Сыырдаахха аан дойду чемпиона Дмитрий Попову чиэстээтилэр

Бүгүн, олунньу 1 күнүгэр Уус Алдан улууһун Бэрт Ууһун нэһилиэгэр Саха Республикатын физическэй култуураҕа уонна спорка министиэристибэтин специалистара кыттыылаах сэргэх спортивнай тэрээһин ыытылынна. Манна, куораттан кэлбит бөлөҕү СР Спорка миниистирин солбуйааччы Александр Бугаев, СР физическэй култуураҕа уонна маассабай спорка управлениетын начаалынньыга Николай Цыпандин салайан илдьэ сырыттылар. Кроссфит, аэробика, остуол оонньуулара, чэбдигирдэр гимнастика курдук спорт көрүҥнэригэр маастар-кылаастар ыытылыннылар.

Спорт сайдыытыгар инники былааннар тустарынан “төгүрүк остуол” тула сэһэргэһии буолла, мас тардыһыытыгар аан дойду икки төгүллээх чемпиона Дмитрий Попов үөрэнээччилэри кытта көрсөн истиҥ кэпсэтии ыытта. Кини бу көрсүһүүгэ, тус тренерэ – РФ, СР үтүөлээх тренерэ Петр Давыдовы, бииргэ эрчиллэр доҕоро, Манчаары оонньууларын муҥутуур кыайыылааҕа Эрчим Баппаҕайы уонна Сурдлимпиада көҥүл тустууга чемпиона, РФ спордун үтүөлээх маастара Василий Стрекаловскайы кытта кэлбит.

Оттон киэһэ 17 чаастан мас тардыһыыга аан дойду, Россия уонна Манчаары оонньуутун иккилии төгүллээх чемпиона, Саха Республикатын биэс төгүллээх чемпиона, Аан дойду кубогын икки төгүллээх кыайыылааҕа, мас-рестлиҥҥэ РФ уонна СР спортарын маастара, сахалыы ыстаныыларга СР спордун маастара Дмитрий Попову чиэстээһин буолла.

Биир дойдулаахтара, уоллара Дмитрий аан дойду икки төгүллээх чемпиона буолбутунан итиэннэ киниэхэ норуоттар икки ардыларынааҕы кылаастаах спорт маастара үрдүк аат иҥэриллибитинэн, нэһилиэк бастыҥ, киэн тутта ааттыыр ыччата буоларынан астынан туран, бар дьонун аатыттан итиитик-истиҥник эҕэрдэлээтилэр. Инникитин үрдүктэн-үрдүк чыпчааллары дабайан, куруук инники күөҥҥэ сылдьарыгар баҕардылар. Чөл доруобуйаны, эрчимнээх, инникигэ эрэллээх эдэр сааһы, спорка анаммыт дьикти кэмнэрин олоҕун биир чаҕылхай түгэннэрин быһыытынан хаһан да умнуллубатын, бүгүн эйигин эҕэрдэлии кэлбит бар дьонуҥ, биир дойдулаахтарын алгыстара куруук инникигэ, үрдүккэ кынаттаатыҥ диэн алгыстарын тиэртилэр.

Бу дьоро киэһэ Дмитрий Поповка үөрүүлээх быһыыга майгыга Саха Республикатыгар физическэй култуура уонна спорт сайдыытыгар көмөтүн иһин анал бэлиэ туттарылынна уонна Бэрт Ууһун Бочуоттаах гражданина аат иҥэрилиннэ.

Чиэстээһиҥҥэ Уус Алдан улууһун баһылыга Алексей Федотов, Бэрт Ууһун нэһилиэгин баһылыга Юрий Колодезников, улуус уонна нэһилиэк спорка актива кыттыыны ыллылар.

“Дьулурҕан”.

Добавить комментарий

Ваш e-mail не будет опубликован. Обязательные поля помечены *