Маннык үөрүүлээх түгэннэр үтүө үгэскэ кубулуйдуннар!

 

“Триумф” Спорка бэлэмнэнии киинин актовай саалатыгар, иллэрээ күн Башкортостан киин куоратыгар Уфаҕа ыытыллан түмүктэммит көҥүл тустууга эдэрдэргэ аан чемпионатын түмүгүнэн пресс-конференция буолла. Санатан эттэххэ, бу улахан эппиэттээх түһүлгэҕэ биһиги биир дойдулаахпыт, Мэҥэ Хаҥалас ыччата, Р.М. Дмитриев аатынан Олимпийскай эрэл училищетын устудьуона, Россия чемпиона Станислав Свинобоев 70-ҥа диэри киилэҕэ үһүс бириистээх миэстэҕэ тахсыбыта.

Станиславы бу түһүлгэҕэ кини тус тренерэ – Саха Республикатын үтүөлээх тренерэ Василий Петрович Уваров уонна республика эдэрдэргэ хамаандатын сүрүн тренерэ Василий Неустроев эрчийэн, бэлэмнээн кытыннардылар.

Олох бэҕэһээ курдук этэ дии, Станислав Свинобоев Иркутскайга ыытыллыбыт Россия эдэрдэргэ күрэхтэһиититтэн чемпионнаан кэлбитигэр, эмиэ маннык көрсүһүү тэриллибитэ. Аны билигин уолбут аан дойду түһүлгэтигэр ситиһиилээхтик кытынна. Манан, Саха сирин тустуута билигин даҕаны күүстээҕин, инникитин кэскиллээҕин итэҕэттэ. Маннык, спортсменнарбытын, тустууктарбытын эрэ буолбакка, атын да көрүҥнэргэ чулууларбытын чиэстиир, бэлиэтиир үөрүүлээх тэрээһиннэрбит элбээн иһэллэригэр баҕарабыт.

Бу ситиһии – билиҥҥи саха тустуутун салалтатын, федерациятын саҥалыы үлэтин биир көрдөрүүтүн быһыытынан сыаналаныан сөп. Итиэннэ тустууга олоҕун анаабыт улахан үөрүйэхтээх тренер Василий Петрович Уваров, дьоҕурдаах уонна улахан баҕалаах Стас Свинобоевы кытта ыкса ылсан айымньылаахтык, дьүккүөрдээхтик, хас эмэ сылы быһа ситимнээхтик үлэлээһинин үтүө түмүгэ. Василий Петрович дьаныардаах үлэтэ, үлэҕэ сыһыана атын эдэр тренердэргэ холобур буолуохтун. Этэргэ дылы, ситиһиилэр сиэттиһэн истиннэр!

Пресс-конференция хаамыытын билиһиннэрдэххэ, үөрүүлээх тэрээһини Саха Республикатын физическэй культураҕа уонна спорка миниистирэ Иннокентий Григорьев бэйэтинэн иилээн-саҕалаан ыытта. Кини, бу ситиһии биир санаалаах дьон түмсэн үлэлээһиннэринэн ситиһиллибитин санатта. Ол курдук, тустуу федерацията, Олимпийскай эрэл училищета, тренердэр, быраастар… ситимнээх үлэлэрин түмүгэр мэтээл кэллэ.

Онтон Станислав тус тренерэ Василий Уваров, Саха сирин эдэрдэргэ хамаандатын сүрүн тренерэ Василий Неустроев кылгас иһитиннэриилэри оҥордулар. Кинилэр салгыы, ылыныллыбыт тэтими ыһыктыбакка, улахан сыал-сорук туруорунан үлэлииргэ бэлэмнэрин биллэрдилэр.

Станислав улахан сыаллаах-соруктаах спортсмен. Манна, аан дойду чемпионатын боруонса мэтээлин хаһаайына түөрт ый устата дьиэтиттэн, дьонуттан, төрөөбүт республикатыттан тэлэһийэ сылдьан, маннык көрдөрүүнү ситиспитин санатар тоҕоостоох. Бу кэлэ сылдьыытыгар киниэхэ тренерэ сынньанарыгар аҕыс эрэ күнү биэрдэ. Ону да, дьиэтигэр дьарыктанарыгар сорудахтаах. Онтон салгыы уолбут Россия сүүмэрдэммит хамаандатын үөрэтэр-эрчийэр түмсүүтүгэр ыҥырылынна.

Саха Республикатын спортивнай тустууга федерациятын аатыттан федерация толорооччу дириэктэрэ Георгий Башарин, аан дойду эдэрдэргэ чемпионатын боруонса призера Станислав Свинобоевка 150 тыһ. солк, оттон кини тренерэ Василий Уваровка 37 тыһ. 500 солк суумалаах сертификаттары туттарда.

Р.М. Дмитриев аатынан Олимпийскай эрэл училище дириэктэри бастакы солбуйааччы, биллиилээх бөҕөс Александр Контоев, Станислав Свинобоев – училище студена буоларын этэн туран, тустуутун өссө тупсарарыгар, сыыһаларын-халтыларын туоратарыгар баҕарда, оччоҕо өссө үрдүк ситиһиилэр кэлиэхтэрин санатта. Итиэннэ бөҕөскө харчынан сертификаты, оттон кини тренеригэр махтал суругу туттарда. Салгыы Александр Степанович тылы, спонсор Александр Анатольевичка биэрдэ. “Саха смазочные материалы” тэрилтэ генеральнай дириэктэрэ А.А. Мардин – Станислав Свинобоевы эҕэрдэлээн туран, харчынан бириис туттарда.

Ити курдук, Саха сирин сүүмэрдэммит хамаандаларын бэлэмниир республикатааҕы спортивнай киин дириэктэрэ Михаил Пахомов – бу күн дьоруойдарыгар харчынан сертификаттары туттартаата.

Тустуу бэриниилээх ыалдьааччыта, улуу тренер Д.П. Коркин үөрэнээччитэ Валерий Лыткин, кэнники кэмҥэ саха тустууктара эриэ-дэхси ситиһиилэринэн бэйэлэрин биир дойдулаахтарын үөрдэллэриттэн астынарын биллэрдэ. Станислав быйыл саас Иркутскайга Россия эдэрдэргэ чемпионатыгар бастыырын тиийэн илэ хараҕынан көрбүтүн, киниэхэ эрэммитин эттэ.

Үөһэ этэн аһарбытым курдук, маннык ситиһиилэр сиэттиһэн истиннэр! Маннык үөрүүлээх түгэннэр үтүө үгэскэ кубулуйдуннар! Маннык көрсүһүүлэр аҥардас чиэстиир-бочуоттуур тэрээһиннэр курдук көрүллүбэккэ, иитэр-үөрэтэр, угуйар, ыҥырар суолталаахтара саарбахтаммат.

PS: пресс-конференцияттан хаартысканан түгэннэри биһиги http://dzulurgan.ru сайтпыт Хаартыскалар диэн рубрикатыгар киирэн көрүөххүтүн сөп.

Петр ПАВЛОВ.      

Добавить комментарий

Ваш адрес email не будет опубликован. Обязательные поля помечены *

два × пять =