Гаврил Колесов – Европа чемпионунан буолла!

Турция Каппадокия куоратыгар 64 харахтаах дуобакка эр дьоннор уонна дьахталлар ортолоругар Европа чемпионата түмүктэннэ. Чемпионакка инникинэн классическай программаны оонньоотулар.

Дьахталлар ортолоругар финальнай чааһыгар аҕыс иһигэр киирэннэр Сандаара  Апросимова уонна Альбина Большакова аан дойду чемпионнарын, международнай гроссмейстердары кытары утары олорон оонньоон күөн көрүстүлэр.  Онуоха оонньуутун сөптөөхтүк туруоран, Дьокуускай куорат 9-с кылааһын үөрэнээччитэ Сандаара Апросимова утарылаһааччыларын барыларын кыайан эрэллээхтик кыайыы үрдүкү чыпчаалыгар таҕыста.

Салгыы түргэн программа түмүгүнэн аан дойду чемпионунан буола сылдьыбыт Жанна Бупеева (Россия) бастаата. Биһиги кыргыттарбыт Сандаара Апросимова уонна Наталья Шестакова иккис-үһүс миэстэлэри үллэһиннилэр.

Эр дьоннорго классическай уонна түргэн программаларга хоттордубут.

Спортсменнарбыт дойдуларыгар кэлэннэр, оонньонуллубут партияларын, оҥорбут сыысхалларын ырытыахтара. Үс бириистээх миэстэ иһигэр сатаан киирбэтибит.

Ол оннугар чаҕылханныы түргэн программаҕа гроссмейстер Гаврил Колесов Европа чемпионунан буолла.

Ситиһии ситимэ силистээх-мутуктаах, өйүүр дьонноох буолар. Бу тирээн турар уустук кэмнэргэ махталбытын тиэрдиэхпитин баҕарабыт Саха Республикатын спорка министиэристибэтин туһааннаах үлэһиттэригэр, эрчиллэр-бэлэмнэнэр сбордары ыытарга көмөлөрүн, дуобатчыттарга өйөбүллэрин иһин дуобат Саха сиринээҕи федерациятыгар уонна өрүү күүс-көмө, өйөбүл буолар дьоннорбутугар – төрөппүттэргэ!

Гаврил ВИНОКУРОВ, дуобат оонньуутугар международнай арбитр, Бүтүн Россиятааҕы категориялаах судьуйа.

Добавить комментарий

Ваш адрес email не будет опубликован. Обязательные поля помечены *

2 + восемнадцать =