Ситим быстыбат! “Саха сирэ” хаһыат иһинэн көрсүөххэ диэри

РЕДАКТОР КОЛОНКАТА. Бары билэ-көрө сылдьаргыт курдук, “Саха сирэ” хаһыаты уларыта тутуу түмүгэр, 2017 сыллаахха “Дьулурҕан” уруккутун курдук нэдиэлэҕэ биирдэ түөрт балаһанан бэчээттэнэн тахсара тохтотуллубутугар, “Киин куорат” хаһыат бэйэтин кэккэтигэр ылбыта. Онуоха хаһыат салалтатыгар, чуолаан республикатааҕы “Эхо столицы” муниципальнай тэрилтэ генеральнай дириэктэрэ Александр Прокопьевка уонна айар кэлэктиипкэ улахан махталбын тиэрдэбин! Ааҕан көрдөххө, бу хаһыакка “Дьулурҕан” икки сылы кыранан кыайбат кэмҥэ бэчээттэнэн таҕыста. Онон республикаҕа сахалыы тылынан бэчээттэнэн тахсар соҕотох спорка сыһыаннаах хаһыат ситимин быспакка, Саха сирин спорду таптааччыларыгар күндү кэһиилээх ыалдьыт буолан дьиэлэригэр киирбитэ.

“Дьулурҕан” бэчээтинэй бородууксуйа буолан, 19-cуc сылын тахсар. Бу, кырата суох кэм. Бу кэм устатыгар бэйэтин суолун-ииһин, интэриэстээх дьонун – ааҕааччыларын уонна улуус-улуус аайыттан спорду, физическэй култуураны суруйар-сырдатар ааптардары булунан, балайда күүстээх бөлөҕү үөскэттэ. Билэр-билбэт дьонум – уулуссаҕа буоллун, оптуобуска буоллун, уопсастыбаннай миэстэҕэ көрсө түһээт, “Дьулурҕан” суруйуутун сэҥээрэллэрин, оннооҕор хас биирдии нүөмэрин мунньан, тиһэн ууруна сылдьан ааҕалларын истэр кэрэхсэбиллээх. Бу сыллар усталарыгар “Дьулурҕаны” кытта бииргэ буолбут бэриниилээх ааҕааччыларга уонна ааптардарга барҕа махтал! Итиэннэ саҕалаабыт дьыалабытын чиэстээхтик салгыахха диэн ыҥырабын.

Аны билигин республика сүрүн хаһыатын саҥа салалтатын ыҥырыытынан, “Дьулурҕан” уруккутун курдук, “Саха сирэ” хаһыат иһинэн үлэлииргэ быһаарынна. Онон кулун тутар ыйтан биһиги хаһыаппыт аадырыһын уларытар. Саҥа сонуну, иһитиннэриини биһиги хаһыаппыт Интернеккэ dzulurgan.ru сайтыгар ааҕан, көрөн билиэххит. Манна сыһыары тутан эттэххэ, сайтпытын күннэтэ кэтээн көрө, билсэ сылдьаргытыгар баҕарабын. Билэргит курдук, кулун тутар – тустуу ыйа. Ол курдук, биһиги бастакы олимпийскай чемпиоммут Роман Михайлович Дмитриев кэриэһигэр эдэрдэргэ норуоттар икки ардыларынааҕы турнир, ол кэнниттэн тута сөрөөн аан дойду аҕыс күүстээх хамаандата кыттыылаах – Аан дойду кубога, салгыы олимпийскай чемпион Павел Павлович Пинигин бирииһигэр уолаттарга турнир, онтон Саха сиригэр тустууну төрүттээбит Николай Николаевич Тарскай аатынан республика биирдиилээн уонна хамаанданан бастыыр иһин чемпионата… ыытыллыахтара.

Бу улахан таһымнаах түһүлгэлэр тустарынан сырдатыыны, хаартыскалары, видеолары dzulurgan.ru сайтка, “Дьулурҕан” балаһаларыгар ааҕыаххыт, көрүөххүт. Оттон, бэйэлэрин суруйууларын, сонуннарын биһиэхэ бэчээттэтиэхтэрин баҕарар дьоҥҥо туһаайан эттэххэ, суруйууларгытын dzulurgan@mail.ru электроннай почтаҕа ыытыаххытын сөп. “Саха сирэ” хаһыат иһинэн көрсүөххэ диэри, күндү ааҕааччылар!

Петр ПАВЛОВ, “Дьулурҕан” хаһыат кылаабынай редактора.

Ситим быстыбат! “Саха сирэ” хаһыат иһинэн көрсүөххэ диэри: 2 комментария

  1. Дьаакып

    Дьэ, бэт!
    Архыып диэн рубриканы ким дьаьайар?!

    1. Петр Павлов Автор записи

      Ким баҕарар дьаһайыан сөп. Архыып диэн син биир история буоллаҕа.

Добавить комментарий

Ваш e-mail не будет опубликован. Обязательные поля помечены *