Роман Дмитриев турнирыттан – 9 мэтээл!

Олимпиада кыһыл уонна үрүҥ көмүс мэтээллэрин хаһаайына, аан дойду, Европа, ССРС чемпиона, Сэбиэскэй Сойуус үтүөлээх маастара уонна тренерэ Роман Михайлович Дмитриев кэриэһигэр 1999-2001 сс. төрөөбүт эдэр бөҕөстөр норуоттар икки ардыларынааҕы VII турнирдара ситиһиилээхтик ыытыллан түмүктэннэ. Эрдэ суруйбуппут быһыытынан бу түһүлгэҕэ 13 дойдуттан 130-ча кыттааччы күөн көрүстэ. Ол курдук, ыйааһыннарынан ылан көрдөххө: 57 кг – 38, 61 кг – 18, 65 кг – 21, 70 кг – 13, 74 кг – 9, 79 кг – 13, 86 кг – 9, 92 кг – 4, 97 кг – 4, 125 кг – 6 кыттааччы. Онон үс ыарахан ыйааһыҥҥа кыттааччы аҕыйах буолан, күрэхтэһии эргиир систиэмэтинэн ыытылынна итиэннэ ити ыйааһыннарга икки оннугар – биирдии боруонса мэтээл оонньонно.

Турнир биир уратытынан, хапсыһыылар урукку курдук үс көбүөрүнэн буолбакка – икки көбүөрүнэн ыытылыннылар. Тоҕо диэтэргит, оруобуна биир нэдиэлэнэн манна аан дойду Кубога ыытылларынан, Роман Дмитриев турнира – кубок балаһыанньатыгар олоҕуран ыытылынна. Күрэхтэһии хаамыытын Россия спортивнай тустууга федерациятын көҕүлээһининэн wrestrus.ru сайт үлэһиттэрэ кэлэн, бүтүн дойду үрдүнэн телевизорынан уонна интернетинэн быһа биэриилэри оҥордулар.

Бастакы финаллар күн биһиги бөҕөстөрбүт биэс мэтээллэммит эбит буоллахтарына, иккискэ – икки үрүҥ көмүс, икки боруонса мэтээли ылары ситистилэр. Онон түмүккэ, Роман Дмитриев VII турнирыгар Саха сирин хамаандата тоҕус мэтээллэннэ. Бу үчүгэй көрдөрүү диэххэ сөп. Тэҥнээн көрдөххө, былырыын биир кыһыл көмүс, биир үрүҥ көмүс, биэс боруонса мэтээллээх этибит. Санатан эттэххэ, балаһыанньа быһыытынан, бастаабыттар – 70, иккистээбиттэр – 50, үһүстээбиттэр – 40 уонна кыайыылааҕы бэлэмнээбит тренердэр – 40 тыһыынча солкуобайдаах сертификатынан наҕараадаланнылар.

Бу күн финалга икки уолбут кытынна. Константин Капрынов уонна Петр Кириллин төһө даҕаны хоттордоллор, дьоһун утарсыыны оҥорбуттарын бэлиэтиир оруннаах. Капрыновка кыра тиийбэтэ, тэбис-тэҥҥэ анньыһа сылдьан, бүтэһик сөкүүндэҕэ кииртэлээн биэрэн, кыл-мүччү хоттордо. Атыттар туох дии саныыллара буолла, оттон Капрыновтаах Кириллин үчүгэйдик туһуннулар. Бэйэлэрин баалларын биллэрдилэр. Онон кинилэргэ болҕомтону күүһүрдэн, сайдалларыгар күүс-көмө, өйөбүл буоллахха уонна уолаттар бэйэлэрэ дьарыктарыгар эппиэтинэстээхтик сыһыаннастахтарына, элбэҕи ситиһэр кыахтаахтарын көрдөрдүлэр.

Бу күн өссө Никита Софронов көрөөччүлэри үөртэ. Кини 70 киилэҕэ үһүс бириистээх миэстэ иһин киирсиигэ Аюбхан Сайдалхановы (Россия) 6:1 ахсаанынан кыайан, тустууну таптааччылары сэргэхситтэ. Манна даҕатан эттэххэ, бу күрэхтэһиигэ Семен Архипов баһылыктаах “Албан” фан-кулууп кыттыылаахтара күргүөмүнэн оҥостон кэлэн, биир дойдулаах тустууктарбытыгар көх-нэм буолбуттарын, итинэн уопсайынан күрэхтэһии сэргэхтик ыытыллыытыгар күүс-көмө буолбуттарын бэлиэтиир оруннаах. Ол курдук, албаннар араас үрэр тэриллээх, былаахтаах, бэл баяннаах кэлэннэр, дьиҥнээх спорт бырааһынньыгын үөскэттилэр. Ити курдук, аны көҥүл тустууга аан дойду Кубогар көхтөөхтүк оҥостон кэлэн, киһи сүргэтин көтөҕөн – түһүлгэ таһымын үрдэтэллэригэр, бырааһынньыктыы быһыыны-майгыны үөскэтэллэригэр баҕарыаҕыҥ!

Турнир түмүгүнэн Дмитрий Куприн (Кемерово), Эдуард Максимов (Саха сирэ) уонна Курбан Шираев (Дагестан) үчүгэй тустууну көрдөрөн, анал бириистэринэн наҕараадаланнылар. Маны тэҥэ, Курбан Шираев – түһүлгэ бастыҥ бөҕөһүнэн ааттанан, Роман Михайлович Дмитриев дьиэ кэргэнэ олохтообут анал бирииһинэн бэлиэтэннэ. Бирииһи Антонина Софроновна Дмитриева туттарда.

Дьэ, ити курдук, дьон барыта аан дойду Кубогын кэтэһэ сылдьар кэмигэр – үгэс быһыытынан ыытыллар Роман Дмитриев турнира үрдүк таһымнаахтык тэрилиннэ. Хайдах эрэ улуу тустуукпут, улахан түһүлгэ ситиһиилээхтик ыытылларыгар мэктиэлээбитин курдук буолла.

Түһүлгэ үһүс күнүн түмүгэ:

61 кг: 1. Ибрагим Абдурахманов (Россия, Дагестан), 2. Константин Капрынов (Россия, Саха сирэ), 3. Кежик Монгуш (Россия, Тыва), 3. Тэгсжаргал Эрдэнэбат (Монголия).


70 кг: 1. Рамазан Якубов (Россия, Красноярскай), 2. Петр Кириллин, 3. Никита Софронов (иккиэн – Россия, Саха сирэ), 3. Бямбадорж Энхбаяр (Монголия).


79 кг: 1. Амхад Ташухаджиев (Россия, СПб-Чечня), 2. Халид Яхьев, 3. Юсуп-Хаджи Айдаев (Россия, иккиэн – Чечня), 3. Абубакр Абакаров (Азербайджан).


92 кг: 1. Адженияз Сапарниязов (Узбекистан), 2. Асхаб Гамзатов (Азербайджан), 3. Юрий Иванов (Россия, Иркутскай).


125 кг: 1. Оганес Магакян, 2. Ашот Рушанян (иккиэн – Армения), 3. Эдуард Максимов, 4. Никита Хабаров (иккиэн – Россия, Саха сирэ).

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *