Намнар иккис буоллулар

Кулун тутар 8-12 күннэригэр Ленскэй куоратыгар волейболга эр дьон бастакы лигатыгар Саха Республикатын чемпионата ыытыллан түмүктэннэ. Ол курдук, икки бөлөҕүнэн аҕыс күүстээх хамаанда көрсөн, бэйэлэрин бөлөхтөрүгэр кыайыылаахтары быһаарыстылар.

Биллэрин курдук, “А” бөлөххө: Дьокуускай, Мэҥэ Хаҥалас, “Б” бөлөххө: Нам, Ленскэй хамаандалара ситиһиилээхтик оонньоон, салгыы күрэхтэһиигэ тахсыбыттара.

Төрдүс күн түмүгүнэн, Ленскэй – Дьокуускайы 3:0, Нам – Мэҥэ Хаҥалаһы 3:1 ахсааннарынан кыайан, финалга бастакы-иккис миэстэлэри былдьаһа тахсыбыттара. Онтон үһүс-төрдүс миэстэлэри былдьаһыыга Дьокуускай Мэҥэ Хаҥалас хамаандаларын киирсиилэрин түмүгэр, Дьокуускай кыайыылаах тахсан, 100 тыһыынчалаах сертификаты тутта.

Финалга Ленскэй хамаандата намнары 3:1 ахсаанынан хотон, чемпион үрдүк аатын ылла уонна 300 тыһыынча сууммалаах сертификаты дьиэтигэр илдьэ хаалла. Нам хамаандата иккис миэстэни ылан, 200 тыһыынчалаах сертификатынан бэлиэтэннэ.

Анал бириистэринэн Намтан Павел Обутов “Бастыҥ туруорааччы” уонна Семен Васильев “Туһалаах оонньооччу” бириистэринэн наҕараадаланнылар.

Онтуон.