Сахалар Олимпка өрөгөйбүтүн биир бастакынан сырдаппыта

Ити сайын от үлэтин үгэнигэр мин дойдубар, Хайахсыкка оттуу сылдьарым. Оччолорго телевизоры манаан баран олорбоккун. Араадьыйаны иллэҥ кэмҥэр эрэ холбоон, киэһэ-сарсыарда истэҕин.

Саха АССР спордун маастара, биллиилээх “куобахчыт” Дмитрий Эверстовтыын оскуолаҕа бииргэ үлэлиирбит. Мин бука киниттэн, үс уолбут туста Олимпиадаҕа барбыттарын чуолкайдаан истибитим буолуо. Кини ийэтэ Матрена уонна Д.П. Коркин кэргэнэ Александра Семеновна бииргэ төрөөбүттэр.

Онон Коркиннаахха наар сылдьар, Бөтүрүөбүһү кытта күннэтэ телефонунан сибээстэһэр этэ.

Солун истээри киэһэ киниэхэ тахсарым. Дима бэйэтэ да олус кэпсээннээх, киһини тардар сэһэннээх этэ. Киниттэн Павел Пинигин олимпийскай чемпион буолбутун, Роман Дмитриев, Александр Иванов үрүҥ көмүс мэтээли ылбыттарын иһиттим. Ити туһунан Дмитрий тута Чурапчы хаһыатыгар улахан ыстатыйа суруйан таһааттарбыта.

Дмитрий Дмитриевич, киэһэ курдук өйдүүбүн, үлэтин кэнниттэн, оттуу сылдьар, “Урал” бэлисипиэтинэн Чурапчыга ыстаннарбыта. Биэс көс сир. Онон Дмитрий Петрович үөрүүтүн биир бастакынан үллэстибит, эрдэлээбит киһинэн Миитээ буолар.

Бөтүрүөбүс кинини “Миитээ” диэн ааттыыра. Өр биллибэтэҕинэ суохтуура үһү.

Ити кэмнэргэ Д.Эверстов, Коркин туһунан кинигэ суруйа сылдьара. Мин өйдүүрбүнэн саамай аһаҕастык кэпсэтэр, Миитэ араас дьээбэтин, тылын-өһүн сөбүлээн истэр, сэргиир, күүстээх үлэттэн кинини кытта алтыстаҕына сынньанар буолуохтаах. Миитээ кинигэ суруйабын диэбитигэр бэйэтэ сөбүлэспит этэ.

Хомойуох иһин, үлэтин редакцияҕа киллэрэн көрдөрбүтүн Егор Неймохов кинигэ суруйа сылдьар, киниэнин таһаарабыт, сөбүлүүр буоллаҕына, кыттыһыннардын диэбиттэрэ. Онон биир кэмҥэ СГУ саха тылын салаатыгар үөрэммит табаарыһа сөбүлэһэн, кини суруйууларын киллэрэн, холбоһон, арыый хойутуу кинигэ буолан тахсыбыта.

Дмитрий суруйуутун орто дойдуттан барбытын кэннэ оҕолоро, кэргэнэ туспа кинигэнэн таһаарбыттара. Оччолорго үөһэттэн сөбүлэҥэ суох кинигэ тахсыбат этэ. Итинтэн Дмитрий Дмитриевич санаата түспүтэ.  Дмитрий Петрович баарына өссө ылсан үлэлиэхтээҕэ, улуу тренери киһи, үлэһит быһыытынан дириҥник арыйыахтааҕа хаалбыта. “Үс саха өрөгөйө” диэн бэртээхэй хоһоону айбыта.

Сахалар Олимпка өрөгөйбүтүн биир бастакынан бэчээккэ суруйбут, киэҥник сырдаппыт суруналыыс, поэт, учуутал табаарыым Дмитрий Эверстов туһунан кылгастык да буоллар аҕынным.

Афанасий ИЛЛАРИОНОВ, Россия физическэй култуураҕа уонна спорка туйгуна, Саха сирин физическэй култуураҕа үтүөлээх үлэһитэ, Саха АССР спордун маастара, Мэҥэ Хаҥалас улууһун бочуоттаах гражданина.

Добавить комментарий

Ваш адрес email не будет опубликован. Обязательные поля помечены *

четыре × 4 =