Куорат бастыҥ тренердэрэ быһаарылыннылар

Дьокуускай куорат физическэй култуураҕа уонна спорка управлениетын (начаалынньык Константин Семенович Бурцев) көҕүлээһининэн быйыл иккис төгүлүн, 2018 cыл түмүгүнэн “Оҕо спортивнай оскуолаларын бастыҥ тренер-преподавателлэрэ” куонкурус-көрүү ыытылынна. Балаһыанньа быһыытынан куонкурус икки бөлөҕүнэн тэрилиннэ. Ол курдук, бастакы бөлөххө – бэйэлэрин дуоһунастарын сөптөөхтүк туһанар категориялаах тренер-преподавателлэр, иккискэ – бастакы уонна үрдүкү категориялаах тренер-преподавателлэр илин-кэлин түһүстүлэр. Куонкуруска барыта 18 киһи, сайаапка киллэрэн кытынна.

Бастакы түһүмэххэ, хамыыһыйа чилиэннэрэ: С.Н. Константинова, И.П. Макаров, Г.В. Трофимов уонна Е.В. Сперанская – тренердэр идэлэрин хайысхатынан ыыппыт аһаҕас уруоктарыгар сылдьан сыаналаатылар. Онно хамыыһыйа чилиэннэрэ – үлэ былаанын, инвентары сөптөөхтүк туһаныыны, саҥаны киллэриини о.д.а. көрдүлэр итиэннэ тренердэр үчүгэйдик бэлэмнэммиттэрин, кыахтарынан кыттыбыттарын бэлиэтэтээтилэр. Иккис түһүмэххэ, куонкуруска кыттааччылар портфолиоларын көрүү буолла. Манна сүрүннээн үлэҕэ ситиһиилэрин хайдах ситимнээхтик бэлиэтэнэн, сырдатан иһэллэрэ, докумуону толоруулара сыаналанна.

Уопсайынан, маннык куонкурус тренер-преподавателлэр идэҕэ таһымнарын үрдэтиигэ, бэйэлэрин талааннарын арыйыыга төһүү күүс буолара саарбахтаммат. Маннык көрүү кинилэр категорияларын үрдэтэллэригэр туһалааҕын билэр уонна ылынар буоланнар, сүрдээҕин бэлэмнэнэн, кыһаллан кытталлар.

Дьэ, онон, көрүү, сыаналааһын кэнниттэн бастакы бөлөххө кыайыылааҕынан Дьокуускай куорат 5 №-дээх спортивнай оскуолатын көҥүл тустууга тренерэ, Россия спордун маастара Владислав Васильевич Петров буолла. Иккис миэстэни куорат 4 №-дээх спортивнай оскуолатын оҕунан ытыыга отделениетын тренерэ Марфа Николаевна Федорова ылла. Оттон үһүс миэстэҕэ Дьокуускай 6 №-дээх (“Стерх” спортивнай комплекс) спортивнай оскуолатын баскетболга тренерэ Дмитрий Валерьевич Попов таҕыста.

Иккис бөлөххө ДЮСШ-4 мини-футболга тренерэ Анатолий Михайлович Самков саамай үрдүк баалы ылла. Хатастан көҥүл тустуу тренерэ Александр Павлович Осипов үлэтэ эмиэ үчүгэйинэн сыаналанна. Бу бөлөххө үһүс көрдөрүүнү Дьокуускай 5 №-дээх спортивнай оскуолатын оҕунан ытыыга тренерэ Туйаара Иннокентьевна Старостина ситистэ.

Көрүү-куонкурус түмүгүнэн бары кыттааччыларга сертификаттар туттарылыннылар. Оттон кыайыылаахтар уонна иккис-үһүс миэстэлээхтэр грамотанан, өйдөбүнньүк кубоктарынан бэлиэтэннилэр.

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *