Варшава-2021: Бэһис миэстэттэн өнүйбэтибит

Бүгүн, көҥүл тустууга Европа чемпионатын бүтэһик күнэ. Оттон бөөлүүн, бастакы финаллар буоллулар. Ону саас-сааһынан билиһиннэрдэххэ маннык...

Бэҕэһээ киэһэ маҥнай, чемпионаты бастаан саҕалаабыт ыйааһыннар «уоскутар» диир бөлөхтөрүн тустуулара буолла. Онуоха Андрей Бекренев болгарин Расимы 5:4, оттон Арыйаан Тютрин итальянец Давидовины 4:0 ахсаанынан хотон, боруонса мэтээл иһин киирсэр кыахтаннылар.

Салгыы, 61 киилэлээхтэр күрэхтэһиини саҕалаатылар. Манна олохтоохтор ааттарыттан кыттар Эдуард Григорьев утуу-субуу румын Гуйдяны 12:2, француз Элояны 7:0 уонна израильтянин Попову 11:0 ахсааннарынан эрэллээхтик кыайталаан баран, финалга тахсар иһин хапсыһыыга россиянин Абасгаджи Магомедовка 2:4 ахсаанынан хотторон кэбистэ.

Бу ыйааһыҥҥа иккис киһибит, Македония аатыттан тустар Владимир Егоров – Андрей Джелеп диэн Украина тахсан иһэр талааннаах тустуугар 0:5 ахсаанынан хоттордо. Салгыы тустууга Джелеп – күүстээхтэринэн уонна улахан опыттаахтарынан биллэр Гварзатиловы (Азербайджан) уонна Ломтадзены (Грузия) кыайталаан, финалга таҕыста. Ол аата, Егоров «уоскутар» бөлөххө киирэн салгыы тустар буолла.

Оттон, Эдуард Григорьев финал аҥаарыгар тиийэн хотторбутун быһыытынан, боруонса мэтээл иһин кимниин киирсэрин кэтэһэр. Онно турок Орманоглу уонна болгарин Вангелов бааллар. Сэрэйдэххэ, болгарин буолара буолуо.

Дьэ, оттон биһигинэн түүн үөһэ финаллар саҕаланнылар. Бастаан Арыйаан Тютрин азербайджанец Афган Хашаловы кытта туһунна. Итиэннэ хапсыһыыны кыайан иһэн, бүтэһик түгэҥҥэ ахсааны тэҥнэтэн кэбиһэн (2:2), кыһыылаахтык хоттордо. Онон бэһис миэстэнэн дуоһуйдубут.

Салгыы аны Андрей Бекренев таҕыста. Утарсааччыта – молдован Максим Сакулцан. Бу сүрдээх тыҥааһыннаахтык барбыт тустууга уолбут 2:5 ахсаанынан хотторон, эмиэ бэһис эрэ миэстэни тутан хааллыбыт…

Бастакы финаллар түмүктэрэ:

57 кг: 1. Сулейман Атли (Турция), 2. Начын Монгуш (Россия), 3. Афган Хашалов (Азербайджан), 3. Камиль Керимов (Украина), 5. Арыйаан Тютрин (Беларусь).

65 кг: 1. Загир Шахиев (Россия), 2. Кшиштоф Бьенковски (Польша), 3. Максим Сакулцан (Молдова), 3. Али Рахимзаде (Азербайджан), 5. Андрей Бекренев (Беларусь).

70 кг: 1. Исраил Касумов (Россия), 2. Туран Байрамов (Азербайджан), 3. Арман Андреасян (Армения), 3. Игорь Никифорюк (Украина).

79 кг: 1. Ахсарбек Гулаев (Словакия), 2. Сайфедин Алекма (Франция), 3. Аланс Амировс (Латвия), 3. Ника Кенчадзе (Грузия).

97 кг: 1. Алихан Жабраилов (Россия), 2. Сулейман Карадениз (Турция), 3. Элизбар Одикадзе (Грузия), 3. Радослав Баран (Польша).

Бүгүҥҥү финаллар:

61 кг Андрей Джелеп (Украина) – Абасгаджи Магомедов (Россия).

74 кг Мирослав Киров (Болгария) – Таймураз Салказанов (Словакия).

86 кг Сандро Аминашвили (Грузия) – Артур Найфонов (Россия).

92 кг Самуэль Шеррер (Швейцария) – Магомед Курбанов (Россия).

125 кг Сергей Козырев (Россия) – Таха Акгюль (Турция).

Европа чемпионатын бүгүҥҥү бырагыраамата: 18:30-21:00 – 61, 74, 86, 92, 125 кг ыйааһыннарга “уоскутар” бөлөх тустуулара. 01:00-04:00 – финаллар.

Хапсыһыылары Тустуу аан дойдутааҕы холбоһугун (UWW) анал сайтыгар көрүөххүтүн сөп https://uww.org/event/european-championships-23

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *

15 + пять =