Сиэдэрэй оҥоһуулаах мэтээллэр хаһаайыннарынан ханнык хамаандалар буолуохтарай?

Бүгүн, Өрөспүүбүлүкэтээҕи Медиа-кииҥҥэ көҥүл тустууга аан дойду Кубогын иннинээҕи пресс-конференция ыытылынна. Бу тэрээһин кэмигэр Саха Өрөспүүбүлүкэтин Спорка уонна физическэй култуураҕа миниистирэ Иннокентий Григорьев суруналыыстарга уонна мустубут дьоҥҥо – Кубокка ананан оҥоһуллубут мэтээллэри билиһиннэрдэ.

Бу сиэдэрэй бэйэлээх наҕарааданы норуот маастара Диана Баишева айан таһаарбыт. Кинини биһиги, мас-рестлинг уонна хапсаҕай күрэхтэһиилэригэр анаан оҥорбут мэтээллэринэн, атын ханнык даҕаны маастарга маарыннаабат буочардааҕынан билэбит. Кырдьык, кэрэ оҥоһуктар диэххэ сөп. Манан, Диана Баишева туспа суоллаах-иистээх маастар буоларын итэҕэттэ.

Мэтээллэр сахалыы тыыннаахтар, оһуордаахтар, уопсай көстүүтэ чорооҥҥо маарынныыр. Ортотугар эһэлэр хапсыһа сылдьаллара ойууламмыт, ол биһиэхэ – модун Арассыыйаны уонна Саха сирин санаталлар. Москва ювелирнай тэрилтэтигэр оҥоһуллубуттар. Сэрэйбиккит курдук, мэтээллэр кыһыл көмүс, үрүҥ көмүс уонна боруонса өҥнөөхтөр уонна туһааннааҕынан – бастакы, иккис уонна үһүс миэстэлээх хамаандаларга бэриллэллэр.

Дьэ, маннык сиэдэрэй оҥоһуулаах мэтээллэринэн ханнык хамаандалар наҕараадаланыахтарай? Ону билэрбит олох аҕыйах кэм хаалла.

Петр ПАВЛОВ.

Ааптар хаартыскаҕа түһэриитэ.

Добавить комментарий

Ваш e-mail не будет опубликован. Обязательные поля помечены *