Бастакы финалларга – биэс мэтээллээхпит!

Сахаттан бастакы олимпийскай чемпион, улуу тустуук Роман Дмитриев кэриэһигэр үгэс быһыытынан ыытыллар норуоттар икки ардыларынааҕы турнирга быйыл 13 дойдуттан 130-ча эдэр бөҕөс күөн көрүстэ.

Быйылгы турнир биһиги киэн туттар киһибит – Роман Михайлович Дмитриев төрөөбүтэ 70 сылыгар ананан ыытыллар. Онон аҥардас күрэхтэһиинэн эрэ муҥурдаммакка, араас тэрээһиннэр, дьаһаллар, кэриэстиир-сүгүрүйэр түгэннэр ыытылыннылар. Холобурдаан эттэххэ, научнай-практическай конференция, пресс-конференция, ахтыы киэһэтэ, пааматынньык-сквергэ кэриэстэбил… буоллулар. Турнирга бочуоттаах ыалдьыт быһыытынан олимпийскай чемпионнар Александр Иваницкай, Валентин Йорданов (Болгария), олимпийскай призердар Владислав Стецик (Польша), Радослав Великов (Болгария), Роман Михайлович огдообото – Антонина Дмитриева уонна оҕолоро сырыттылар.

Күрэхтэһиини үөрүүлээхтик аһыыга Саха Республикатын Аҕа баһылыга, тустуу федерациятын президенэ Айсен Николаев, кыттааччыларга ситиһиилэри баҕаран туран, турниры аһыллыбытынан аахта. Оруобуна биир нэдиэлэнэн, кулун тутар 16-17 күннэригэр манна, “Триумф” Спорка бэлэмнэнии киинигэр көҥүл тустууга аан дойду Кубога буоларын санатта. Бу күрэхтэһиини көрсө, Россия хамаандатын састаабыгар Саха сириттэн Арыйаан Тютрин уонна Виктор Рассадин киирбиттэрин иһитиннэрдэ. Итиэннэ үөрүүлээх быһыыга-майгыга республика салалтатын наҕараадаларын туттарда. Ол курдук, Антонина Софроновна Дмитриеваҕа, олоҕун доҕоро – Роман Михайлович Дмитриев аатын үйэтитиигэ ахсаабат үлэни ыытарын иһин “Гражданскай килбиэн” бэлиэни, оттон турнир бочуоттаах ыалдьыттара, олимпийскай чемпионнар Александр Иваницкайга уонна Валентин Йордановка – Саха Республикатын Аҕа баһылыгын Махтал бэлиэлэри туттарда.

Россия спортивнай тустууга федерациятын толорооччу дириэктэрэ Александр Деревянко, бүгүн, Тустуу аан дойдутааҕы түмсүүтүн (UWW) штабыттан, Швейцарияттан аҕалыллыбыт, буолаары турар көҥүл тустууга аан дойду Кубогын туттарда. Бу Кубок иһин, аан дойду аҕыс күүстээх хамаандата күөн көрсүөҕэ.

Кылгастык тустууну сырдаттахха, бастакы финаллар түмүктэринэн, уолаттарбыт үчүгэй көрдөрүүлэннилэр. Бастакы ыйааһыҥҥа Роман Дмитриев биир дойдулааҕа, Эдьигээн ыччата, 18 саастаах Айсиэн Винокуров кыайыыны ситиһэн, албан аатырбыт биир дойдулааҕа 70 сааһыгар дьоһун бэлэҕи оҥорон, улууһун дьонун үөртэ. Кыайыылаах аатын ылар бүтэһик быһаарыылаах хапсыһыыга кини Россия эдэрдэргэ сүүмэрдэммит хамаандатын чилиэнэ спорт маастара Петр Копыловы 3:1 ахсаанынан хотто. Манна сыһыары тутан эттэххэ, Айсиэн соторутааҕыта номох буолбут бөҕөс Николай Захаров-Сахаачча кэриэһигэр республика эдэрдэргэ күрэхтэһиитин финалыгар 61 киилэҕэ кыттан, финалга Петр ини-биитэ Алексей Копыловы эмиэ кыайбыта.

Биллэрин курдук, Копыловтар уонна Айсиэн Винокуров Мэҥэ Хаҥаласка, Харатааҕы спортивнай лицейгэ бииргэ үөрэммиттэрэ, тренер Яков Филиппов салалтатынан дьарыктаналлар. Билигин кинилэр төрдүөн тутуспутунан Р.М. Дмитриев аатынан Олимпийскай эрэл училищетыгар киирэн үөрэнэ, эрчиллэ сылдьаллар. Туох буолуой, спорт аата – спорт, бүгүн – эн, сарсын – кини. Барыта дьарыкка сыһыантан, бэйэ туругуттан тутулуктаах.

Бу ыйааһыҥҥа сүрүннээн Саха сирэ – Тыва тустууктара күөн көрүстүлэр. Онуоха, бүтэһик быһаарыылаах хапсыһыыларга Михаил Васильев – Ай-Даш Бораһы 10:0, Алексей Копылов – Амир Чамзыны 5:4 ахсааннарынан кыайталаан, 57 киилэ пъедесталыгар бүтүннүү Саха сирин бөҕөстөрө тахсан туралларын ситистилэр.

Өссө биир мэтээли 65 кг ыйааһыҥҥа Алексей Данилов аҕалла. Кини бастаан бэйэтин киһитэ Петр Гоголевы, онтон болгарин Димитар Ангеловы кыайталаан баран, финал аҥарыгар “Аланнар” турнир кыайыылааҕа Муслим Сайдулаевка хотторбута. Үһүс миэстэни былдьаһыыга поляк Кароль Жегуһу кылбардык кыайан, боруонса мэтээлинэн наҕараадаланна. Онон бастакы финалларга бөҕөстөрбүт биэс мэтээллэннилэр.

Аны сарсын, 61 киилэҕэ Константин Капрынов – дагестанец Ибрагим Абдурахмановтыын, 70 киилэҕэ Петр Кириллин – Рамазан Якубовтыын (Красноярскай) финалга тустуохтара. Өссө Андрей Федоров (61 кг), Никита Софронов (70 кг), Алексей Ефимов (79 кг) “уоскутар” бөлөххө киирсиэхтэрэ. Оттон Эдуард Максимов уонна Никита Хабаров (125 кг) – турнир боруонса мэтээлин иһин тустуохтара. Уолаттарбытыгар ситиһиини баҕарыахха!

Турнир бастакы финалларын түмүк көрдөрүүтэ:


57 кг: 1. Айсиэн Винокуров, 2. Петр Копылов, 3. Алексей Копылов, 3. Михаил Васильев (бары – Саха сирэ), 5. Амир Чамзын, 5. Ай-Даш Бораш (иккиэн – Тыва).


65 кг: 1. Курбан Шираев (Дагестан), 2. Муслим Сайдулаев (Чечня), 3. Алексей Данилов (Саха сирэ), 3. Николай Грахмез (Молдова), 5. Кароль Жегуш (Польша), 5. Бекхан Эпендиев (Чечня).


74 кг: 1. Дмитрий Куприн (Кемерово), 2. Бат-Эрдэнэ Бямбасурен (Монголия), 3. Адам Юсупов (СПб-Чечня), 3. Эмиль Шеннон (АХШ), 5. Ринчен Монгуш (Красноярскай-Тыва), 5. Адильхан Амирханулы (Казахстан).


86 кг: 1. Константин Пшеничников (Кемерово), 2. Саграб Исаев (Дагестан), 3. Энхтувшин Батмагнай (Монголия), 3. Иван Недялко (Молдова), 5. Алексей Пархоменко, 5. Ярослав Лодковскай (иккиэн – Беларусь).


97 кг: 1. Адам-Хаджи Бетербиев (Чечня), 2. Коля Арутюнян (Армения), 3. Дэниэл Керквлиет (АХШ), 4. Андрей Аронов (Саха сирэ).

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *