2021 — ГТО сыла: Бастыҥнар бэлиэтэннилэр

Н.Н. Тарскай аатынан «Туймаада» стадион конференц-саалатыгар ГТО Бүтүн Россиятааҕы физкультурнай-спортивнай комплекс бастыҥнарыгар үөрүүлээх быһыыга-майгыга анал бэлиэлэри туттарыы уонна сыл түмүгүн таһаарыы тэрээһинэ буолла.

Үөрүүлээх тэрээһиҥҥэ Саха Республикатын физическэй культураҕа уонна спорка министиэристибэтин отделын салайааччыта Яков Яковлев, СР физическэй культураҕа уонна маассабай спорка управлениетын начаалынньыга Арнольд Мохов, ГТО Саха сиринээҕи салаатын салайааччыта Александр Брызгалов кыттыыны ыллылар.

Кинилэр, өрө көтөҕүллүүлээх үөрүүлээх түгэҥҥэ – ГТО нуормаларын туттарыыга үлэлэһэр дьоҥҥо, ГТО-ну көҥүлүүр бастыҥ инструктордарга уонна спортсменнарга, студеннарга өйдөбүнньүк бэлиэлэри, махтал суруктары, бочуотунай грамоталары туттардылар.

Наҕараадаламмыттар ортолоругар чэпчэки атлетикаҕа норуоттар икки ардыларынааҕы кылаастаах спорт маастара Надежда Гоголева, мас-рестлиҥҥэ спорт маастара Сардаана Осипова, «Чолбон» бассейн тренерэ Марина Федоренко, баһаарынай Артём Ветров, ГТО-ҕа республикатын хамаандатын капитана Арина Югова, сахалыы ыстаныыларга уонна национальнай многоборьеҕа спорт маастара Сайаана Уваровская уо.д.а. бааллар.

Билэргит курдук, 2021 сыл дойду үрдүнэн ГТО сылынан биллэриллибитэ. Маныаха анаан биһиги республикабытыгар элбэх тэрээһин үлэлэр ыытылыннылар. ГТО сайтыгар киирэн бэлиэтэнээччи, дьарыктанааччы элбээтэ. Аны туран, нуормалары туттарыы эмиэ үгүс. Ол курдук, билиҥҥи кэмҥэ Саха сиригэр 13,5 тыһ. киһи ГТО нуорматын ситиһиилээхтик туттарбыта иһитиннэрилиннэ. Улуустарга, нэһилиэнньэҕэ анаан – ГТО нуормаларын туттарыыга, эти-хааны чэбдигирдиигэ усулуобуйалар олохтоннулар, анал площадкалар тутуллаллар. Ол курдук, Яков Николаевич эппитинэн, билигин Саха сирин 36 муниципальнай оройуоннарыттан 27-гэр ГТО-ҕа аналлаах площадкалар тутулуннулар.

Соторутааҕыта, Александр Васильевич Брызгалов салайааччылаах биһиги республикабыт хамаандата ГТО Бүтүн Россиятааҕы фестивалыгар кыттан кэлбитэ. Маннык улахан тэрээһиҥҥэ иккис кыттыыга хамаандабыт эриэ-дэхси көрдөрүүлэнэн, бэйэтин холугар ситиһиилэммитэ.

Көрсүһүү түмүгүнэн ГТО комплексын туттарыыга үлэлэһэр салайааччылар уонна специалистар, «ситиһиллибиттэн уоскуйан хаалбакка, өссө иннибит диэки эрэллээхтик баран иһэбит» диэн, бэйэлэрин иннилэригэр саҥа соруктары туруордулар.

Петр ПАВЛОВ.

Ааптар хаартыскаҕа түһэриитэ.

 

Добавить комментарий

Ваш адрес email не будет опубликован.