оннугар Расул Магомедов тустуоҕа. Садулаева даҕаны суох кыайыахпыт. Хапытаанынан аан дойду чөмпүйүөнэ Заурбек Сидаковы таллыбыт.

Тютриннаах Рассадин кимнээҕи кытта киирсиэхтэрин сөбүй диэн ыйытыыга кылаабынай тренер, күрэхтэһии хаамыытыттан көрөн киллэриэхпит, саха тустууну таптааччыларын үөрдүөхпүтүн баҕарабыт.

Оттон финалга ханнык хамаанданы кытта көрсүөххүтүн сөбүй диэбиттэригэр, биһиэхэ син биир, ханнык баҕарар хамаанданы кытта киирсэр. Манна аан дойду аҕыс бастыҥ хамаандата кэлбитин, бары күүстээхтэрин эттэ.

Өскөтүн Саха Өрөспүүбүлүкэтин баһылыга Айсен Николаев уонна тустууга эппиэттээх Виктор Лебедев ыҥырдахтарына, Токиотааҕы Олимпиадаҕа бэлэмнэниини эһиги өрөспүүбүлүкэҕитигэр тэрийиэхпитин сөп. Тоҕо диэтэргит, Саха сирэ уонна Япония биир эргимтэҕэ сытар диэтэ. Итиэннэ бу көрсүһүүгэ Дзамболат Тедеев, урукку курдук, Арассыыйа уонна АХШ тустууга хамаандаларын табаарыстыы көрсүһүүлэрин сөргүтэргэ ыҥырбытын сөбүлүү иһиттим.

Петр ПАВЛОВ.

Ааптар хаартыскаҕа түһэриитэ.

Добавить комментарий

Ваш e-mail не будет опубликован. Обязательные поля помечены *