«Көҥүл тустууга атын дойдуттан төһө элбэх россиянин кыттарый?»

//Ыйыт – хоруйдуубут

Япония киин куоратыгар сайыҥҥы Олимпийскай оонньуу көҥүл тустууга күрэхтэһиитэ чугаһаата. Онон да ситимнээн, тустууну сэҥээрээччилэр ортолоругар ырытыһыы элбээтэ. Бүгүн биир тустууну таптааччы Василий Алексеев: «Көҥүл тустууга атын дойдуттан төһө элбэх россиянин кыттарый? Буряттартан, тувиннартан бааллар дуо?», – диэн ыйытта.

Кэмигэр оруннаах уонна тоҕоостоох ыйытыы диэххэ сөп. Онон киниэхэ эрэ буолбакка, атыттарга эмиэ интэриэһинэй буолуо диэн, бу туһунан сайтка сырдатарга соруннубут.

Олимпиадаҕа сүүмэрдээһин эрдэ барбыт буолан, ыйааһыннарынан кимнээх тусталлара барыта эрдэттэн биллэр. Кинилэр, Россияттан төрүттээх буолан баран, атын дойдуттан кыттар бөҕөстөр 13-лэр.

Ыйааһыннарын бэрээдэгинэн ылан көрдөххө, 57 киилэҕэ диэри тувинец Артас Санаа (Нурислам Санаев) Казахстан аатыттан тустубута хаһыс да сыла. Кини Азия чемпиона, аан дойду чемпионатын икки төгүллээх призера.

Салгыы ыйааһыҥҥа (65 кг) атын дойдуттан кыттар россияннар иккиэлэр: дагестанец Магомедмурад Гаджиев Польшаттан, балкарец Исмаил Мусукаев – Венгрияттан. Өскөтүн Гаджиев ити дойдуттан тустубута ырааппыт буоллаҕына, Мусукаев үһүс сыла.

74 киилэҕэ дагестанец Магомедхабиб Кадимагомедов – Беларусь Республикатын чиэһин көмүскүүр. Кини 79 киилэҕэ Европа былырыыҥҥы чемпиона.

Салгыы ыйааһыҥҥа (86 кг) дагестанецтар Али Шабанов – Беларусь, Джабраил Шапиев – Узбекистан аатыттан тустуохтара. Өссө бу ыйааһыҥҥа осетин Борис Макоев – Словакия чиэһин көмүскээбитэ хаһыс да сыла, кини аан дойду чемпионатын призера.

97 киилэҕэ диэри түөрт легионар Токио көбүөрүгэр тахсыаҕа. Итиэннэ сэрэйдэххэ, мэтээл иһин сүрүннээн кинилэр Абдулрашид Садулаевы кытта киирсэллэрэ буолуо диэн сылыктыахха сөп. Ол – Дагестантан Шарип Шарипов (2012 – олимпийскай чемпион, 2016 – Олимпиада үрүҥ көмүс призера) Азербайджантан, Риотааҕы-2016 оонньуу призердара Магомед Ибрагимов Узбекистантан, Альберт Саритов (омугунан чечен) Румынияттан тустуохтара.

Оттон саамай ыарахан ыйааһыҥҥа Азия чемпионнара: биһиги Айаал Лазаревпыт – Кыргызстан, Дагестантан төрүттээх ногаец Юсуп Батырмурзаев – Казахстантан кыттыахтара.

Дьэ онон, түмүктээн эттэххэ, Дагестантан – уон, Тываттан, Хотугу Осетияттан, Саха сириттэн – биирдии бөҕөс Токиотааҕы Олимпиадаҕа кыттыахтара.

Петр ПАВЛОВ.  

  

 

 

Добавить комментарий

Ваш адрес email не будет опубликован. Обязательные поля помечены *

2 × четыре =