Күрэхтэһии түмүгүнэн бастыҥнар сүүмэрдэннилэр

Кулун тутар 18 күнүгэр Нам улууһугар көҥүл тустууга Ленскэй нэһилиэк баһылыга Петр Сокольников бирииһигэр маҥнайгы республикатааҕы, 2009-2010 сс. төрөөбүт оҕолор ортолоругар киин зона сүүмэрдиир сборун күрэхтэһиитэ түмүктэннэ.

Петр Юмшанов аатынан Оҕо спортивнай оскуолатыгар ыытыллыбыт көҥүл тустуу көбүөрүгэр Хаҥалас, Кэбээйи, Горнай, Нам улуустарыттан уонна Дьокуускай, Нерюнгри, Алдан куораттарыттан уопсайа 75 спортсмен кэлэн 12 ыйааһыҥҥа кытынна.

Нам улууһугар көҥүл тустуу МР Ленскэй нэһилиэк баһылыгын турнира атын улуус зоналарын баһылыктарыгар ыҥырыы буолла, хас сааскы каникул ахсын сбордар тэриллэллэригэр маннык күрэхтэһиилэр ыытыллалларын ситиһиэхпит.

“Көҥүл тустууга Саха сиригэр бу үөрэх чиэппэриттэн каникул ахсын сылы төгүрүччү бөлөхтөрүнэн бэлэмнэнии саҕаланыа. Манна 1-2 миэстэлэргэ тахсыбыт 24 оҕо сааскы сынньалаҥҥа Намҥа сборданыахтара.

Маннык күрэхтэһиилэри биһиги биир дойдулаахпыт, оҕолорго республика старшай тренерэ Кузьма Сивцев былааннаан үлэлэтэ сылдьар. Оҕолорго буолар күрэхтэһии Ленскэй нэһилиэк баһылыга Петр Сокольников бирииһигэр бастакынан буолар. Инникитин күрэхтэһиилэрбит баһылыктар ааттарынан буоллаҕына, оҕо спордун сайдыыта түргэн тэтимнээхтик барарыгар эрэл улахан.

Күрэхтэһии сынньалаҥын быыһыгар бу соторутааҕыта Намнаа5ы 1-кы нүөмэрдээх И.С. Гаврильев аатынан оскуола иһинэн Бүтүн Россиятааҕы БОРЬБА В ШКОЛУ программата хайдах үлэлээн саҕалыахтааҕын кэлбит улуус тренердэригар оскуола дириэктэрэ Николай Григорьевич Парников сырдатта, билиһиннэрдэ.

Проекка киирбитинэн, сүүмэрдээиһин ааспыт оҕолорго анал үөрэтэр-эрчийэр түмсүү сайыҥҥы каникул кэмигэр Дьокуускай куоракка ыытыллара былааннана.

Харысхан, Ленскэй нэһилиэгин Пресс сулууспата.

Нам.