“Бастакы, сандал саас чаҕылхай күнүнэн!”

Диэн эҕэрдэнэн, бүгүн, республикатааҕы Бэчээт дьиэтигэр тэриллибит пресс-конференцияҕа Олимпийскай эрэл училищетын дириэктэрин солбуйааччы, биллиилээх бөҕөс Александр Контоев бэйэтин иһитиннэриитин саҕалаата. Бу, биһиги албан ааттаах тустуукпут, олимпийскай чемпион Роман Михайлович Дмитриев кэриэһигэр көҥүл тустууга норуоттар икки ардыларынааҕы VII турнирга анаммыт бастакы пресс-конфренцияны Саха Республикатын Спорка уонна физическэй култуураҕа миниистирин бастакы солбуйааччы Семен Чердонов иилээн-саҕалаан ыытта.

Кини, Р.М. Дмитриев аатынан турнир – Тустуу аан дойдутааҕы түмсүүтүн (UWW) сыллааҕы календарыгар киирэр, бу саастаахтарга биир саамай улахан таһымнаах түһүлгэ буоларын, быйылгы күрэхтэһии Роман Михайлович төрөөбүтэ 70 сылыгар ананан ыытылларын туһунан санатта. Итиэннэ тылы, бу күрэхтэһиини бэлэмнээн, тэрийэн ыытар Олимпийскай эрэл училищетын дириэктэрин солбуйааччы  А.С. Контоевка биэрдэ.

Биллэрин курдук, быйылгы турнирга 12 дойду бөҕөстөрө кыттыахтара. Турнир техническэй делегатынан хорват Давор Петаржек буолуоҕа. Кылаабынай судьуйанан – норуоттар икки ардыларынааҕы категориялаах судьуйа Александр Чуенко (Москва), оттон кылаабынай секретарынан биһиги биир дойдулаахпыт, норуоттар икки ардыларынааҕы категориялаах судьуйа Владимир Торговкин үлэлиэхтэрэ. Уопсайынан, турнирга барыта 28 судьуйа үлэлиирэ былааннанар.

Оттон турнир бочуоттаах ыалдьыттарынан: олимпийскай чемпионнар Александр Иваницкай (Москва), Валентин Йорданов, олимпийскай призердар Радослав Великов (иккиэн – Болгарияттан), Владислав Стецик (Польша) буолуохтара.

Маны тэҥэ АХШ хамаандатын 1992 сыллааҕы Барселонааҕы Олимпиада чемпиона Кевин Джексон салайан илдьэ кэлэрин туһунан иһитиннэрдилэр.

Александр Степанович эппитинэн, быйылгы турнирга Саха сириттэн барыта 40-чэ тустуук кыттыаҕа. Хамаанда икки кыһыл көмүс мэтээлгэ суоттанар. Тустуу үс күн ыытыллар. Манна сыһыары тутан эттэххэ, ыйааһыннарыгар бастаабыттар – 70, иккистээбиттэр – 50, үһүстээбиттэр- 40 уонна кыайыылааҕы бэлэмнээбит тренердэр – 40 тыһ. солк. харчынан наҕараадаланыахтара. Маны тэҥэ, спонсордар көмөлөрүнэн бастыҥ бөҕөстөргө анал бириистэр туттарыллыахтара.

Турнир кулун тутар 8, 9, 10 күннэригэр сарсыарда 10:00 чаастан “Триумф” Спорка бэлэмнэнии киинигэр саҕаланар. Эрдэ эппиппит быһыытынан, киирии – босхо.

Петр ПАВЛОВ.     

Добавить комментарий

Ваш e-mail не будет опубликован. Обязательные поля помечены *