Сайылыкка истэн өрөгөйдөөбүппүт

1976 сыллаахха от ыйын 31-рэ – саха норуотугар хаһан да умнуллубат үтүө күн. Биһиги ити кэмҥэ, СГУ “Аргыс” студеннар тутар этэрээттэригэр үлэлии, Бүлүү улууһун саамай уһук, Кыргыдай нэһилиэгэр сылдьарбыт. Ол саҕана сүрүн иһитиннэрэр-биллэрэр тэрилбит араадьыйа эрэ этэ.

Олимпиадаҕа Монреаль куоракка туста сылдьар саха уолаттарын киирсиилэрин туһунан сонуннары, олус долгуйа истэрбит. Үлэлии да сылдьан, араадьыйабытын олох араарааччыбыт суох. Ол күн сүрүн биригээдэттэн арахсан, сайылык тутуутугар үлэлиир кэммит этэ.

Диктор: “Монреальтан сонуннар” диирин кытта, сүгэбитин, эрбиибитин быраҕан кыыстыын-уоллуун түмсэ түстүбүт. Кини олус өрө көтөҕүллүүлээхтик, саха уола Павел Пинигин Олимпиада чемпиона буолбутун туһунан иһитиннэриитэ, барыбытын олус долгутта, соһутта. Тута “Ураа!” хаһыы бөҕөтүн түһэрдибит, ким өрө эккириир, куустуһуу, эҕэрдэлэһии, үөрүү-көтүү үлүскэнэ манна буолла. Аттыбытыгар турбут фотограппыт Алексей Матвеев биһигини хаартыскаҕа түһэртээбит эбит.

Күһүн үөрэнэ кэлбиппитигэр ону бэлэхтээбитин, студеннаабыт сылларым альбомугар уура сылдьабын, оҕолорбор, сиэннэрбэр ол өрөгөйдөөх кэмнэр тустарынан сиһилии кэпсиибин.

Бу Олимпиадаҕа Павел Пинигин кыайыыта, Роман Дмитриев, Александр Иванов үрүҥ көмүс мэтээли ылыылара, саха эдэр ыччатын улахан кыайыыларга, саҥаттан саҥа Чыпчаалларга  кынаттаабыта, ааспыт үйэ Геройдарынан оҥорбута. Кинилэр үтүө холобурдара, хаһан да суураллыбат сырдык ааттара үйэттэн үйэҕэ салҕанан бара туруохтун!

Василий АЛЕКСЕЕВ, бэтэрээн суруналыыс, СӨ култууратын үтүөлээх үлэһитэ.

Горнай.

Добавить комментарий

Ваш адрес email не будет опубликован. Обязательные поля помечены *

одиннадцать − 5 =