Станислав Свинобоев – аан дойду түһүлгэтин боруонса призёра!

Башкортостан республикатын киин куоратыгар Уфаҕа, 21-гэр диэри саастаахтарга көҥүл тустууга биирдиилээн уонна хамаанданан бастыыр иһин күрэхтэһиигэ биэс ыйааһыҥҥа кыайыылаахтар уонна призердар быһаарылыннылар.

Онуоха, 70 киилэҕэ диэри биһиги биир дойдулаахпыт, Россия эдэрдэргэ быйылгы түһүлгэтин кыайыылааҕа, Мэҥэ Хаҥалас улууһун ыччата, Р.М. Дмитриев аатынан Олимпийскай эрэл училищетын студена Станислав Свинобоев үһүс бириистээх миэстэҕэ тахсан, боруонса мэтээлинэн наҕараадаланна.

Санатан эттэххэ, кини бу күрэхтэһиигэ – Турция, Индия бөҕөстөрүн кыайталаан баран, финалга тахсар иһин киирсиигэ Гаджиевка (Азербайджан) хотторон кэбиспитэ. Оттон үһүс миэстэни ким ыларын быһаарсыыга Швеция спортсменын 12:1 ахсаанынан эрэллээхтик кыайда.

Манна даҕатан эттэххэ, бу ыйааһыҥҥа кыайыылааҕынан иранец Элахи буолла. Кини финалга азербайджанец Гаджиевы 6:5 ахсаанынан хотто.

Бу үөрүүлээх түгэнинэн, Саха сирин тустууну таптааччыларын барыларын итиэннэ бастатан туран, Станислав Свинобоевы тустуук быһыытынан иитэн-такайан таһаарбыт тренердэр Николай Сивцеви, Иван Белолюбскайы, билигин дьарыктыыр сылдьар тренерэ Василий Уваровы, төрөппүттэрин эҕэрдэлиибит!

Уолбут, пьедестал үһүс үктэлигэр тахсан, киниэхэ сүктэриллибит итэҕэли толордо диэххэ сөп. Итиэннэ, саха тустуута билигин даҕаны үрдүк кирбиилэри ылар кыахтааҕын, кэскиллээҕин көрдөрдө.

Бу көрдөрүү, Станиславка салгыы өссө үрдүк кирбиилэри ситиһэригэр үктэл буолуохтун!

«Дьулурҕан».

Добавить комментарий

Ваш адрес email не будет опубликован. Обязательные поля помечены *

двенадцать + двадцать =