Кунаев турнира: Билиҥҥитэ түөрт мэтээллээхпит…

Казахстан Тараз куоратыгар Динмухамед Кунаев кэриэһигэр көҥүл тустууга норуоттар икки ардыларынааҕы турнир биэс ыйааһыҥҥа кыайыылаахтара билиннилэр. Эрдэ dzulurgan.ru сайтка суруйбуппут курдук, бу турнирга бастакы күн түмүгүнэн биэс бөҕөспүт мэтээл иһин туһунна.

Ол курдук, 57 киилэҕэ Арыйан Тютрин боруонса мэтээл иһин тустууга казах Бердак Примбаевы 5:4 ахсаанынан хотон, пьедестал үһүс үктэлигэр таҕыста.

61 кг ыйааһыҥҥа үһүс бириистээх миэстэ иһин бэйэбит бөҕөстөрбүт: Семен Владимиров уонна Петр Павлов кииристилэр. Онуоха 9:2 ахсаанынан кыайыыны Семен Владимиров ситистэ.

Бу ыйааһын финалыгар Ньургун Александровпут көбүөр хаһаайына Расул Калиевка (Казахстан) 2:3 ахсаанынан сабырыйтаран, үрүҥ көмүс мэтээл хаһаайынынан буолла.

Герман Устиновпыт (74 кг) боруонса мэтээл иһин тустууга Бейбарыс Нуриллаулыны (Казахстан) 6:4 ахсаанынан хотто.

Аны бүгүн, 65 уонна 70 кг ыйааһыннарга тустар уолаттарбыт күрэхтэһиини саҕалаатылар. Соторутааҕыта Дьокуускай куорат аһаҕас чемпионатын кыайыылааҕынан буолбут Револий Самсонов бастакы эргииргэ Н.Садык диэн Казахстан бөҕөһүн кыайан баран, салгыы эргииргэ Ильяс Жумайга (Казахстан) хотторон кэбистэ. Ол эрээри, киһитэ финалга тахсыбытынан, уолбут сарсын “уоскутар” бөлөххө” боруобаланар буолла.

Дьулустан Булатов казах Н.Турганы хотон баран, иккис эргииргэ Нь.Скрябиҥҥа сабырыйтарда.

Оттон “белорус” Скрябин тустуутун билиһиннэрдэххэ, бастаан казах Жаксыбайы, онтон Булатовы, салгыы монгол Батчулууну утуу-субуу кыайталаан баран, финалга тахсар иһин киирсиигэ Ильяс Жумайга 4:9 ахсаанынан хоттордо. Онон сарсын кини турнир боруонса мэтээлин иһин тустуоҕа.

70 киилэҕэ, 23-гэр диэри саастаахтарга аан дойду чемпионатыгар бэлэмнэнэригэр Николай Охлопковка спарринг-партнер быһыытынан сылдьыбыт Тимур Николаев бастакы эргииргэ Россия былырыыҥҥы чемпиона, аан дойду үрүҥ көмүс призера Алан Гогаевы (Хотугу Осетия) хотон сүрдээҕин үөртэ. Ол эрээри, салгыы күрэхтэһиигэ Р.Рамазановка хотторон кэбиһэн хомотто.

Оттон Иван Барашков икки утарсааччытын кыайан баран, финалга тахсар иһин тустууга казах Н.Кайпановка 4:6 ахсаанынан хотторон кэбистэ. Онон эмиэ сарсын боруонса мэтээл иһин тустуоҕа.

Бу ыйааһыҥҥа үһүс киһибит – Иван Ефремов киргиз Догдурбегы, бурят Боровицкайы уонна финалга тахсар иһин киирсиигэ били Тимур Николаевы хоппут Рамазановы кыайталаан, финалга таҕыста. Онно уолбут казах Кайпановы кытта тустуоҕа. Манан сибээстээн биир түгэни санаан ыллым, хас да сыллааҕыта Иван Ефремов Казахстаҥҥа ыытыллыбыт эдэрдэргэ турнирга 60-ча кыттааччыттан дьиҥнээх кытаанах характерын көрдөрөн, бэйэтин ыйааһыныгар бастаан турардаах. Бу да сырыыга бөҕөспүтүгэр ыалдьабыт.

Аахпыккыт курдук, билиҥҥитэ Тараз түһүлгэтиттэн – 1 үрүҥ көмүс, 3 боруонса мэтээллээхпит. Аны сарсын түөрт уолбут мэтээл иһин тустар.

Чэ, ити курдук, Казахстаҥҥа ыытылла турар Д.Кунаев кэриэһигэр норуоттар икки ардыларынааҕы турнирга уолаттарбыт тустууларын кылгастык билиһиннэрдэххэ. Биһиги dzulurgan.ru сайтпытын өрүү кэтээн көрө сылдьыҥ! Тустуу бүтэһик сонуннарын кытта билсиҥ!

Ковер А: https://www.youtube.com/watch?v=PNg_Ag2LzL0
Ковер Б: https://www.youtube.com/watch?v=Jn7c3JVBSKk

Петр ПАВЛОВ.

 

Добавить комментарий

Ваш e-mail не будет опубликован. Обязательные поля помечены *