Сытыы хапсыһыылары көрүөхпүт


Эрдэ иһитиннэрбиппит курдук, сэтинньи 2-3 күннэригэр Дьокуускай куорат физическэй култуураҕа уонна спорка управлениетын (начаалынньык К.С. Бурцев) итиэннэ куорат тустууга федерациятын (толорооччу дириэктэр Ф.А. Соловьев) көҕүлээһиннэринэн “Кыайыы 50 сыла” Спорт дыбарыаһыгар – Россия физическэй култуураҕа уонна спорка үтүөлээх үлэһитэ, Саха Республикатын үтүөлээх тренерэ Валерий Петрович Керемясов кэриэһигэр Дьокуускай куорат көҥүл тустууга аһаҕас чемпионата ыытыллар.

Биллэрин курдук, Дьокуускай куорат көҥүл тустууга чемпионата 1956 сылтан ыытыллар. Бастакы чемпионнарынан Михаил Баранов, Конон Попов, Ким Марков, Иван Малыхин, Василий Румянцев, Григорий Семенихин буолаллар. Онтон XXI үйэҕэ республика киин куоратын тустууга күрэхтэһиитэ 2009 сылтан сөргүтүллүбүтэ. Быйылгыттан ыла чемпионат Дьокуускай куорат көҥүл тустууга хамаандатын сүрүн тренеринэн үлэлии сылдьыбыт В.П. Керемясов аатынан ыытыллар.

Тэрийээччилэр иһитиннэрбиттэринэн, билиҥҥитэ чемпионакка кытталларын биллэрэн сүүсчэкэ сайаапка киирбит. Холобур, Р.М. Дмитриев аатынан Олимпийскай эрэл училищетыттан 30-ча, Чурапчытааҕы физическэй култуура уонна спорт институтуттан уонна Үрдүкү спортивнай маастарыстыба оскуолатыттан биир итиччэ, Тыа хаһаайыстыбатын государственнай академиятыттан 8, ону тэҥэ М.К. Аммосов аатынан Хотугулуу-Илиҥҥи федеральнай университеттан, Намтан сайаапкалар киирбиттэр.

Чемпионат кылаабынай судьуйатынан – республикатааҕы категориялаах судьуйа, СР хапсаҕайга маастара Станислав Афанасьев, оттон кылаабынай секретарынан – эмиэ республикатааҕы категориялаах судьуйа, көҥүл тустууга РФ, хапсаҕайга СР спортарын маастара Василий Уйгуров үлэлиэхтэрэ. Кинилэр иккиэн күрэхтэһиини тэрийэн ыытыыга үөрүйэхтээх специалистар. Онон чемпионат туох да мөккүөрэ суох, эриэ-дэхситик ыытылларыгар эрэл баар.

Биллиилээх бөҕөстөртөн устудьуоннарга Россия уонна аан дойду, этэргэ дылы буруолуу сылдьар чемпионнарын Эдуард Григорьевы, Россия чемпионатын боруонса призера Арыйан Тютрины, Саха сирин хас да төгүллээх чемпиона Константин Власовы, Россия чемпионатыгар бэһис миэстэлээх Петр Павловы уо.д.а. көрүөхпүт. Тренердэр эппиттэринэн, Виктор Рассадинтан уонна бырааттыы Копыловтартан ураты, атахтарыгар турар тустууктар бары кытталлар үһү.

Аны бириис туһунан кыратык быктардахха, бастакы миэстэ иһин – Телевизор, иккискэ – Навесной шатер, үһүстэргэ – Перефератор бириистэр бэлэмнэммиттэр. Ону таһынан бириистээх миэстэлэргэ тиксибиттэргэ туһааннаах мэтээллэр, грамоталар туттарыллыахтара.

Чемпионат бырагыраамата:

Сэтинньи 2 күнэ, бээтинсэ

14:00-18:00 – мандатнай хамыыһыйа үлэтэ (ДЮСШ № 3, Ленин проспегын 3/3).

16:00-16:30 — судьуйалыыр коллегия хамаандалар бэрэстэбиитэллэрин кытта сүбэ мунньаҕа.

16:30-17:30 — кыттааччылары сэрэбиэйдээһин.

Сэтинньи 3 күнэ, субуота

08:00-08:30 – бөҕөстөр медицинскэй көрүүнү барыылара, ыйааһыннааһын (57, 61, 65, 70, 74, 79, 86, 92, 97, 125 кг).

10:00-12:00 – барыллааһын хапсыһыылар. 12:00-12:30 – чемпионаты үөрүүлээхтик аһыы.

12:30-18:00 – күрэхтэһии салгыыта, финаллар, кыайыылаахтары наҕараадалааһын.

Санатан эттэххэ, күрэхтэһиини көрө киирии – 100 солк. төлөбүрдээх (оҕолорго уонна бэтэрээннэргэ босхо).

Петр ПАВЛОВ.

Добавить комментарий

Ваш e-mail не будет опубликован. Обязательные поля помечены *