Аан дойду чемпионатын призерун чиэстээтилэр

Бэҕэһээ, олунньу 3 күнүгэр Бороҕоҥҥо, Уус Алдан көҥүл тустууга чемпионатын кэмигэр – аҕам саастаахтарга аан дойду көҥүл тустууга чемпионатын үрүҥ көмүс призера Вадим Даниловы чиэстээһин тэрилиннэ. Санатан эттэххэ, былырыын күһүн Македония Скопье куоратыгар бэтэрээн спортсменнар көҥүл тустууга аан дойдуга биирдиилээн бастыыр иһин чемпионаттарыгар Саха сириттэн үс бөҕөс кыттыбыта. Үөрүүлээҕэ баар, кинилэр үһүөн төрөөбүт дойдуларыгар мэтээллээх эргиллибиттэрэ. Ол курдук, Сергей Слепцов, Вадим Данилов – үрүҥ көмүс, оттон Петр Осипов – боруонса мэтээллэринэн наҕараадаламмыттара.

Вадим Данилов (70 кг) итальянец Кариерины кытта киирсиитэ судургута суох буолбута. Ахсааннарыттан (2:2) көрдөххө, сүрдээх тыҥааһыннаах, илистиилээх тустуу буолбут бадахтаах. Ол да буоллар, быраабыла быһыытынан, үөрүөхпүт иһин, кыайыы биһиги бөҕөспүтүгэр тиксибитэ. Салгыы күрэхтэһиигэ Вадим болгарин Димитровы 10:4 уонна дьоппуон Морины 5:2 ахсааннарынан кыайан, финалга тахсыбыта. Онно испанец Альварестыын көрсүһүүтүгэр, очукуонан хотторон кэбиһэн, пьедестал иккис үктэлигэр тахсыбыта.

Иллэрээ сыл Пловдивка (Болгария) ыытыллыбыт маннык чемпионакка алта бөҕөспүт кыттан, биирдэрэ даҕаны мэтээлгэ тиксибэтэх эбит буоллаҕына, бу сырыыга үс бөҕөспүт кыттан – үһүөн мэтээлгэ тиксибиттэрэ ситиһии быһыытынан ааҕыллыахтаах. Саха сирэ тустуулаах республика буоларын бу даҕаны көрдөрүү туоһулуур.

Манна даҕатан эттэххэ, өссө Е.А. Борисов СР тустууга федерациятын президенэ эрдэҕинэ, бэтэрээн бөҕөстөр аан дойду чемпионатыгар ситиһиилээхтик кыттыыларыгар бириэмийэ олохтоммута. Холобур, бастаабыкка – 100, иккистээбиккэ – 70, үһүстээбиккэ – 45 тыһ. солк. Хомойуох иһин, Скопьеҕа миэстэлэспит бөҕөстөрбүтүгэр билиҥҥитэ итинник бириэмийэ төлөнө илик эбит.

Бороҕоннооҕу чиэстээһиммитигэр төнүннэххэ, эдэрдии эрчимнээх көҥүл тустууга уонна хапсаҕайга үрдүк көрдөрүүлээх СР спордун маастара Вадим Даниловы – Уус Алдан баһылыга, улуус тустууга федерациятын президенэ Алексей Васильевич Федотов, улуустааҕы спорт уонна физическэй култуура отделын начаалынньыга Константин Васильевич Давыдов, Мүрү нэһилиэгин баһылыга Василий Иванович Аммосов эҕэрдэлээтилэр, өйдөбүнньүк бэлэхтэри туттардылар, ситиһиини баҕардылар.

Ыспыраапка: Вадим Данилов – хапсаҕайга П.Алексеев аатынан республика чемпионатын кыайыылааҕа (2008), икки төгүл боруонса призера (2006, 2011). Көҥүл тустууга Н.Алексеев бирииһигэр Саха сирин бэтэрээннэргэ үс төгүллээх чемпиона (2015, 2016, 2017), Россия чемпионатын үрүҥ көмүс призера (2015), Калининградка ыытыллыбыт норуоттар икки ардыларынааҕы турнир үһүс призера (2018), бэтэрээннэргэ аан дойду чемпионатын боруонса (Афины, 2015) уонна үрүҥ көмүс (Скопье, 2018) призердара.

СР үөрэҕириитин туйгуна, хапсаҕайга СР спордун маастара. СР спордун национальнай көрүҥэ сайдыытыгар кылаатын, Физическэй культура уонна спорт, “Урожай” спортивнай уопсастыба, Уус Алдаҥҥа үөрэхтээһин, Бэрт Ууһун уонна Мүрү нэһилиэктэрин социальнай-экономическай сайдыыларыгар кылаатын иһин анал бэлиэлэринэн наҕараадаламмыта.

Петр ПАВЛОВ.  

Добавить комментарий

Ваш e-mail не будет опубликован. Обязательные поля помечены *