Хабылык, хаамыска кыырайар күнэ

Олунньу 2 күнүгэр Уус-Алдан улууһун Найахы нэһилиэгэр бастыҥ салайааччы, учуутал, саха төрүт остуол оонньууларын пропагандиһа Владимир Георгиевич Дмитриев сырдык кэриэһигэр республикатааҕы төрүт остуол оонньууларын күрэҕэ бэһис төгүлүн ыытылынна. Күрэхтэһиигэ республикабыт араас муннуктарыттан, ол курдук, Амма, Бүлүү, Мэҥэ Хаҥалас, Нам, Ньурба, Сунтаар, Таатта, Чурапчы, Уус Алдан улуус нэһилиэктэриттэн уонна Дьокуускай куораттан 146 кыттааччы кэлэн күөн көрүстэ.

Күрэххэ остуол оонньууларын маастардара Чирикова Алена Кузьминична (Амма), Рожина Оксана Николаевна (Мэҥэ-Хаҥалас), Ксенофонтова Мария Анатольевна (Сунтаар), Попов Владислав Дмитриевич (Мэҥэ Хаҥалас), Потапова Дарина Владимировна (Уус Алдан) кэлэн кыттыыны ылбыттара күрэхтэһиини өссө киэргэттэ, сытыырҕатта. Күрэхтэһиини Мэнэ Ханаластан сылдьар республиканскай категориялаах судьуйа Ширяев Константин Афанасьевич салайан ыытта, сүрүн секретарынан Тегюрюкова Агата Александровна үлэлээтэ. Биир уратыта – хабылыгы сүүс бырыһыан илии көхсүгэр түһэрэн оонньотуу буолла. Көрөргө да олус үчүгэй, спортсмен да инникитин хаачыстыбалаахтык оонньууругар сорук турда. Хабылык, хаамыска 12 остуолунан тэҥҥэ барда, онон бу тэрээһиҥҥэ 12 судьуйа, 12 хронометрист үлэлээтилэр.

Күрэхтэһии «Найахы нэһилиэгэ» Муниципальнай тэриллии баһылыга Петр Степанович Сивцев, Саха Республикатын остуол оонньууларын Федерациятын толорор дириэктэрэ Анжела Тимофеевна Андросова, Манчаары аатынан Сахалыы төрүт спорт көрүҥүн киинин тренерэ Белолюбская Надежда Николаевна, Уус Алдан улууһун остуол оонньууларын Федерациятын салайааччыта Степан Моисеевич Литвинцев, Владимир Георгиевич төрөппүт кыыһа Марина Владимировна Дмитриева эҕэрдэ, алгыс тылларыттан саҕаланна.

Кыттааччылар 6 группанан күрэхтэстилэр: 2009-2007 с.т., 2006-2004 с.т., 2003-2001 с.т., 2000-1979 с.т., 1978-1959 с.т., 1958 с.т. уонна аҕа. Ону сэргэ уһуйаан оҕолоругар – саҥа саҕалаан эрэр кырачаан кыттааччыларга эмиэ күрэхтэһии буолла. Манна кыттыыны ыллылар: Танда, Найахы, Кэптэни уһуйаанын иитиллээччилэрэ.

Ону сэргэ күрэхтэһии иһинэн «Судьуйалааһыны тэрийии» тематыгар Манчаары аатынан Сахалыы төрүт спорт көрүҥүн киинин тренерэ Белолюбская Надежда Николаевна салайыытынан  52 истээччигэ семинар ыытылынна.

Элбэх мындыр албастаах хабылык, хаамыска тыҥааһыннаах киирсиилэрин түмүгүнэн бириистээх миэстэлэри ыллылар:

2009-2007 с.т.

Кыргыттарга 1 миэстэ – Тимофеева Ангелина (Уус Алдан, Найахы), 2 миэстэ – Окорокова Диана (Амма), 3 миэстэ – Максимова Алена (Сунтаар).

Уолаттарга 1 миэстэ – Журавлев Богдан  (Дьокуускай, Модун), 2 миэстэ – Мамаев Владик (Нам, Кыһыл Сыыр), 3 миэстэ – Федоров Артур (Амма).

2006-2004 с.т.

Кыргыттарга 1 миэстэ – Давыдова Ая (Дьокуускай, Модун), 2 миэстэ – Гоголева Анжелика (Уус Алдан, Найахы), 3 миэстэ – Потапова Аделина (Дьокуускай, Модун)

Уолаттарга 1 миэстэ – Ушницкай Ярослав (Дьокуускай, Модун), 2 миэстэ – Деллохов Дьулурхан (Чурапчы), 3 миэстэ – Говоров Аркадий (Уус Алдан, Найахы).

2003-2001 с.т.

Кыргыттарга 1 миэстэ – Дмитриева Вилена (Уус Алдан, Баатаҕай), 2 миэстэ – Новгородова Ира (Чурапчы), 3 миэстэ – Говорова Гульнара (Уус Алдан, Найахы)

Уолаттарга 1 миэстэ – Протопопов Дима (Нам, Кыһыл Сыыр), 2 миэстэ – Смитин Егор (Амма), 3 миэстэ – Аржаков Дима (Чурапчы).

2000-1979 с.т.

Дьахталларга 1 миэстэ – Чирикова Алена (Амма), 2 миэстэ –Ксенофонтова Мария (Сунтаар),  3 миэстэ – Данилова Ньургуйаана (Дьокуускай).

Эр дьоҥҥо 1 миэстэ – Захаров Андрей (Бүлүү), 2 миэстэ – Попов Владислав (Мэҥэ Хаҥалас), 3 миэстэ – Степанов Степан (Чурапчы).

1978-1959 с.т.

Дьахталларга 1 миэстэ – Рожина Оксана (Мэҥэ Хаҥалас), 2 миэстэ – Иванова Лариса (Ньурба), 3 миэстэ – Николаева Галина (Бүлүү).

Эр дьоҥҥо 1 миэстэ – Деллохов Андрей (Чурапчы), 2 миэстэ – Дмитриев Айаал ((Бүлүү), 3 миэстэ – Новгородов Виктор (Дьокуускай).

1959 с.т. уонна аҕа саастаахтарга

Дьахталларга 1 миэстэ – Иванова Мария (Амма), 2 миэстэ – Григорьева Мария (Мэҥэ Хаҥалас), 3 миэстэ – Алексеева Капитолина (Дьокуускай).

Эр дьоҥҥо 1 миэстэ – Аргунов Гаврил (Мэҥэ Хаҥалас), 2 миэстэ – Иванов Гаврил (Бүлүү), 3 миэстэ – Иванов Дмитрий (Бүлүү).

Муҥуутуур кыайыылаахтарынан буоллулар: кыргыттарга – Гоголева Анжелика (Уус Алдан, Найахы), уолаттарга – Смитин Егор (Амма), дьахталларга –  остуол оонньууларыгар спорт маастара Чирикова Алена Кузьминична (Амма), эр дьоҥҥо – республикаҕа биллэр хапсаҕыйдьыт, остуол оонньууларыгар спорт маастарыгар кандидат Захаров Андрей (Бүлүү). Уһуйаан оҕолоругар: Аммосова Карина (Уус Алдан, Танда), Васильев Тит (Уус Алдан, Найахы), Ушиницкая Вилена (Уус Алдан, Найахы) бастакы миэстэлэри, иккис миэстэлэри – Местникова Лена (Уус Алдан, Найахы), Спиридонов Ларик (Уус Алдан, Найахы), Протопопов Сулустан (Уус Алдан, Кэптэни), оттон үһүс миэстэлэри – Егорова Надя (Уус Алдан, Танда), Кривошапкин Илья (Уус Алдан, Найахы), Местникова Эва (Уус Алдан, Найахы) ыллылар.

Бу күрэхтэһиини сылын ахсын Владимир Георгиевич Дмитриев кыргыттара Мария Копырина, Марина, Александра Дмитриевалар көҕүлээһиннэринэн, үбүлээһиннэринэн, Манчаары аатынан Сахалыы төрүт спорт көрүҥүн киинэ, «Найахы нэһилиэгэ» Муниципальнай тэриллии, оскуола коллектива өйөөн, тэрийэн ыыталлар. Быйылгы 5-с төгүлүн ыытыллар күрэхтэһиигэ уопсайа 170000 суумалаах бириис оонньонно. Ол курдук, муҥуутуур кыайыылаахтарга улахан дьоҥҥо 15000-лыы, оҕолорго 10000-лыы солкуобай туттарылынна. Хас биирдии группа кыайыылаахтарыгар оҕолорго 4000,  3000, 2000 солк. Владимир Георгиевич кыргыттарын илиилэриттэн бириис туттарылынна. Онтон улахан дьоҥҥо хас миэстэ аайы Найахы нэһилиэгин тэрилтэлэрэ бириис олохтообуттар. Ону тэҥэ Уус Алдан улууһун физкультураҕа уонна спортка управлениета, Уус Алдан улууһун остуол оонньууларын Федерацията, сылын ахсын спонсордыыр биирдиилээн дьон бэйэлэрин бириистэрин туттардылар.

«Бу нэһилиэк уратыта – хабылыгы, хаамысканы ураты спорт курдук сыаналыыра. Хас сылын аайы бииртэн биир чаҕылхай оонньооччулары көрөн көрөөччүлэр  улахан дуоһуйууну, астыныыны ылаллар.Бачча ыраахтан чахчы хабылыгы, хаамысканы табыгас тарбахтарын,имигэс илиилэрин сатабылын көрдөрө, оонньуу, күөн көрсүһэ чаҕылхайдар кэлэллэр» – диэн остуол оонньуутун тренерэ Белолюбская Надежда Николаевна бэлиэтээн эттэ.

Кырдьык даҕаны, оскуолабытыгар оҕолорбут Румянцева Наталья Дмитриевнаҕа уонна энтузиаст Мария Иосифовна Ушницкаяҕа утумнаахтык дьарыктананнар, элбэх ситиһии көтөллөөхтөр. Ол курдук, иитиллэн таҕыстылар Потапова Дарина – сахалыы остуол оонньуутугар спорт маастара, сахалыы остуол оонньуутугар спорт маастарыгар кандидаттар, ХХ Манчаары оонньууларын кыттыылаахтара Местников Ганя, Румянцева Лия, сахалыы остуол оонньуутугар спорт маастарыгар кандидат – Жанчикова Таня. Кинилэр туйахтарын хатарыахтара диэн сахалыы остуол оонньууларын «Чэчир» оҕо уһуйаанын иитиллээччилэрин Лена Ивановна Готовцева  уонна Ньургуяна Егоровна Гоголева дьаныардаахтык  дьарыктыыллар.

Найахы сиригэр хабылыгы, хаамысканы өрө тутан, уһуйаан оҕотуттан саҕалаан аҕа саастаах дьон биир кэлимник дьарыктанан өбүгэ остуол оонньуутун тута, тарҕата сылдьаллар. Онуоха күүс-көмө буолар биһиги нэһилиэкпитигэр, улууспутугар  үгүс элбэх үлэни ыыппыт, киһи быһыытынан эҥкилэ суох эриэккэс, салайааччы туйгуна Владимир Георгиевич Дмитриев кыргыттара Мария, Марина, Александра Дмитриевалар дьиэ кэргэттэрэ.

Любовь СИВЦЕВА, Найахы оскуолатын  иитэр үлэҕэ дириэктэри солбуйааччы.

Уус Алдан.    

 

 

Добавить комментарий

Ваш e-mail не будет опубликован. Обязательные поля помечены *