Дуобакка уонна саахымакка күрэхтэстилэр


Дьокуускайга ааспыт субуота уонна баскыһыанньа күннэргэ, Дуобат-саахымат киинигэр үөрэнээччилэр икки ардыларыгар хамаанданан республикатааҕы “Зимний этюд” диэн турнир буолан ааста.

Дуобакка 17 хамаанда күрэхтэстэ. Түмүккэ барыларыттан үгүс элбэх очукуону хомуйан эрэллээхтик 2-с нүөмэрдээх Национальнай политехническай оскуола оҕолоро кыайдылар. Хамаанда састаабыгар: Трофимов Виктор (кмс), Яковлев Эргис (кмс), Григорьева Екатерина (мс), Протопопова Айыына (кмс) оонньоотулар.

Иккис миэстэни Дьокуускай 5 №-дээх оскуолатын үөрэнээччилэрэ ыллылар. Бочуоттаах үһүс көрдөрүүнү “Саха гимназия” оскуолатын дуобатчыттара ситистилэр.

Сарсыныгар саахыматчыттар оонньоотулар. Маныаха бастакы миэстэни Айтал Местников, Николай Захаров, Айдын Местников, Юлия Михайлова састааптаах Дьокуускай куорат 17 №-дээх орто оскуолатын хамаандата ылла. Иккис миэстэҕэ куорат 2 №-дээх орто оскуолатын саахыматчыттара таҕыстылар. Үһүс бириистээх миэстэҕэ классическай гимназия оҕолоро тигистилэр. Барыта 16 хамаанда кыттыыны ылла. Кинилэр ортолоругар Покровскай, Өктөм, Тулагы, Маҕан оскуолаларын, Үөһээ Бүлүү лицейын хамаандалара бааллара.

Саахыматчыттартан Саха Республикатын аҕа баһылыгын Саҥа дьыллааҕы харыйатыгар Айдын Местников, дуобатчыттартан Анатолий Протодьяконов кыттар быраабы ыллылар.

Гаврил ВИНОКУРОВ, Бүтүн Россиятааҕы категориялаах судьуйа, күрэхтэһии кылаабынай судьуйата.

Добавить комментарий

Ваш e-mail не будет опубликован. Обязательные поля помечены *