Ярыгин турнирын тула тус санааларым

Бу күннэргэ Красноярскайга, Иван Ярыгин аатынан көҥүл тустууга норуоттар икки ардыларынааҕы Гран-при турнир үгэннээн ыытылла турар. Биир сыллаах тохтобул кэнниттэн бу улахан таһымнаах түһүлгэҕэ саха тустууктара кыттыыны ылан, икки мэтээллэннилэр. Ол курдук, Николай Охлопков турнир үрүҥ көмүс, Эдуард Григорьев боруонса мэтээлэринэн наҕараадаланнылар.

Кырдьык да, бу күннэргэ тустуунан олордубут. Тустууну таптааччылар бэйэбит икки ардыбытыгар элбэх кэпсэтии, ырытыһыы, санаа атастаһыыта бөҕө. Бүгүҥҥү суруйуубар “Ыйыт –хоруйдуубун” диэн рубрикаҕа маарыннатан, бэйэм тус санаабын атастаһан, тустууну сэҥээрээччилэр ыйытыыларыгар хоруйдуубун.

Федор: “Тютрины, Владимировы “Иван Ярыгин” турнир кыттыылаахтара диэххэ сөп дуо?”

-Тус санаабар, кинилэри турнир кыттыылаахтара диэнтэн туттунабын. Тютриннаах Владимировы, билиҥҥи бөрүкүтэ суох балаһыанньа “сиэртибэлэрэ” буоллулар диэххэ сөп.

Кылгастык ону быһааран биэрдэххэ, Тустуу аан дойдутааҕы түмсүүтүн (UWW) балаһыанньатынан, рейтиннээх турнирдарга ыйааһын ахсын дойду аайыттан үстүү киһиттэн элбэх киһи киллэриллибэт. Ол гынан баран, маннык түгэни Россия спортивнай тустууга федерацията олох астыммат уонна ыйааһын аайы биэстии кыттааччыны киллэттэрэргэ туруорсар. Бастаан утаа, анараалар сөбүлэһиэх курдук буолан баран, турнир саҕаланыыта кэлэн син биир бэйэлэрин балаһыанньаларын токуруппаттар. Онон син эмиэ былырыыҥҥы курдук, Иван Ярыгин турнирыгар Россияттан биэстии киһи талыллан баран, турнирга үстүү эрэ киһи киллэрилиннэ. Маннык балаһыанньаҕа – ыксаан, ситэри сиэрдээх буоллун диэн, турнирга киириигэ эбии сүүмэрдиир хапсыһыылары (прикидканы) ыыттылар. Билэргит курдук, Семен Владимиров уонна Арыйан Тютрин итинник сүүмэрдээһиҥҥэ кыттан хотторон, балаһыанньа быһыытынан, Иван Ярыгин аатынан турнир сүрүн сеткатыгар киирбэтилэр.

Биирдэ ылан көрдөххө, кинилэр син биир турнир кыттыылаахтарын курдук бэлэмнэниини, эрчиллиини, бииргэ ыйааһыннаныыны бараллар итиэннэ спортсмен быһыытынан турнир бейджигин (түөскэ кэтиллэр киирии бэлиэтин) ылаллар. Ол гынан баран, эппитим курдук, сүүмэрдиир киирсиигэ хотторон хаалан, турнир сеткатыгар, официальнай боротокуолга киирбэттэр. Ону сорохтор өйдөөбөккө, Семен Владимировпытын прикидкаҕа хоппут Магомедрасул Идрисов финалга тахсыбытынан, уолбут “уоскутар” бөлөххө тоҕо киирбэтэ диэн ыйыталлар. Эппитим курдук уонна хомойуох иһин, кинилэр прикидкаҕа хотторбуттарын быһыытынан, турнир боротокуолугар киирбэтэх буолан – салгыы күрэхтэспэттэр. Ити баар балаһыанньа уонна мин тус санаам, атыттар туох дииллэрэ буолла?

Алексей: “Сахалар кыттыыларын хайдах сыаналыыгын?”

-Быйыл Иван Ярыгин аатынан турнирга Николай Охлопков иккис, Эдуард Григорьев үһүс миэстэлэри ылан, Саха сирин тустуута баарын, тыыннааҕын уонна кэскиллээҕин өссө төгүл биллэрдилэр. Былырыын бу турнирга биир даҕаны бөҕөспүт сүүмэрдээһини сатаан ааспакка – кыттыбатаҕа. Онон быйылгы кыттыыны тус бэйэм үчүгэйинэн сыаналыыбын. Ол гынан баран, түөһү охсунар табыллыбат. Саха тустуутугар билигин барыта эриэ-дэхси буолбатах, уустук кэм бүрүүкээн турар дии саныыбын. Буолбуту, ситиһиллибити куруук мыынар, өрүү үрдүккэ, кыайыыга талаһар буолуохха. Ол эбэтэр, саамай улахан ситиһиилэр – Олимпиада, аан дойду, Европа мэтээллэрэ!

Кылгастык уолаттарбыт кыттыыларын ырыттахха, Арыйан Тютрин кылгас кэмҥэ аһара элбэх ноҕуруусканы ылан, илистэн хаалан хоттордо. Итини мин, сүүмэрдээһин систиэмэтэ сыыһа диибин. Сүрүн күрэхтэһии саҕаланыа биир нэдиэлэ иннинэ аһара элбэх кыттааччылаах күрэхтэһиини тэрийии, өссө турнирга киириигэ эбии хапсыһыыны ыытыы сыанан-арыынан аҕаабат. Турнирга анаан кыттарга бэлэмнэнэн барбыта эбитэ буоллар, кыайара хаалла. Уопсайынан, быйыл күһүҥҥүттэн, Коркин турнирыттан ыла сэттэтэ (!) күрэхтэһиннэрбиттэрэ – аһара элбэх. Итини мээнэ киһи тулуйбат.

Эдуард Григорьев эмиэ итинник балаһыанньаҕа тустан, илистэн хаалан, толору кыаҕынан тустубата. Оттон Охлопковка төттөрүтүн, сэтинньигэ Румыниятааҕы күрэхтэһиитин кэнниттэн, биир-икки күрэхтэһии тиийбэтэ дии саныыбын. Онон Николай эмиэ туохха дьоҕурдааҕын толору аһан көрдөрбөтө.

Семен Владимировка түһүлгэ дьолуота тосхойбото. Миндиашвили турнирыгар үчүгэйдик аһыллан тустубута. Ылан көрдөххө, кини прикидкаҕа турнир кыайыылааҕынан тахсыбыт Идрисовка хоттордо. Арай турнирга киирбит буоллун…

Петр ПАВЛОВ.    

Добавить комментарий

Ваш e-mail не будет опубликован. Обязательные поля помечены *