Роман Михайлович Дмитриев сырдык уобараһа куруук биһиги сүрэхпитигэр…

Хоһоон ааҕыы

Быйыл кулун тутар 7 күнүгэр ХХ үйэҕэ көҥүл тустуу саамай чаҕылхай тустууктарыттан биирдэстэрэ, олимпийскай чемпион, аан дойду уонна Европа чемпиона,  көҥүл тустууга ССРС  алта төгүллээх чемпиона, Сэбиэскэй Сойуус  үтүөлээх тренерэ, Ил Түмэн депутата, Государственнай Думаҕа бэрэстэбиитэлэ Роман Михайлович Дмитриев төрөөбүтэ 70 сылын үөрүүлээхтик бэлиэтээтибит.

Биһиги училищебыт 2011 сылтан олимпийскай чемпион Роман Михайлович Дмитриев аатын чиэстээхтик сүгэр. Училищебыт бибилэтиэкэтэ уонна тыл предметтэрин түмсүүтэ бу бэлиэ түгэҥҥэ аналлаах олус сэргэх тэрээһиннэри ыытта.

Олунньу 12 күнүгэр үөрэнээччилэр уонна устудьуоннар икки ардыларыгар улуу киһибит туһунан хоһооннору ааҕааччы киэҥ араҥатыгар сырдатар, кини аатын үйэтитэр, айымньылаах үлэҕэ уһуйар сыаллаах уус-уран ааҕыы күрэҕин тэрийдибит. Айымньы ис хоһооно тиэмэҕэ сөп түбэһиитэ, истээччигэ тиэрдиитэ, уус-уран ааҕыыны толоруу маастарыстыбата, сонун көстүү, сценическай култуура  сыаналанна.

Дьоро күҥҥэ хоһоон кэһиилээх ыалдьыппыт Афанасий Ануфрьев, М.К. Аммосов аатынан ХИФУ 1-кы кууруһун устудьуона, «Көтүөххэ үрдүккэ хотойдуу» Өрөспүүбүлүкэтээҕи Уоланнар ааҕыыларын кыайыылааҕа,  В.Петров-Бордоҥ Болуодьа «Сахалар өйдүүбүт өрүүтүн» хоһоонун олус иэйиилээхтик  аахпытын көрөөччү ытыс тыаһынан көрүстэ.

Михаил Афанасьев «Олимпийскай чемпион Роман Дмитриевкэ», Семен Садовников «Эр бэрдэ», Михаил Тимофеев «Ол күн»,  Варвара Аполлонова «Сулус буолан умайдыҥ», Римма Казакова «Чемпион» о.д.а. хоһооннор биир-биир дуорайдылар. Оҕолор олус өрө көтөҕүллүүлээхтик, долгутуулаахтык аахтылар.

Күрэх түмүгүнэн «Бастыҥ ааҕааччы» бэлиэнэн  9-с кылаас үөрэнээччитэ Сардаана Жиркова уонна 10-с кылаас үөрэнээччитэ Валерия Федотова ааттаннылар.

Бөлөҕүнэн ааҕыыга 1-кы миэстэни 9-с кылаас үөрэнээччилэрэ уонна 3(9) устудьуоннара ыллылар.

«Бэйэ оонньуута»

Роман Михайлович Дмитриев үөрэххэ дьаныара, спорка тулхадыйбат дьулуура, өйө-санаата, маастарыстыбата, опыта үгүс сылларга эдэр ыччакка үтүө холобур буолар. «Роман Дмитриев оҕо сааһа», «Чурапчыга үөрэммит сыллара», «Дьиэ кэргэнэ», «Олимпиада», «Общественнай үлэтэ», «Р.Дмитриев туһунан» диэн түһүмэхтэрдээх “Бэйэ оонньуута” нэдиэлэни түмүктээтэ.

Күрэх олус сэргэхтик, тыҥааһыннаахтык ааста. Хас биирдии кыттааччы, көрөөччү Роман Михайлович Дмитриев физкультура, спорт сайдарын туhугар үлэлээн кэлбит олоҕун, спортивнай албан аатын, килбиэннээх кыайыыларын билэллэрин көрдөрдүлэр. Спорду өрө тутар, чөл олоҕу дьоҥҥо-сэргэҕэ көҕүлүүр устудьуоннар хамаандалара кыайыы өрөгөйүн биллилэр.

Саха норуотун аар-саарга аатырдыбыт улуу бөҕөс, Роман Дмитриев аата-суола саха тыллаах баарын тухары аата үйэлэргэ ааттана туруоҕа! Тырым тыыннанан тыллан, сайдан, салҕанан бардын Улахан киһибит туһунан айымньылар. Роман Михайлович спорка кыайыылара, олоххо ситиһиилэрэ биһигини саҥа кыайыыларга сирдии туруоҕа.

Алла СИВЦЕВА, Р.М. Дмитриев аатынан Олимпийскай эрэл училищетын бибилэтиэкэрэ.

 

 

Добавить комментарий

Ваш e-mail не будет опубликован. Обязательные поля помечены *