Биир хаартыскаттан сэдиптээн…

Аҕыйах хонуктааҕыта ватсаапка тустуу бөлөҕөр эһиги бу көрөр хаартыскаҕытын таһаарбыттара. Онно тренер Д.П. Коркин баһылыктаах Саха сирин көҥүл тустууга хамаандата көбүөр кытыытыгар турара көстөр. Хаартыскаҕа уҥаттан хаҥас: тренер Дмитрий Петрович Коркин, тустууктар Василий Алексеев, Роман Цыпандин, Петр Бурцев, Иван Сивцев, Анатолий Константинов, Александр Кардашевскай, Павел Пинигин, Захар Чукров, Юрий Андреев уонна Анатолий Лезнов тураллар. 

Хаартыска ис хоһоонун удумаҕалатар буолан, икки күнү быһа көрдөөн, бэйэм архыыппыттан бу күрэхтэһии, чопчулаан эттэххэ, табаарыстыы көрсүһүү туһунан хаһан эрэ аахпыппын өйдөөн, альбомнарбыттан хасыһан, ол хаһыат саһарбыт суруйуутун булан ыллым. Ити, 1982 сыллаахха Дьокуускайга, “Спартак” стадиоҥҥа Саха сирин уонна Монголия көҥүл тустууга сүүмэрдэммит хамаандаларын табаарыстыы көрсүһүүлэрэ…

Сотору буолаат, бу хаартысканы “Албан” тустууну таптааччылар кулууптарын салайааччыта Сэмэн Архипов Фейсбукка бэйэтин страницатыгар таһаарбыта. Онно,  бу хаартыска быһаарыытын биэрэ сатаан араастаан суруйаллар. Историяны буккуйаллар. Чэ, ону бэйэҕит булан көрөөрүт. Оттон мин, бу хаартыска туһунан dzulurgan.ru сайтка хаһыакка хайдах баарынан – быһааран суруйарга сананным.

“Кыым” хаһыаттан кырыллыбыт суруйуу аата “Доҕордоһуу түһүлгэтэ” диэн, ааптара – биллиилээх спортивнай суруналыыс Иван Кычкин. Фотограф Р.Захаров икки хаартыската бэчээттэммит.

Ол 37 сыллааҕы саһарбыт ыстатыйа бу баар:

Мөлтөхтүк көстөрүн быһыытынан, көбүөргэ хапсыһыылар хайдах түмүктэммиттэрин билиһиннэрэбин:

48 кг: Василий Алексеев – Ж.Батсайханы 14:2 ахсаанынан ыраастык кыайбыт.

52 кг: Роман Цыпандин – Д.Ганболд, монгол атаҕар эчэйиилээх буолан туста тахсыбатах.

57 кг: Петр Бурцев – Н.Ганбаатары кууһан ылан, кэдэрийэн бэйэтин нөҥүө быраҕан, ыраастык кыайбыт.

62 кг: Анатолий Константинов – Д.Оюнболдка 4:9 ахсаанынан хотторбут.

68 кг: Иван Сивцев – А.Энхээҕэ бааллынан хотторбут.

68 кг: Александр Кардашевскай – Л.Нямааҕа бааллынан хотторбут.

74 кг: Александр Киселев – Ж.Даваажавка бааллынан хотторбут.

74 кг: Павел Пинигин – Д.Баяраа, 0:0, бөҕөстөргө иккиэннэригэр хотторуу бэриллибит.

82 кг: Захар Чукров – З.Дубчины 3:1 ахсаанынан кыайбыт.

90 кг: Юрий Андреев – А.Баатархууга бааллынан хотторбут.

+100 кг: Анатолий Лезнов – О.Бахаты бааллынан кыайбыт.

Онон Саха сирэ – Монголия тустууктарын табаарыстыы көрсүһүүлэрэ 5:5 ахсаанынан, тэҥнэһиинэн түмүктэммит.

Ити күн хамаандалар биэс ыйааһыҥҥа иккистээн көбүөргэ киирсибиттэр. Онуоха көрсүһүү 3:2 ахсаанынан биһиэннэрин кыайыытынан түмүктэммит.

48 кг: Егор Алексеев – Батсайханы ыраастык кыайбыт.

57 кг: Егор Старостин – Ганбаатары бааллынан кыайбыт.

68 кг: Михаил Сибиряков – Нямааҕа бааллынан хотторбут.

68 кг: Максим Аммосов – Энхээҕэ бааллынан хотторбут.

+100 кг: Игорь Кудрявцев – Бахаты ыраастык кыайбыт.

Петр ПАВЛОВ.

 

 

Добавить комментарий

Ваш e-mail не будет опубликован. Обязательные поля помечены *