Кунаев турнира: Иван Ефремов бастаата!


Казахстан Тараз куоратыгар Динмухамед Кунаев кэриэһигэр көҥүл тустууга норуоттар икки ардыларынааҕы турнир ыытыллан түмүктэннэ. Бүгүн, сэтинньи 25 күнүгэр биэс ыйааһыҥҥа кыайыылаахтар быһаарылыннылар. Үөрүүлээҕэ, Саха сирин хамаандатын бөҕөһө Иван Ефремов 70 киилэҕэ кыайыылааҕынан таҕыста.

Кылгастык бүгүҥҥү тустууну билиһиннэрдэххэ, 65 киилэҕэ Белоруссия чиэһин көмүскүүр Ньургун Скрябин турнир боруонса мэтээлин иһин тустууга көбүөр хаһаайына Тимур Айткуловы 4:2 ахсаанынан хотон, пьедестал үһүс үктэлигэр таҕыста.

Бу ыйааһыҥҥа бастакы миэстэни казах Ильяс Жумай ылла. Быһаарыылаах хапсыһыыга киниэхэ 7:8 ахсаанынан сабырыйтарбыт Меиржан Аширов (Казахстан) иккис буолла.

70 киилэҕэ Иван Барашковпыт үһүс бириистээх миэстэ иһин киирсиигэ казах Аслан Куанышбаевка 7:11 ахсаанынан хотторон кэбистэ. Ол оннугар Горнай улууһун ыччата Иван Ефремов кыахтаахтык туһунна. Кини түһүлгэ кыайыылааҕын аатын ким ыларын быһаарар бүтэһик хапсыһыыга Нуркожа Кайпановы 7:2 ахсаанынан кыайда.

Онон Д.Кунаев кэриэһигэр норуоттар икки ардыларынааҕы турнирга быйыл биһиги бөҕөстөрбүт алта мэтээллэннилэр: Иван Ефремов бастакы, Ньургун Александров иккис, Арыйан Тютрин, Семен Владимиров, Ньургун Скрябин уонна Герман Устинов үһүс миэстэлэри ыллылар. Санатан эттэххэ, бастакы миэстэҕэ 4000$, иккискэ 2000$, үһүс миэстэҕэ 500$ уонна кыайыылаах тренеригэр 500$ харчынан бириистэр туттарылыннылар.

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *