“Дьулурҕаны” хара тахсыаҕыттан ааҕабын

Мин “Дьулурҕан” хаһыаты хара тахсыаҕыттан 1999 сылтан ааҕабын. Биирдэ эмэ бэйэм суруйбут сыллардаах буолуохтаахпын. Спортивнай музейы оҥорор сылларбар бу хаһыат матырыйаалларын туһаммыт, сирдэппит кэмнэрим элбэх этилэрэ.

Манна сыһыары тутан эттэххэ, билигин республикаҕа 14 спортивнай музей (музей хос) баар дииллэр. Кинилэр да төһөлөөх элбэх умнууга хаалбыт спорт маастардарын, спорду көҕүлээччи дьоннорун, спорт историятын «Дьулурҕан» хаһыаттан булан, билэн, үлэлэригэр туһаммыттара, музейдарын байыппыттара буолуой.

Аны төһөлөөх элбэх күрэхтэһии улуустарга спорт араас көрүҥнэригэр тэриллэн, эдэр ыччаты чэгиэн-чэбдик олоххо, спорка тарпытын, угуйбутун киһи ааҕан сиппэт. Төһөлөөх элбэх ыал бэйэлэрин аатырбыт аймахтарын, эбэтэр билэр дьоннорун хаһыаттан ааҕан билэн, кинилэргэ киэн туттууну үөскэппитэ, санааларын көтөхпүтэ буолуой.

Бу барыта аҕыйах киһи үлэтинэн, үтүөтүнэн күн бүгүнүгэр диэри бэчээттэнэн тахсан, спорка үөскүүр араас боппуруостары быһаарсан кэлбит хаһыат буолар. Биир бэйэм суруналыыстар Геннадий Бечеряковка, Петр Павловка махталым улахан!

«Дьулурҕан» республикатааҕы таһымнаах хаһыат буоларынан, үбүлээһинэ эмиэ республика суотугар тахсан, бу хаһыат бары өртүнэн өйөнүөхтээх уонна киэҥник тарҕаныахтаах диэн өйдөбүллээхпин.

Петр ПОРТНЯГИН, Саха Республикатын утүөлээх тренерэ, Верхоянскайдааҕы спорт музейын тэрийээччитэ.  

Добавить комментарий

Ваш адрес email не будет опубликован. Обязательные поля помечены *

3 + пятнадцать =