Бу өрөбүллэргэ – «Аланнар»


Бу өрөбүллэргэ, ахсынньы 8-9 күннэригэр Хотугу Осетия киин куоратыгар Владикавказка көҥүл тустууга “Аланнар-2018” норуоттар икки ардыларынааҕы II турнир ыытыллар. Балаһыанньа быһыытынан бу турнир кыайыылаахтара – Тустуу аан дойдутааҕы түмсүүтүн (UWW) рейтиннээх күрэхтэһиитигэр – 2019 сыл тохсунньу ыйын бүтүүтэ Красноярскайга буолар Иван Ярыгин аатынан Гран-при турнирга кыттар быраабы ылыахтара.

Күрэхтэһиигэ 15 дойду бөҕөстөрө кытталлара күүтүллэр. Тэрийээччилэр суруйалларынан, АХШ, Иран, Грузия, Азербайджан хамаандалара кэлэллэрэ кэтэһиллэр. Хамаанда састаабыгар олимпийскай чемпионнар Владимир Хинчегашвили (Грузия), Шарип Шарипов (Азербайджан), аан дойду икки төгүллээх чемпиона Гено Петриашвили (Грузия) уо.д.а. күүстээх тустууктар кэлиэхтэрэ.

Балаһыанньа быһыытынан, ыйааһын аайы кыайыылаахтар – 5, иккистээбиттэр – 2, үһүстээбиттэр – 1 тыһ. долларынан наҕараадаланыахтара. Кыайыылааҕы бэлэмнээбит тренер 1 тыһ. долларынан бэлиэтэниэҕэ.

Бу улахан түһүлгэҕэ Саха сириттэн Россия спортивнай тустууга федерациятын ыҥырыытынан – Пётр Копылов, Арыйаан Тютрин (57 кг), Петр Павлов, Эдуард Григорьев, Ньургун Александров (61 кг), Дьулустан Булатов, Виктор Рассадин (65 кг), Тимур Николаев (70 кг) кытталлар. Ону тэҥэ аҕыйах хонуктааҕыта Россия Кубогар 57 киилэҕэ биирдиилээн түмүккэ бастаабыт Федор Постников тустара күүтүллэр.

Тустууктарбытыгар ситиһиилэри баҕарыаҕыҥ!

Турнир бырагыраамата

Ахсынньы 7 күнэ, бээтинсэ

22:00-23:00 – 57, 61, 65, 70, 74, 79, 86, 92, 97, 125 киилэҕэ кыттааччылар ыйааһыннаныылара.

Ахсынньы 8 күнэ, субуота

17:00-01.00 — бары ыйааһыннарга барыллааһын уонна финалга тахсар иһин хапсыһыылар.

Ахсынньы 9 күнэ, баскыһыанньа

17:00-23:00 — «уоскутар” бөлөх тустуулара, үһүс миэстэ иһин киирсиилэр.

23:00-23:30 — турниры үөрүүлээхтик аһыы.

23:30-01:30 — финаллар уонна кыайыылаахтары наҕараадалааһын.

PS: Бырагыраамаҕа Саха сирин бириэмэтэ ыйылынна.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *

3 + 17 =