Михаил Иванов – Тахти кубогын кыайыылааҕа

Иран Керманшах куоратыгар номох буолбут бөҕөс, олимпийскай чемпион Голамреза Тахти кубогар көҥүл тустууга норуоттар икки ардыларынааҕы XXXIX турнир ыытылынна. Бу, аан дойдуга тэриллэр тустуу күрэхтэһиилэриттэн биир саамай улахан таһымнаах турнирыгар быйыл Армения, Азербайджан, Белоруссия, Грузия, Венгрия, Кыргызстан, Голландия, Россия, Турция уонна биллэн турар, Иран хамаандалара кыттыыны ыллылар.

Көбүөргэ барыта 147 бөҕөс тахсан күөн көрүстэ. Ол иһиттэн аҥаара олохтоохтор, Иран тустууктара. Оттон Россияттан 4 бөҕөс кыттыбытыттан иккитэ – саха тустууга кыһатын иитиллээччилэрэ, билигин дойдубут тэбэр сүрэҕэр Москваҕа олорор, эрчиллэр Михаил Иванов уонна Егор Потапов. Кинилэр иккиэн 57 киилэҕэ туһуннулар. Бу ыйааһыҥҥа барыта 17 кыттааччы баар.

Егор Потапов квалификацияҕа көбүөр хаһаайына Алиреза Сарлакка 2:6 ахсаанынан хотторон кэбистэ. Оттон Михаил Иванов финал 8/1-гэр эдэрдэргэ аан дойду күрэхтэһиитин кыайыылааҕа буола сылдьыбыт, аан дойду кубогын хамаанданан кыайыылааҕа, манна Д.П. Коркин турнирыгар кэлэн үһүстээбит иранец Юнес Сармастины 9:5 ахсаанынан хотон, үчүгэй бэлэмнээҕин көрдөрбүтэ. Салгыы, финал чиэппэригэр кыргыз Алмаз Сманбековы 4:2 уонна финал аҥаарыгар Венгрия чиэһин көмүскүүр дагестанец Гамзатгаджи Халидовы 9:4 ахсааннарынан кыайталаан, финалга эрэллээхтик тахсыбыта. Финалга, олохтоохтор үс эрэллэрин хоппут, соторутааҕыта Турция улахан дьоҥҥо чемпиона буолбут эдэр талааннаах тустуук Ахмет Думаны кытта көрүстэ уонна баай уопутунан баһыйан (8:6), Тахти кубогын кыайыылааҕынан буолла. Манна даҕатан эттэххэ, былырыын маннык күрэхтэһиигэ биир дойдулаахпыт Ньургун Скрябин (61 кг) эмиэ кыайыылааҕынан тахсан турар.

Атын ыйааһыннарга түһүлгэ кыайыылаахтарынан буоллулар: 61 кг – Улугбек Жолдозбеков, 65 кг – Эрназар Ахматалиев (иккиэн – Кыргызстан), 70 кг – Юнес Эмами (Иран), 74 кг – Гаджимурад Гаджиев (Азербайджан), 79 кг – Бахман Теймури, 86 кг – Камран Гасемпур, 92 кг – Араш Мохебби, 97 кг – Алиреза Гударзи, 125 кг – Йодалла Мохебби (бары – Иран).

Бүлүү улууһуттан төрүттээх Михаил Иванов аҕыйах хонугунан (олунньу 14 күнүгэр) отут сааһын туолар. Онон төрөөбүт күнүн көрсө бэйэтэ бэйэтигэр дьоһун бэлэх оҥоһунна диэххэ сөп. Москваҕа кини биир дойдулаахпыт Александр Софронов салалтатынан дьарыктанар. Россия-2007 чемпионатын үрүҥ көмүс призера, Нефтеюганскайга, Белоруссияҕа, Украинаҕа, Турцияҕа, Болгарияҕа ыытыллыбыт норуоттар икки ардыларынааҕы турнирдар кыайыылаахтара. Манна сыһыары тутан эттэххэ, Михаил Иванов 2011 с. Тахти кубогар үһүс миэстэни ылбытын санатабын.

Уолбут Иран курдук тустууну таҥара оҥостубут, тустууга сүгүрүйэр дойдуга тиийэн кыайыы көтөллөммүтэ икки бүк үөрүүлээх. Дэлэҕэ, тустуу эйгэтигэр “Ким, Иран көбүөрүгэр кыттыбатах – ол тустуук буолбатах” диэхтэрэ дуо. Хас даҕаны сыллаах тохтобул кэнниттэн көбүөргэ иккистээн эргиллибит киһиэхэ бу дьоһун ситиһии быһыытынан сыаналаныахтаах. Мантан санаата көтөҕүллэн Михаил өссө дьаныһан туран дьарыктанан, сыалын-соругун улаатыннаран үрдүк көрдөрүүлэри ситиһэригэр баҕарыаҕыҥ!

Петр ПАВЛОВ.   

PS: хаартыскалар Иран тустууга сайтыттан ылыллан туһанылыннылар.       

Добавить комментарий

Ваш e-mail не будет опубликован. Обязательные поля помечены *