Дьоппуоннар айаннаан иһэллэр

Кулун тутар 16-17 күннэригэр Дьокуускайга ыытыллар көҥүл тустууга аан дойду Кубогар былырыыҥҥы аан дойду чемпионатын түмүгүнэн аҕыс бастыҥ көрдөрүүлээх хамаанда кыттар. Ити чөмпионакка дьоппуоннар – Россия, АХШ, Грузия, Куба хамаандаларын кэнниттэн төрдүс буолбуттара.

Быйылгы Кубокка кинилэр күүстээх састаабынан кытталлар. Ол курдук, састаапка Саҥа дьыл аҕай иннинэ ыытыллыбыт дойду чемпионатын кыайыылаахтара киирдилэр. Өссө аан дойду чемпиона Такуто Отогуро (65 кг) кэлиэхтээҕин, атаҕар эчэйиилээх буолан кэлбэтэ.

Онон, Тахсар күннээх дойду быйылгы Кубокка маннык састаабынан кыттар: Такахаши Юки (57 кг), Фуджита Юдай (61 кг), Такатани Даичи (65 кг), Шига Кодзиро (70 кг),  Фудзинами Юхи, Юта Мива (74 кг), Абе Юта (79 кг), Такатани Сосукэ (86 кг), Мацумото Ацуши (92 кг), Акагума Наоя (97 кг), Аракида Нобуёси (125 кг), Канадзава Кацутоши (125 кг).

Көрөргүт курдук, састаапка аан дойду чемпиона Юки Такахаши, аан дойду чемпионатын призердара Юхи Фудзинами, Сосуке Такатани, Ацуши Мацумото курдук күүстээх тустууктар бааллар.

Хамаанда салайааччыта Косеи Акаиши, кылаабынай тренер – Кэндзи Иноуэ, тренердэр: Киотака Кодаира, Сёго Маэда. Оттон бочуоттаах ыалдьыттарынан олимпийскай чемпионнар Юджи Такада, Хидеаки Томияма буолуохтара.

Санатан эттэххэ, былырыыҥҥы Кубокка дьоппуоннар үһүс бириистээх миэстэни ылбыттара. Дьокуускайдааҕы Кубокка кинилэр Россия, Куба, Турция хамаандаларын кытта биир бөлөххө киирсэллэр.

Петр ПАВЛОВ.

Дьоппуоннар айаннаан иһэллэр: 6 комментариев

  1. Петр

    Отогуро суох эбит, Сохсуке кэлбит. Япония федерациятын сайтыгар састаап уонна фото тахсыбыт.

  2. Петр

    Бочуоттаах ыалдьыттар Юдзи Такада уонна Хидеаки Томияма сарсын кэлэллэр.

Добавить комментарий

Ваш e-mail не будет опубликован. Обязательные поля помечены *