2021 сыл – спорка баай ис хоһоонноох сылынан буолуоҕа

Төһө даҕаны биһиги олохпутугар сонуну киэҥник тарҕатыыга аныгы технология күүскэ ааҥнаан киирэн иһэрин үрдүнэн, кумааҕы хаһыаттар бэйэлэрин аналларын сүтэрбэттэр. Хаһыаты күннэтэ атыылаһан ууруна сылдьан ааҕар, туһанар, оннооҕор нүөмэрин барытын тиһэн иһэр дьон билигин да элбэх. Онон ааҕааччы баарын тухары кумааҕы хаһыаттар, сурунааллар баар буола туруохтара дии саныыбын.

Хаһыат өссө интэриэһинэй буоларын инниттэн эһиги, ааҕааччылар бэйэҕит биһигини кытта бииргэ үлэлииргэ ыкса сибээстэһэргит эрэйиллэр. Ол эбэтэр, хаһыат уонна ааҕааччы ыкса сибээстээх буолуохтаахтар.

“Сахапечать” саҥа салалтата хаһыат иннигэр улахан сыаллары-соруктары туруорар. Өскөтүн, билигин хаһыат ыйга биирдэ тахсар эбит буоллаҕына, эһиилги – 2021 сылтан республикатааҕы “Забота-Арчы” хаһыат ыйга иккитэ бэчээттэнэн тахсыаҕа.

“Забота-Арчы” хаһыакка сурутуу почта бары отделениеларыгар итиэннэ podpiska.pochta.ru сайтка киирэн онлайн суруттарыаххытын сөп. Суруттарыы сыаната 2021 сылга аадырыска тиэрдэн биэриигэ бастакы зонаҕа – 344 солк. 76 харчы, иккис зонаҕа – 476 солк. 40 харчы.

Онон “Забота-Арчы” хаһыаты суруттаххытына, эһиги спорка аналлаах “Дьулурҕан” сыһыарыыны тэҥҥэ тутуоххут.

Билэргит курдук, эһиилги 2021 сыл – аан дойдуга да, биһиги республикабытыгар даҕаны спорка сүҥкэн суолталаах, баай ис хоһоонноох сылынан буолуоҕа. Ол курдук, Япония киин куоратыгар – Токиоҕа сайыҥҥы Олимпийскай оонньуулар, футболга Европа чемпионата, Горнайга – “Манчаары оонньуулара” спорт национальнай көрүҥнэригэр спартакиада, Дьокуускайга кикбоксиҥҥа Россия чемпионата курдук улахан таһымнаах күрэхтэһиилэр ыытыллыахтара.

“Дьулурҕан” сүрүннээн ити улахан таһымнаах күрэхтэһиилэр тустарынан сырдатыа. Үгэс быһыытынан, хаһыаты суруппут дьоҥҥо анаан бириистээх куонкурустар тэриллиэхтэрэ. Өссө да ааҕааччыны тардар интэриэһинэй бырайыактар, былааннар, суруйуулар баар буолуохтара. Ону хаһыаты туттаххытына биирдэ билиэххит.

Онон биһиги хаһыаппытыгар суруттараргытыгар, ааҕаргытыгар, бэйэҕит суруктаргытын таһааттараргытыгар ыҥырабын!

Петр ПАВЛОВ, “Дьулурҕан” спорка аналлаах сыһыарыы редактора.    

Добавить комментарий

Ваш адрес email не будет опубликован. Обязательные поля помечены *