Чемпионнар кыһалара буолуоҕа

Ыччат эт-хаан өттүнэн сайдыытын, чөл олоҕу тутуһуутун тыа кыра нэһилиэктэриттэн саҕалаан нэһилиэнньэ барыта өйөөтөҕүнэ, ол дьыала кэскиллээх буолуоҕа. Амма улууһун Өнньүөс бөһүөлэгэ киинтэн 82 километр ыраах сытар түгэх сир. Манна олунньу 22 күнүгэр оскуола үөрэнээччилэригэр Амма оройуонун көҕүл тустууга ССРС-ка бастакы спорт маастара Николай Николаевич Никитин бирииһигэр аһаҕас республикатааҕы турнир ыытылынна.

Николай Николаевич бу Өнньүөс сириттэн силистэнэн-мутуктанан тахсыбыт Амма улууһун бастыҥ спортсмена, сааһын тухары спорду тэнитиигэ үлэлээбит педагог, тренер буолар. Турниры тэрийиигэ Амма-Наахара нэһилиэгин дьаһалтата (баһылык Захарова Мария Романовна), Н.Н. Никитин огдообото – Саха Республикатын үтүөлээх бырааһа Никитина Марфа Егоровна, кыргыттара быраас, медицинскэй наука кандидата Ефимова Любовь Николаевна, быраас, медицинскэй наука кандидата Костюкевич Надежда Николаевна, Н.Н. Никитин 1976 уонна 1977 сс. Короленко аатынан Амма орто оскуолатыттан таһаарбыт выпускниктара, Өнньүөс бөһүөлэгин тэрилтэлэрин салайааччылара, олохтоохторо бары саба түһэн үлэлээтилэр. Күрэхтэһии буолуутугар төһүүнэн норуот күүһүнэн тутуллубут киэҥ-куоҥ, аныгылыы тутуулаах спортивнай зал буолла. Бу зал директора Гаврильев Виктор Валерьевич турнир тэрээһиннээхтик ыытыллыытыгар үгүс сыратын биэрдэ. Уруккута бу турнир 3-тэ ыытыллыбыт буоллаҕына, саҥа залламмыт Өнньүөс бөһүөлэгэр 4-с төгүлүн ыытыллыыта күрэхтэһиигэ саҥа тыыны эбэн биэрдэ.

Ырааҕы аахсыбакка 12 хамаанда, уопсайа 96 эдэр, үүнэн эрэр спортсмен кытынна. Амма бары кэриэтэ нэһилиэктэриттэн, Намтан кэлбит эдэр тустууктар көбүөргэ үрдүк таһымнаах хапсыһыылары көрдөрөн залы толору мустубут көрөөччүлэри сэргэхситтэ. Оҕолор кыһыйа-кыһыйа бырахсыылара, кыайыыга дьулуурдара, харса суох тиһэҕэр диэри киирсиилэрэ кинилэр спортивнай дьоҕурдарын көрдөрдө. Кыайтарбыт хараҕын уута, кыайбыт үөрэн эккирээһинэ көрөөччүлэри долгутта.

Хапсаҕайга абсолютнайга киирсии олус сытыытык барда. 2005-2007 сс. бөҕөстөргө Кононов Максим (Соморсун), 2008-тан алларааларга Винокуров Артем (Амма) бастааннар, дьоннорун үөртүлэр.

Оттон турнир чемпионнарынан ыйааһыннарыгар буоллулар: Егоров Мичил (Соморсун), Кузнецов Кирилл (Сахаачча аатынан оскуола), Павлов Костя (Нам), Винокуров Ариан (ДЮСШ-3), Сергеев Богдан (Сахаачча аатынан оскуола), Винокуров Артем (Нам), Иванов Витя (Амма), Давыдов Эрик (Амма), Кононов Максим (Соморсун), Гермогенов Ньургустаан (Өнньүөс).

Бастаабыттарга тэрийээччилэр, Амма улууһун тэрилтэлэрэ бириистэри туттардылар. Н.Н. Никитин дьиэ кэргэттэрэ эмиэ сыаналаах бэлэхтэри туттардылар. Турнир түмүгэр тыл этэригэр Н.Н. Никитин кыыһа Любовь Николаевна Ефимова манныгы бэлиэтээтэ:

Мария Романовна биһиги аҕабыт аатынан турниры Өнньүөскэ ыытар туһунан хас да сыл анараа өттүгэр эппитэ. Ол санаабыт туолла. Хайы-үйэ төрдүс турнирбытын ыыттыбыт.  Күрэхтэһии олус тэрээһиннээхтик, үчүгэйдик ааста. Нэһилиэнньэ өрө көтөҕүлүннэ. Биһиги дьиэ кэргэн нэһилиэк дьаһалтатыгар, балыыһа, оскуола, детсад уонна да атын тэрилтэлэргэ барҕа махталбытын этэбит. Турнирбыт сыл аайы далааһыннанан иһэр. Эдэр үүнэн иһэр спортсменнары көрө-көрө үөрэбит. Маннык күрэхтэһиилэргэ эһиги эр киһилии характергыт, кыайыыга дьулуургут чочуллар. Дьиҥнээх эр дьон буола улаатыҥ!

Өнньүөскэ чөл олоҕу, эт-хаан өттүнэн сайдыыны өрө туталлар. Маннык нэһилиэктэртэн үтүө дьоннор — республикабыт кэлэр кэскилэ үүнүөҕэ. Маннык нэһилиэктэртэн чемпионнар үүнүөхтэрэ.

Анатолий ГОГОЛЕВ, журналист, РФ культуратын үтүөлээх үлэһитэ.   

Чемпионнар кыһалара буолуоҕа: 1 комментарий

  1. Михаил

    Сахаачча аатынан школа диэн буотах школа Захарова диэн г. Якутск Мин сылдьыбытым ити күрэхтэһиигэ

Добавить комментарий

Ваш e-mail не будет опубликован. Обязательные поля помечены *