Сардаана бэйэтигэр эрэлэ өссө күүһүрдэҕэ  

Токиотааҕы Олимпиада спорт историятыгар биир саамай уустук кэмҥэ ыытыллыбыт оонньууларынан хаалыахтара. Дьахталлар марафоҥҥа сүүрүүлэрин сахалар ханна даҕаны сэҥээрэн көрдүбүт, кэтээтибит буолуо. Сардаана Трофимовабыт үстэ  Олимпиадаҕа кыттар бириэмэни көрдөрбүтэ даҕаны, Арассыыйаттан кыттыахтаах 10 киһи ахсааныгар киллэрбэккэлэр, барбатаҕыттан – хомойуубут улахан этэ.

Күүппүттэрин курдук, Кения дьахталлара бэйэлэрин кыахтарын бу да сырыыга көрдөрдүлэр: кыһыл көмүс мэтээл – Перес Джепчирчир (2:27.20), үрүҥ көмүс – Бриджит Косгеи (2:27.36), Америка Холбоһуктаах штаттарын сүүрүгэ Молли Сейдел боруонса мэтээли ылыыта соһуччу буолла – 2:27.46. Марафон историятыгар америкалар Олимпиадаҕа бастакы мэтээллэрэ. Беларусь спортсменката Ольга Музуронак 2:29.06 бириэмэлээх бэсиһинэн фиништээтэ. Кини Рио Олимпиадатыгар эмиэ бэһистээбитэ, чемпионаабыт Кения сүүрүгүттэн Джемима Джалагат Сумгогтан (2:24.04) 44 сөкүүндэ хаалбыта (2:24.48).

Социальнай ситимнэргэ “Сардаана Трофимова Олимпиадаҕа баарта буоллар миэстэлэһиэ эбит”, – диэччилэр элбэхтэр. Мин марафонец, сахалартан марафоҥҥа маҥнайгы ССРС спордун маастарыттан, СӨ үтүөлээх тренериттэн Артур Егорович Феофановтан ыйыттым: “Сардаанабыт хайаһыах этэй?”, – диэн.

Онуоха кини ватсабынан ыыппыт эппиэтин аҕалабын: “Тэҥҥэ сүүрүө эбит. Ону хантан ылан эттиҥ диэтэххэ, үстэ чугас-чугас бириэмэҕэ субуруччу олимпийскай норматив көрдөрөн сүүрбүтэ буолар. Ити кэлбит бириэмэлэринэн үстэ субуруччу сүүрбүтэ элбэҕи этэр. Сардаана ситиһиилээхтик сүүрүөҕэ хаалбытын дакаастыыр”.

Сардаана Трофимова тренеригэр Т.Ю. Жирковаҕа “Сардаанабыт киирсиэ эбит” диэн суруйбуппар, кылгастык: “Оннук” диэн хардарда.

Биһиги бу күннэргэ Хотугу Кавказ Железноводскай куоратыгар санаторийга баран сынньанан, эмтэнэн кэллибит. Сардаана Трофимова Кисловодскайга дьарыктана сылдьар. Баран көрүстүбүт. Курорт-куорат аан дойдуга аатырар пааркатыгар эбиэттээтибит, 2 чаастан ордук кэпсэттибит. Сардаана настарыанньата үчүгэй, дьарыга үчүгэйдик баран иһэр.

-Токиоҕа хайдах сүүрүөхтэрэй, – диэбиппэр, – бириэмэлэрэ наһаа түргэн буолбата буолуо, кенийкалар кыайыахтара, – диэбитэ. Лидердэри үксүлэрин билэбин диир. Аны үс сыл тулуйан дьарыктанар былааннаах. Кыраныысса таһыгар Россия сүүрүктэрэ тахсаллара көҥүллэммитинэн, норуоттар икки ардыларынааҕы күрэхтэһиилэргэ кыттар былааннаахтар.

Сардаананы кытта икки ый курдук Чурапчы эдэр сүүрүгэ Константин Драгунов бииргэ дьарыктаммыт. Ийэтэ Мария кыыһын кытта сылдьыһан баран, дойдутугар кэлбит. Тренерэ Татьяна Жиркова от ыйыгар сылдьыспыт. Спорт үтүөлээх маастара төһө да сааһыран эрдэр, бытаан, уһун кросстарга Сардаананы кытта билигин даҕаны тэҥҥэ бииргэ сүүрсэрин билэбит. Хонтуруоллуур дьарыктары оҥорбуттар, дьарыгын корректировкалаан биэрбит. Кисловодскайга квартира куортамнаһан олорор, онно бородуукта атыылаһан аһыыр эбит. Куһаҕана диэн, эттэрэ амтана суох, миинэ барбат, эриһиинэ курдук. Онон дойдутун этин суохтуур, ахтар эбит. Атырдьах ыйыгар Киргизияҕа барар. Онно эмиэ куортамнаспыт квартиралаах эбит. Алтынньы саҥатыгар күрэхтэһии булан, кыраныысса таһыгар стартыыр былааннаахтар.

Олимпиада марафонун көрөн, Россия биэс төгүллээх чемпиона, аан дойду кылаастаах спорт маастара, сахалар эрэлбит Сардаана Трофимова санаата өссө бөҕөргөөбүтэ, бэйэтин кыаҕар эрэлэ күүһүрбүтэ, аны үс сылынан Париж Олимпиадатыгар кыттар санаата бигэтик кэлбитэ буолуо дии саныыбын. Өрөспүүбүлүкэ спорка салалтата, чэпчэки атлетика федерацията Сардаананы кытта бииргэ дьарыктанар сүүрүктэри сүүмэрдээн сыһыарара, сбордарга пейсмеркердэрдээҕэ буоллар, бэрт буолуо эбит дии санаатым.

Афанасий ИЛЛАРИОНОВ, суруналыыс.

Мэҥэ Хаҥалас.

Добавить комментарий

Ваш адрес email не будет опубликован. Обязательные поля помечены *

один × четыре =