Түһүлгэҕэ 133 бөҕөс!

Уус Алдан улууһун көҥүл тустууга чемпионата саҥа үйэҕэ алтыс төгүлүн ыытылынна. Ол курдук, олунньу 3 күнүгэр Бороҕоҥҥо, Н.Н. Тарскай аатынан чэбдигирдэр-спортивнай комплекска тэлгэммит икки көбүөргэ улуус 12 нэһилиэгин 133 бөҕөһө тахсан күөн көрүстэ. Туох да кэтэмэҕэйдээһинэ суох – тыҥааһыннаах, сытыы хапсыһыылар буоллулар.

Буолумуна даҕаны, күрэхтэһии – улуус комплекснай спартакиадатын бырагырааматыгар киирбит буолан, эрдэттэн тэриини, бэлэмнэнии, састаабы талыы… быһата, хас биирдии нэһилиэккэ эппиэттээх тэрээһин. Комплекснай спартакиада түмүгүнэн кыра уонна улахан нэһилиэктэргэ бириистээх миэстэлэргэ тиксибиттэргэ – ботуччу бириистэр, бириэмийэлэр көрүллэр буолан, ким даҕаны туора турбат. Куоталаһыы хаһан баҕарар хатыһыылаах, көҕүтүһүүлээх. Быйылгы түһүлгэ састаап өттүнэн күүстээх буолла, бу күҥҥэ баар улуус күүстээх тустууктара бары кэриэтэ кыттан, бэйэлэрин биир дойдулаахтарыгар, бэриниилээх ыалдьааччыларыгар үчүгэй хамсаныылары, албастары көрдөрдүлэр.

Бастатан туран, күрэхтэһии үрдүк тэрээһиннээхтик ыытыллыбытын бэлиэтиир оруннаах. Онуоха улуус тустууга федерациятын салайааччыта, Уус Алдан баһылыга Алексей Федотов, Россия уонна Саха сирин үтүөлээх тренерэ Степан Сивцев, федерация бастакы вице-президенэ, норуоттар икки ардыларынааҕы кылаастаах спорт маастара Афанасий Заболоцкай, улуус спорка уонна физическэй култуураҕа тэрилтэтин салайааччыта, спорт маастара Константин Давыдов уонна Уус Алдан спорка актива тустууга олохтообут систиэмэлэрин быһыытынан, күрэхтэһии үрдүк тэрээһиннээхтик ыытылынна.

Хапсыһыылары сөптөөхтүк сыаналааһын эмиэ таһымнаахтык ыытылынна диэххэ сөп. Онуоха кылаабынай судьуйанан билиҥҥи кэмҥэ республика саамай бастыҥ специалиһа – норуоттар икки ардыларынааҕы категориялаах судьуйа, СР спортивнай тустууга федерациятын толорооччу дириэктэрэ Николай Николаев бэйэтинэн ыҥырыллан кэлэн үлэлээбитэ элбэҕи этэр. Манна сыһыары тутан эттэххэ, чемпионаты үөрүүлээхтик аһыыга кини федерация салалтатын аатыттан Айсен Копыриҥҥа көҥүл тустууга Россия спордун маастарын нуорматын толорбутун туоһулуур бэлиэни уонна дастабырыанньаны туттарда. Оттон кылаабынай сэкиритээринэн – эмиэ норуоттар икки ардыларынааҕы категориялаах судьуйа Петр Соловьев эҥкилэ суох үлэлээтэ.

Манна, күрэхтэһии миэстэтин бэлэмнээн, тэрийэн ыытыыга улахан үөрүйэхтээх, Н.Н. Тарскай аатынан чэбдигирдэр-спортивнай комплекс дириэктэрэ Виктор Портнягины бэлиэтиир хайаан даҕаны наада дии саныыбын.

Чемпионат бочуоттаах ыалдьыттарынан биир дойдулаахтарбыт: Саха Республикатын үтүөлээх тренерэ Иван Дмитриев уонна Сурдлимпиада чемпиона, Россия спордун үтүөлээх маастара Василий Стрекаловскай буоллулар.

Тустуу чааһын кылгастык билиһиннэрдэххэ, төһө даҕаны утарылаһааччыларыттан тустар маастарыстыбаларынан быдан үрдүк таһымҥа турдаллар, Россия көҥүл тустууга сүүмэрдэммит хамаандатын чилиэннэрэ Арыйан Тютрин, Петр Павлов – түһүлгэни киэргэттилэр. Син эмиэ былырыыҥҥытын курдук, Айаал Белолюбскай, Виталий Эспек, Ваир Бурцев, Айсен Копырин, Арсентий Николаев уонна Евгений Алексеев бэйэлэрин ыйааһыннарыгар чемпионнаатылар. Манна даҕатан эттэххэ, былырыын Тютриннаах Павлов Бурятия турнирыгар кыттаннар, улуус чемпионатын көтүппүттэрэ.

70 киилэҕэ бары финалга Петр Павлов былырыыҥҥы чемпион Василий Шалугины кытта киирсиитин күүппүппүт. Ону баара, Шалугин икки утарсааччытын холкутук кыайан баран, финалга тахсар иһин хапсыһыыга Тумултан Михаил Сергеевкэ 3:3 ахсаанынан, быраабыла быһыытынан хотторон кэбиһэн, элбэх көрөөччүнү соһутта.

Чемпионат саамай аҕа саастаах кыттааччытынан – Бүтүн Сойуустааҕы турнирдар кыайыылаахтара, эр дьоҥҥо уонна бэтэрээннэргэ Саха сирин чемпионатын иккилии төгүллээх призера, ССРС спордун маастара, 54 саастаах Василий Шепелев (Бэрт Ууһун нэһилиэгэ, Сыырдаах) буолла. Кини 57 киилэҕэ биир эдэр утарсааччытын ыраастык кыайан баран, финал чиэппэригэр бастакы разрядтаах, 21 саастаах Семен Новгордовка (Суотту) төһө даҕаны бэрт кыранан сабырыйтардар, тустууну сыаналаан көрөр дьон биһирэбиллэрин ылла. Баһылай билигин да буораҕа кураанах эбит.

Чемпионат түмүк көрдөрүүтэ:     

 

57 кг (17 кыттааччы): 1. Айаал Белолюбскай (Кэптэни), 2. Айхал Слепцов (Мүрү), 3. Макар Барашков, Дмитрий Петухов (иккиэн – Тумул).

61 кг (19): 1. Арыйан Тютрин (Суотту), 2. Родион Ефремов, 3. Ким Степанов (иккиэн – Мүрү), Александр Иванов (Дүпсүн).

65 кг (19): 1. Виталий Эспек (Тумул), 2. Константин Бурнашев (Мүрү), 3. Альберт Бурцев (Түүлээх), Илья Бочкарев (Суотту).

70 кг (18): 1. Петр Павлов (Мүрү), 2. Михаил Сергеев (Тумул), 3. Василий Шалугин (Найахы), Сергей Бурнашев (Кэптэни).

74 кг (10): 1. Ваир Бурцев (Тумул), 2. Михаил Слепцов (Танда), 3. Василий Антонов (Сыырдаах), Спиридон Старостин (Мүрү).

79 кг (14): 1. Айсен Копырин (Уһун Күөл), 2. Прокопий Аржаков (Тумул), 3. Николай Саввин (Суотту), Александр Андросов (Танда).

86 кг (12): 1. Дмитрий Петухов (Тумул), 2. Степан Алексеев (Курбуһах), 3. Борис Иванов (Танда), Василий Черкашин (Сыырдаах).

92 кг (8): 1. Артем Сивцев (Танда), 2. Виктор Тютрин (Суотту), 3. Василий Ефимов (Кэптэни), Хусаин Музафаров (Найахы).

97 кг (10): 1. Арсентий Николаев (Найахы), 2. Алексей Андросов (Сыырдаах), 3. Александр Белолюбскай (Суотту), Егор Аммосов (Курбуһах).

125 кг (8): 1. Евгений Алексеев (Тумул), 2. Михаил Гоголев (Дүпсүн), 3. Эрчим Максимов (Мүрү), Сергей Иванов (Курбуһах).

Хамаанданан түмүккэ, хаһыс да сылын, Василий Алексеев баһылыктаах Бороҕон нэһилиэгин түмсүүлээх хамаандата 83 очукуолаах эрэллээхтик бастаата. Иккис миэстэҕэ Суотту нэһилиэгин (баһылык Василий Иванов) хамаандата таҕыста. Очукуота – 67. Кинилэртэн баара-суоҕа икки эрэ очукуонан хаалан, түһүлгэ хаһаайыттара – Мүрү нэһилиэгин (баһылык Василий Аммосов) тустууктара үһүс бириистээх миэстэни ыллылар. Салгыы миэстэлэри Найахы, Танда, Сыырдаах, Кэптэни, Курбуһах, Уһун Күөл, Дүпсүн, Баатаҕай, Түүлээх хамаандалара ыллылар.

Хамаанданан кыайыылаахтар кубоктарынан уонна дипломнарынан наҕараадаланнылар. Оттон биирдиилээн ыйааһыннарга кыайыылаахтар уонна иккис-үһүс миэстэлэммиттэр туһааннааҕынан – 7000, 4000, 2000 солк. харчыга сертификаттары туттулар. Ону тэҥэ чемпионат чулуу бөҕөстөрө: Арыйан Тютрин, Петр Павлов, Айсен Копырин анал бириистэринэн наҕараадаланнылар.

Саҥа XXI үйэҕэ үктэнэн баран, спорка, чуолаан тустууга үтүө үгэстээх Уус Алдан улууһа көҥүл тустууга улахан дьоҥҥо бэйэтин чемпионатын алтыс сылын субуруччу тэрийэн ыытыыта – Саха сирин атын, тустууга баай историялаах улуустарыгар үтүө холобур буолуохтун! Иһиттэххэ, аны олунньу 8 күнүгэр Мэҥэ Хаҥалас улууһун көҥүл тустууга чемпионата ыытыллар эбит. Ити курдук, үтүө бачыым батыһааччылардаах буоллун!

Петр ПАВЛОВ.

Ааптар хаартыскаҕа түһэриилэрэ.

Добавить комментарий

Ваш e-mail не будет опубликован. Обязательные поля помечены *