Варшава-2021: Эдуард Григорьев Европа чемпионатын боруонса призёра

Польшаҕа, Европа көҥүл тустууга чемпионата ыытыллан түмүктэннэ. Бүтэһик күн хаалбыт биэс ыйааһыҥҥа чемпионнар уонна иккис-үһүс миэстэлээхтэр быһаарылыннылар.

Үөрүүлээҕэ диэн, Польша чиэһин көмүскүүр биир дойдулаахпыт, Бүлүү ыччата, Чурапчы тустууга кыһатыгар чочуллубут Эдуард Григорьев 61 киилэҕэ Европа чемпионатын боруонса мэтээлин ылан, тустууну таптааччылары сэргэхситтэ.

Бу чемпионакка Эдуард Григорьев утуу-субуу румын Гуйдяны 12:2, француз Элояны 7:0, изральтянин Попову 11:0 ахсааннарынан кыайталаан баран, финалга тахсар иһин киирсиигэ россиянин Абасгаджи Магомедовка 2:4 ахсаанынан хотторон кэбиспитэ.

Онон балаһыанньа быһыытынан, бөөлүүн, үһүс бириистээх миэстэ иһин болгарин Георгий Вангеловтыын туһунна. Итиэннэ сүрдээх тыҥааһыннаахтык барбыт хапсыһыыга, төһө да эчэйиилээх буоллар, киирсиини сөптөөхтүк былааннаан киирсэн, 4:2 ахсаанынан эрэллээхтик кыайда уонна чемпионат боруонса мэтээлинэн наҕараадаланна.

Түгэнинэн туһанан Эдуард Григорьевы уонна кини тус тренерэ Данил Неустроевы эҕэрдэлиэҕиҥ.

Санатан эттэххэ, бу чемпионакка саха тустууга кыһатын биэс иитиллээччитэ кытынна. Кинилэртэн Арыйаан Тютрин (57 кг) уонна Андрей Бекренев (65 кг) боруонса мэтээл иһин тустууга бэрт кыранан сабырыйтаран, пьедесталга биир хардыынан тиийбэтилэр.

Олох салҕанар, аны уолаттарбыт сотору кэминэн Болгарияҕа ыытыллар Олимпиадаҕа сүүмэрдиир бүтэһик квалификационнай турнирга тустуохтаахтар. Кинилэргэ ситиһиилээх кыттыыны баҕарыаҕыҥ!

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *

13 − десять =